ଖୋର୍ଦ୍ଧା: କାନ୍ଦୁଛି ଘଞ୍ଚ ଜଙ୍ଗଲ ଭରା ବରୁଣେଇ । ସବୁଜ ପରିବେଶ ପୂର୍ଣ୍ଣ ପାହାଡ ଆଜି ଶ୍ମଶାନ ସଦୃଶ । ପର୍ଯ୍ୟଟକଙ୍କ ଆଗମନରେ ଉଲ୍ଲାସିତ ସଂସ୍କୃତି ଓ ଐତିହ୍ୟର ମୂକସାକ୍ଷୀ ଏବେ ଏକା ଏକା । ନା ଶୁଭୁଛି ଶାଗୁଆନିର ସୁ ସୁ ଶବ୍ଦ ନା ଚମକୁଛି ସବୁଜିମାର ସୌନ୍ଦର୍ଯ୍ୟ । ବାତ୍ୟା ‘ଫନି’ ବରୁଣେଇକୁ କରିଦେଇଛି ନିଶବ୍ଦ ଏବଂ ନିର୍ଜିବ ।
କେତେ ବୃକ୍ଷଲତାଙ୍କୁ କୋଳରେ ଧରି ଝଟକୁଥିଲା ବରୁଣେଇ । ହଜାର ହଜାର ଶାଗୁଆନ ଗଛରେ ଥିଲା ପରିପୂର୍ଣ୍ଣ । ଏହାର ସୌନ୍ଦର୍ଯ୍ୟରେ ଅବିଭୂତ ହୋଇଯାଉଥିଲେ ପର୍ଯ୍ୟଟକ । ପାଇକ ଆନ୍ଦୋଳନ ସଂସ୍କୃତି ଓ ଐତିହ୍ୟର ମୂକସାକ୍ଷୀ ଏହି ପାହାଡକୁ ବହୁ ଦୂରଦୂରାନ୍ତରୁ ପର୍ଯ୍ୟଟକ ଧାଇଁ ଆସୁଥିଲେ । ଏହାରି କୋଳରେ ବସି କବି ଓ ଲେଖକଙ୍କ କଲମରୁ ପରିବେଶର ସୌନ୍ଦର୍ଯ୍ୟ ଚିତ୍ରିତ ହେଉଥିଲା । ହେଲେ ଏବେ ସବୁ ଖାଁ ଖାଁ । ନା ଶୁଭୁଛି ପକ୍ଷୀଙ୍କ ରାବ ନା ନାଚୁଛି ବଣ ମୟୂର ।
କିଛି ଦିନ ପୂର୍ବରୁ ଆସିଥିବା ବାତ୍ୟା ‘ଫନି’ ହିଁ ଏବେ ବରୁଣେଇକୁ ଏମିତି କରିଦେଇଛି । ବହୁ ଗଛ ଉପୁଡି ପଡିଛି । ସବୁଜିବା ଭରା ପାହାଡ ଥୁଣ୍ଟା ପରି ମନେ ହେଉଛି । 4 ହଜାରରୁ ଉର୍ଦ୍ଧ୍ବ ଶାଗୁଆନ ଗଛ ଭାଙ୍ଗିଯାଇଥିବା ବନବିଭାଗ କହିଛି । ଅପେକ୍ଷା, ରାଜ୍ୟ ସରକାରଙ୍କ ନିର୍ଦ୍ଦେଶକୁ । ନିର୍ଦ୍ଦେଶ ଆସିବା ମାତ୍ରେ ପୁଣିଥରେ ବରୁଣେଇକୁ ସବୁଜ ସୁନ୍ଦର କରିବା ପାଇଁ ପଦକ୍ଷେପ ନିଆଯିବ ବୋଲି ଖୋର୍ଦ୍ଧା ବନସଂଗ୍ରକ୍ଷକ କହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦଚନ୍ଦ୍ର ପଣ୍ଡା, ଇଟିଭି ଭାରତ
