ଭୁବନେଶ୍ବର: ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ସଚିବସ୍ତରୀୟ ବୈଠକ ଖାରବେଳ ଭବନରେ ଅନୁଷ୍ଠିତ ହୋଇଛି । ବୈଠକରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ସମେତ ଅନ୍ୟ ସମସ୍ତ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ପ୍ରମୁଖ ଶାସନ ସଚିବ ଓ କମିଶନର ତଥା ଶାସନ ସଚିବମାନେ ଉପସ୍ଥିତ ଥିଲେ । ସଚିବସ୍ତରୀୟ ବୈଠକରେ ଡିସେମ୍ବର ୨୦୨୩ ସୁଦ୍ଧା ରାଜ୍ୟ ତଥା ବିଭିନ୍ନ ବିଭାଗର ବିତ୍ତୀୟ ପ୍ରଦର୍ଶନ ସଂପର୍କରେ ଆଲୋଚନା ହୋଇଛି ।
ବିଭିନ୍ନ ବିଭାଗର ପ୍ରଦର୍ଶନ ଆଧାରରେ ମୁଖ୍ୟ ଶାସନ ସଚିବ ଆଗାମୀ ମାସରେ କାର୍ଯ୍ୟ ଓ ସେହି ଅନୁସାରେ କିପରି ଖର୍ଚ୍ଚ ପ୍ରଦର୍ଶନ ଅଧିକ ଭଲ ରହିବ, ସେନେଇ ତ୍ବରିତ ପଦକ୍ଷେପ ନେବାକୁ ନିର୍ଦ୍ଦେଶ ଓ ପରାମର୍ଶ ଦେଇଛନ୍ତି । ବୈଠକର ପ୍ରାରମ୍ଭରେ ମୁଖ୍ୟ ଶାସନ ସଚିବ ଚଳିତ ଜାନୁଆରୀ ୧୭ ତାରିଖରେ ଲୋକାର୍ପଣ ହେବାକୁ ଥିବା ପୁରୀ ଶ୍ରୀମନ୍ଦିର ପରକ୍ରମା ପ୍ରକଳ୍ପ ସଂପର୍କରେ ଗୁରୁତ୍ବାରୋପ କରିଛନ୍ତି । ଏଥିରେ ସଂପୃକ୍ତ ସମସ୍ତ ବିଭାଗୀୟ କାର୍ଯ୍ୟକୁ ସୁଚାରୁରୂପେ ଅଗ୍ରାଧିକାର ଭିତ୍ତିରେ କରିବା ନେଇ ସହଯୋଗ କରିବାକୁ ନିର୍ଦ୍ଦେଶ ଓ ପରାମର୍ଶ ଦେଇଛନ୍ତି ।
ଉନ୍ନୟନ କମିଶନର ଅନୁ ଗର୍ଗ ଗତ ଡିସେମ୍ବର ମାସରେ ବିଭିନ୍ନ ବିଭାଗର ଉଲ୍ଲେଖନୀୟ କାର୍ଯ୍ୟ ସଫଳତା ସଂପର୍କରେ ଆଲୋକପାତ କରିଛନ୍ତି । ଡିସେମ୍ବର ମାସରେ ଓଡ଼ିଶା ମିଲେଟ୍ ମିଶନ୍, ମିଲେଟ୍ ପ୍ରୋତ୍ସାହନ ପାଇଁ ବିଶ୍ବସ୍ତରୀୟ ମଡେଲ ଭାବେ ପୁରସ୍କୃତ, ଲକ୍ଷ୍ମୀ ବସ ସେବା କୋରାପୁଟରେ ଆରମ୍ଭ, ତାଳଚେରରେ ପବିତ୍ରମୋହନ ମେଡିକାଲ କଲେଜ ଓ ହସ୍ପିଟାଲ ଲୋକାର୍ପଣ, ବିଏସକେୱାଇ-ନବୀନ କାର୍ଡ ପ୍ରଣୟନ, ପୁରୀ ଜିଲ୍ଲା