ଭୁବନେଶ୍ବର: ଜାମ୍ମୁ କାଶ୍ମୀରକୁ ସ୍ବତନ୍ତ୍ର ଅଧିକାର ପ୍ରଦାନ କରୁଥିବା ଧାରା ୩୭୦କୁ ଉଚ୍ଛେଦ ପାଇଁ ରାଜ୍ୟସଭାରେ ସଙ୍କଳ୍ପ ଆଗତ ହୋଇଛି । ଏ ନେଇ ଆଜି ରାଜ୍ୟସଭାରେ ପ୍ରସ୍ତାବ ଆଗତ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଜାମ୍ମୁ କାଶ୍ମୀରର ପୁର୍ନଗଠନ ପାଇଁ ମଧ୍ୟ ସଂସଦରେ ସଂକଳ୍ପ ପତ୍ର ଜରିଆରେ ପ୍ରସ୍ତାବ ଦେଇଛନ୍ତି ଗୃହମନ୍ତ୍ରୀ । ଏପଟେ ଏହି ପ୍ରସ୍ତାବକୁ ଐତିହାସିକ କହି ବିଲକୁ ସ୍ବାଗତ ଜଣାଇଛନ୍ତି ରାଜ୍ୟ ବିରୋଧୀ ଦଳ ନେତା ତଥା ବିଜେପି ବିଧାୟକ ପ୍ରଦିପ୍ତ ନାୟକ ।
ପ୍ରଦୀପ୍ତ କହିଛନ୍ତି, ଏହି ଧାରା ଉପରେ ପ୍ରତିକ୍ରିୟା ରଖିଛନ୍ତି ପ୍ରଧାନମନ୍ତ୍ରୀ । ନରେନ୍ଦ୍ର ମୋଦି କହିଛନ୍ତି ସବକା ସାଥ୍ ସବକା ବିକାଶ ପାଇଁ ଏ ବ୍ୟବସ୍ଥା କରାଯାଇଛି । ଧାରା ୩୭୦ ନେଇ ଆଗତ ପ୍ରସ୍ତାବ ପାରିତ ପରେ ସମସ୍ତଙ୍କର ମଙ୍ଗଳ ହେବ । ଦେଶର ଅନେକ ଅର୍ଥ ଜମ୍ମୁ କାଶ୍ମୀରରେ ହିଁ ଖର୍ଚ୍ଚ ହେଉଥିଲା । ସେଠାରେ ଯେଉଁ ଅଶାନ୍ତି ବାତାବରଣ ଥିଲା ଏବେ ଶାନ୍ତି ଫେରିବ । ଏ ବିବାଦକୁ ନେହେରୁ ସମାଧାନ କରିପାରିଲେ ନାହିଁ । ଆଜି ସମାଧାନ ହୋଇଛି । ସେଥିପାଇଁ ଗୃହମନ୍ତ୍ରୀ ଙ୍କୁ ଧନ୍ୟବାଦ ଜଣାଇଛନ୍ତି ପ୍ରଦୀପ ନାୟକ ।
ଏପଟେ ଏହାକୁ ନେଇ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ଦେଶର ଚୁକ୍ତି ଉଲ୍ଲଙ୍ଘନ ହୋଇଛି। ଦେଶ ପାଇଁ ଭଲ ନୁହେଁ, ଦେଶର ସୁରକ୍ଷା ପାଇଁ ମଧ୍ୟ ଭଲ ନୁହେଁ। କିଛି ନା କିଛି ଗୋଳମାଳିଆ ପରିସ୍ଥିତି ସୃଷ୍ଟି ହୋଇପାରେ। କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ମୁଁ ଗ୍ରହଣ କରି ପାରୁ ନାହିଁ ବୋଲି କହିଛନ୍ତି ନରସିଂହ।
କାଶ୍ମୀର ରାଜାଙ୍କ ଚୁକ୍ତି ଅନୁସାରେ ସମ୍ବିଧାନରେ ଧାରା 370 ଓ 35(ଏ) ରହିଥିଲା। ହେଲେ ହଠାତ ତାକୁ କେନ୍ଦ୍ର ସରକାର ଉଠାଇ ଦେବା ଅର୍ଥ ଚୁକ୍ତି ଉଲ୍ଲଙ୍ଘନ କରିବା। ରାଜ ନେତାଙ୍କୁ ବନ୍ଦୀ କରି ଏଭଳି ନିଷ୍ପତ୍ତି ନେବା ଗଣତନ୍ତ୍ରରେ ବିରୋଧ ବୋଲି ନରସିଂହ କହିଛନ୍ତି।
ଭୁବନେଶ୍ବର ତପନ ଦାସ, ଇଟିଭି ଭିରତ
