ଭୁବନେଶ୍ବର: ରାଜ୍ୟରେ “ ପିଏମ୍ଶ୍ରୀ ଯୋଜନା” କାର୍ଯ୍ୟକାରୀ ପ୍ରସଙ୍ଗରେ ବିଜେପିର ସାମ୍ବାଦିକ ସମ୍ମିଳନୀ । ଏହି ଯୋଜନା ତୁରନ୍ତ ଲାଗୁ କରିବାକୁ ରାଜ୍ୟ ସରକାରଙ୍କୁ ଦାବି କରିଛି ବିଜେପି । ଏନେଇ ବିଜେପି ମୁଖପାତ୍ର ସୋନାଲି ସାହୁ କହିଛନ୍ତି, "ଛାତ୍ରଛାତ୍ରୀଙ୍କ ଭବିଷ୍ୟତକୁ ଅନ୍ଧାରକୁ ଠେଲି ଦେଇଛନ୍ତି ରାଜ୍ୟ ସରକାର । ଓଡିଶାରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ଦିଗହରା । ରାଜ୍ୟର ୪୬ ହଜାର ସ୍କୁଲରୁ ୧୯ହଜାର ସ୍କୁଲରେ ହେଡ୍ମାଷ୍ଟର ନାହାନ୍ତି । ୮ହଜାର ସ୍କୁଲରେ ୧୨ ହଜାର ସହାୟକ ଶିକ୍ଷକ ନାହାନ୍ତି । ୩୦ ହଜାର ସ୍କୁଲରେ କମ୍ପ୍ୟୁଟର ନାହିଁ କି କମ୍ପ୍ୟୁଟର ଶିକ୍ଷକ ନାହାନ୍ତି । ୨୦ହଜାରରୁ ଊର୍ଦ୍ଧ୍ୱ ବିଦ୍ୟାଳୟରେ ବିଜୁଳି ସଂଯୋଗ ନାହିଁ । ୪୦ହଜାର ସ୍କୁଲରେ ଖେଳ ପଡିଆ ନାହିଁ । ପ୍ରାୟ ୧୦ହଜାର ପ୍ରାୟ ସ୍କୁଲରେ ଶୌଚାଳୟ ନାହିଁ।"
"ଓଡିଶାରେ ଶିକ୍ଷା ବ୍ୟବସ୍ଥା ଦିଗହରା । ରାଜ୍ୟ ସରକାର ଆମ ପିଲାମାନଙ୍କୁ ସେମାନଙ୍କର ମୌଳିକ ଅଧିକାରରୁ ବଞ୍ଚିତ କରିଛନ୍ତି । ୨୦୧୭ରେ ‘ମୋ ସ୍କୁଲ’ର ପରିକଳ୍ପନା କରି, ସବୁ ସ୍କୁଲର କାନ୍ଥ ବାଡରେ 'ଆମେ ପଢିବୁ, ଗଢିବୁ, ଶ୍ରେଷ୍ଠ ହେବୁ' ବୋଲି ସ୍ଲୋଗାନ ଲେଖାଥିବାର ଦେଖିବାକୁ ମିଳିଥିଲା । କିନ୍ତୁ ବାସ୍ତବରେ ପଢିବା, ଗଢିବା ଓ ଶ୍ରେଷ୍ଠ ହେବା ପାଇଁ ଯାହା ଯାହା ଆବଶ୍ୟକ ସେସବୁ ପୂରଣ କ୍ଷେତ୍ରରେ ରାଜ୍ୟ ସରକାର ପଛୁଆ । କେଉଁଠି ସ୍କୁଲ ଘର ଛାତରୁ ପାଣି ଗଳିଲାଣିତ, କେଉଁଠି ଛାତ ପୁରା ଗଳି ପଡିଲାଣି । କେଉଁଠି ପାଚେରୀ ଭାଙ୍ଗି ଗଲାଣି ତ ପୁଣି କେଉଁଠି ପିଲାମାନେ ଗଛ ମୂଳେ ପାଠ ପଢୁଥିବାର ଦେଖାଯାଉଛି "ବୋଲି ରାଜ୍ୟ ମୁଖପାତ୍ର ସୋନାଲି ସାହୁ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, "ରାଜ୍ୟରେ ୨୦୦ପିଲାରେ ଜଣେ ଶିକ୍ଷକ । ସେଥିରୁ ଅଧେ ଦିନ ଭୁବନେଶ୍ୱରର ପିଏମଜି ଛକରେ ଧାରଣା ଦେବାରେ ଯାଉଛି, ପଢ଼େଇବ କିଏ ? ସ୍କୁଲ୍ ସବୁ ମାଷ୍ଟର ବିନା ପଡିଆ । ସିଏଜି ରିପୋର୍ଟ ଅନୁସାରେ ୮ଟି ଆକାଂକ୍ଷିତ ଜିଲ୍ଲାରେ ୨୦୧୫-୧୬ରେ ୪୫ପ୍ରତିଶତ ପିଲା ରକ୍ତହୀନତାର ଶିକାର ହେଉଥିଲାବେଳେ ୨୦୨୧-୨୨ରେ ତାହା ବଢ଼ି ୬୫ ପ୍ରତିଶତରେ ପହଞ୍ଚିଛି । ସେହି ଜିଲ୍ଲାରେ ୯୪ହଜାର ପିଲା ସମ୍ପୂର୍ଣ୍ଣ ଅସୁରକ୍ଷିତ । ସର୍ବଭାରତୀୟ ସ୍ତରରେ ଓଡ଼ିଶାରେ 'ଡ୍ରପ ଆଉଟ୍' ସଂଖ୍ୟା ସବୁଠୁ ଅଧିକ । NCRB ରିପୋର୍ଟ ଅନୁସାରେ, ପ୍ରତିଦିନ ରାଜ୍ୟରୁ ୧୧ଜଣ ଶିଶୁ ନିଖୋଜ ହେଉଛନ୍ତି ।"
ଏହା ବି ପଢନ୍ତୁ...ଯୌତୁକ ଆକାରରେ ତାମିଲନାଡୁକୁ ବିଦ୍ୟୁତ ଦେଉଛି କି ଓଡିଶା: ବିଜେପି