ରଘୁରାଜପୁର ଶିଳ୍ପୀଗ୍ରାମ ମଡେଲ-ଓଡ଼ିଶାର ପ୍ରଜ୍ଞାପନ ମେଢ଼ ଆଗାମୀ ସାଧାରଣତନ୍ତ୍ର ଦିବସରେ ଜାତୀୟସ୍ତରୀୟ ପରେଡ୍ରେ ଅଂଶଗ୍ରହଣ ପାଇଁ ଚୟନ, ଲୋୟର ସୁକତେଲ ଜଳସେଚନ ପ୍ରକଳ୍ପ ଓ ସୁବର୍ଣ୍ଣରେଖା ଜଳସେଚନ ପ୍ରକଳ୍ପର ହଳଦିଆ ଡ୍ୟାମ ଲୋକାର୍ପଣ, ସିଙ୍ଗିଲ ୱିଣ୍ଡୋ ବ୍ୟବସ୍ଥାରେ ଶିଳ୍ପ ବିଭାଗର ୧୯ଟି ପ୍ରକଳ୍ପ ମଞ୍ଜୁର କରାଯାଇ ୭୫୦୦ ନିଯୁକ୍ତି ସୁଯୋଗ ସୃଷ୍ଟି ସଂପର୍କରେ ଆଲୋକପାତ କରିଛନ୍ତି । ଏହାସହ ସେ ଅନ୍ୟ ସମସ୍ତ ବିଭାଗର କାର୍ଯ୍ୟ ସଫଳତା ସଂପର୍କରେ ମଧ୍ୟ ସବିଶେଷ ସୂଚନା ପ୍ରଦାନ କରିଛନ୍ତି । ଏହା ସହିତ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ସଂପର୍କିତ ପ୍ରାକ୍ ପ୍ରସ୍ତୁତି ସଂପର୍କରେ ଆଲୋକପାତ କରିଛନ୍ତି ।"
ଆଗାମୀ ଫେବୃଆରୀ ୩ରୁ ୫ ତାରିଖ ପର୍ଯ୍ୟନ୍ତ ୩ ଦିନ ଧରି ରାଜ୍ୟରେ ହେବାକୁ ଥିବା ବିଶ୍ବ ଓଡ଼ିଆ ଭାଷା ସମ୍ମିଳନୀର ଆୟୋଜନ ସଂପର୍କରେ ମିଶନ ଶକ୍ତି, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ କମିଶନର ତଥା ଶାସନ ସଚିବ ସୁଜାତା ଆର୍ କାର୍ତ୍ତିକେୟନ ପ୍ରସ୍ତୁତି ସମ୍ପର୍କରେ ଉପସ୍ଥାପନ କରିଛନ୍ତି । ଏହି ପରିପ୍ରେକ୍ଷୀରେ ମୁଖ୍ୟ ଶାସନ ସଚିବ କାର୍ଯ୍ୟକ୍ରମର ସଫଳ ଆୟୋଜନ ସଂପର୍କରେ ସଂପୃକ୍ତ ସମସ୍ତ ବିଭାଗର ସହଯୋଗ କାମନା କରି ଆବଶ୍ୟକ ନିର୍ଦ୍ଦେଶ ଓ ପରାମର୍ଶ ଦେଇଛନ୍ତି । ସଚିବ ତଥା ଅଧିକାରୀମାନେ ନିଜ ନିଜ କାର୍ଯ୍ୟରେ ପତ୍ର ପ୍ରେରଣ ପାଇଁ 'ଲେଟର ହେଡ୍' ଇଂରାଜୀ ଭାଷାରେ ବ୍ୟବହାର କରୁଥିଲେ, ଓଡ଼ିଆ ଭାଷାରେ ମଧ୍ୟ ଏହାର ବହୁଳ ବ୍ୟବହାର କରିବାକୁ ସେ ପରାମର୍ଶ ଦେଇଛନ୍ତି ।
