ଖୋର୍ଦ୍ଧା: ଜିଲ୍ଲା ବାଣପୁର ପୋଲିସକୁ ସଫଳତା । ଏକ ବଡ଼ ଡକାୟତ ଗ୍ୟାଙ୍ଗର ପର୍ଦ୍ଦାଫାସ କରିବାରେ ସଫଳ ହୋଇଛି ପୋଲିସ । ଖୋର୍ଦ୍ଧା ଗଞ୍ଜାମ ସୀମାନ୍ତବର୍ତ୍ତୀ ଅଞ୍ଚଳ ତଥା ବାଣପୁର ଥାନା ଅଧିନସ୍ଥ ଶାଳିଆ ଡ୍ୟାମ ନିକଟବର୍ତ୍ତୀ ଅଞ୍ଚଳରେ ବାରମ୍ବାର ଲୁଟ ଘଟଣାର ଅଭିଯୋଗ ଥାନାକୁ ଆସୁଥିଲେ ମଧ୍ୟ ପୋଲିସ ଲୁଟେରାଙ୍କୁ ଧରିବାରେ ସଫଳ ହୋଇପାରୁନଥିଲା । ପ୍ରତିଥର ସମାନ ସ୍ଥାନରେ ସମାନ ଢଙ୍ଗରେ ଲୁଟେରାମାନେ ଲୋକଙ୍କୁ ଟାର୍ଗେଟ କରି ଲୁଟ୍ କରୁଥିଲେ । ଏନେଇ ବାଣପୁର ପୋଲିସ ଲୁଟେରାମାନଙ୍କୁ ଧରିବା ପାଇଁ ଉଦ୍ୟମ ଜାରି ରଖିଥିବା ବେଳେ ୫ ଜଣ ଡକାୟତଙ୍କୁ ଗିରଫ କରିଛି । ଗତକାଲି ସଂନ୍ଧ୍ୟାରେ ବାଣପୁର ଥାନା ପରିସରରେ ଏକ ସାମ୍ବାଦିକ ସମ୍ମିଳନୀରେ ବାଲୁଗାଁ ଏସଡ଼ିପିଓ ମାନସ ରଞ୍ଜନ ବାରିକ ଏହି ସୂଚନା ଦେଇଛନ୍ତି।
ସୂଚନା ମୁତାବକ ଶନିବାର ମଧ୍ୟରାତ୍ରରେ ଶାଳିଆ ଡ୍ୟାମ ନିକଟରେ କିଛି ଦୁର୍ବୁତ୍ତମାନେ ଡକାୟତି କରିବାପାଇଁ ଯୋଜନା କରୁଥିଲେ। ଏକ ବିଶେଷ ସୂତ୍ରରୁ ସୂଚନା ପାଇ ଏସଡ଼ିପିଓଙ୍କ ନିର୍ଦ୍ଦେଶକ୍ରମେ ବାଣପୁର ଥାନା ଅଧିକାରୀ ଏବଂ ତାଙ୍କ ଟିମ ଉକ୍ତ ସ୍ଥଳରେ ଚଢ଼ାଉ କରି ୫ ଜଣ ଡକାୟତଙ୍କୁ ପୋଲିସ କାବୁ କରିଥିବାବେଳେ ୨ ଜଣ ଫେରାର ହୋଇଯାଇଥିଲେ । ଉକ୍ତ ୫ ଜଣ ଡକାୟତ ପୂର୍ବରୁ ଶାଳିଆ ଡ୍ୟାମ ନିକଟରେ ହୋଇଥିବା ଦୁଇଟି ଡକାୟତି ଘଟଣାରେ ସମ୍ପୃକ୍ତ ଥିବାର ପୋଲିସ ଜାଣିବାକୁ ପାଇଥିଲା।
ସେମାନଙ୍କ ନାରେ ଗଞ୍ଜାମ ଜିଲ୍ଲା ଖଲିକୋଟ ଥାନାରେ ପୂର୍ବରୁ ଚାରି ଗୋଟି ଅପରାଧିକ ମାମଲା ରହିଛି। ପୋଲିସ ସେମାନଙ୍କ ନିକଟରୁ ଗୋଟିଏ ଦେଶୀ ପିସ୍ତଲ, ୫ ମୋବାଇଲ ଫୋନ, ମାରଣାସ୍ତ୍ର ଓ ୩ଟି ବାଇକ ଜବତ କରିଛି । ଗିରଫ ହୋଇଥିବା ଅଭିଯୁକ୍ତ ମାନଙ୍କ ମଧ୍ୟରୁ ୨ ଜଣ ବାଲୁଗାଁର ହୋଇଥିବାବେଳେ ଅନ୍ୟ ୩ ଜଣ ଖଲ୍ଲିକୋଟ ଅଞ୍ଚଳର ବୋଲି ଜଣାପଡିଥିବା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବାଲୁଗାଁ ଏସ୍ଡିପିଓ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