ସଚିବସ୍ତରୀୟ ବୈଠକରେ ଡିସେମ୍ବର ୨୦୨୩ ସୁଦ୍ଧା ରାଜ୍ୟ ତଥା ବିଭିନ୍ନ ବିଭାଗ ତଥା ରାଜ୍ୟର ବିତ୍ତୀୟ ପ୍ରଦର୍ଶନ ସଂପର୍କରେ ଅର୍ଥ ବିଭାଗ ପ୍ରମୁଖ ଶାସନ ସଚିବ ବିଶାଳ କୁମାର ଦେବ ବିଶଦ ଭାବେ ତଥ୍ୟ ଉପସ୍ଥାପନ କରିଛନ୍ତି । ବଜେଟ ବ୍ୟବସ୍ଥା ଅନୁସାରେ ବିଭିନ୍ନ ବିଭାଗର ସାମଗ୍ରିକ ଖର୍ଚ୍ଚ ହାର ଗତ ଡିସେମ୍ବର ୨୦୨୨ ଶେଷ ସୁଦ୍ଧା ୪୮.୩୦ ପ୍ରତିଶତ ହୋଇଛି । ୨୦୨୩ ଡିସେମ୍ବର ଶେଷ ସୁଦ୍ଧା ୫୩.୩୫ ପ୍ରତିଶତ ହୋଇଛି । ଫଳରେ ଅର୍ଥ ବିନିଯୋଗ ହାର ବୃଦ୍ଧି ପାଇଛି । କୃଷି ଓ ଆନୁଷଙ୍ଗିକ କ୍ଷେତ୍ରରେ ଗତବର୍ଷ ୫୩.୯୨ ପ୍ରତିଶତ ତୁଳନାରେ ଏ ବର୍ଷ ଖର୍ଚ୍ଚ ୫୫.୨୭ ପ୍ରତିଶତକୁ ବୃଦ୍ଧି ପାଇଛି । ସ୍ବାସ୍ଥ୍ୟ, ସାମାଜିକ ସୁରକ୍ଷା, ଶିକ୍ଷା, ମିଶନ ଶକ୍ତି, ଅନୁସୂଚିତ ଜନଜାତି ଓ ଅନୁସୂଚିତ ଜାତି କଲ୍ୟାଣ ଆଦି ସାମାଜିକ କ୍ଷେତ୍ରରେ ଗତ ବର୍ଷ ୫୩.୬୧ ପ୍ରତିଶତ ତୁଳନାରେ ଏ ବର୍ଷ ଖର୍ଚ୍ଚ ୫୮.୩୫ ପ୍ରତିଶତ ରହିଛି ।
ବଜେଟ ଅର୍ଥ ଆବଣ୍ଟନ ଅନୁସାରେ ଗତବର୍ଷ ଖର୍ଚ୍ଚ ଏହି ସମୟ ସୁଦ୍ଧା ୧୫ ପ୍ରତିଶତରୁ ୨୦୨୩ ଡିସେମ୍ବର ଶେଷ ସୁଦ୍ଧା ୨୭ ପ୍ରତିଶତକୁ ବୃଦ୍ଧି ଘଟିଛି । ବିଭିନ୍ନ କାର୍ଯ୍ୟକ୍ରମ ପାଇଁ ଡିସେମ୍ବର ୨୦୨୨ ସୁଦ୍ଧା ଖର୍ଚ୍ଚ ହାର ୪୬.୩୦ ପ୍ରତିଶତ ଥିବାବେଳେ ଡିସେମ୍ବର ୨୦୨୩ ସୁଦ୍ଧା ୫୦.୪୯ ପ୍ରତିଶତ ରହିଛି । କୃଷି ଓ ଆନୁଷଙ୍ଗିକ କ୍ଷେତ୍ର, ଜଳ ସମ୍ପଦ, ମତ୍ସ୍ୟ ଓ ପ୍ରାଣୀ ସଂପଦ, ସମବାୟ ଆଦି କ୍ଷେତ୍ରରେ ବିଭିନ୍ନ କାର୍ଯ୍ୟକ୍ରମ ବାବଦକୁ ଖର୍ଚ୍ଚ ବିନିଯୋଗ ପ୍ରତିଶତ ଗତ ବର୍ଷ ତୁଳନାରେ ଅଧିକ ରହିଛି । ସେହିପରି ଭିତ୍ତିଭୂମି ବିକାଶ କ୍ଷେତ୍ରରେ ପୂର୍ତ୍ତ, ଗୃହ ଓ ନଗର ଉନ୍ନୟନ, ଗ୍ରାମ୍ୟ ଉନ୍ନୟନ, ଶକ୍ତି କ୍ଷେତ୍ରରେ କାର୍ଯ୍ୟକ୍ରମ ବାବଦରେ ଖର୍ଚ୍ଚ ବିନିଯୋଗ ହାର ବଢିଛି । ଚଳିତ ଆର୍ଥିକ ବର୍ଷରେ ଆଗାମୀ ମାସ ଗୁଡିକରେ ବଜେଟ ଅନୁସାରେ କାର୍ଯ୍ୟ ଓ ଖର୍ଚ୍ଚ ବିନିଯୋଗକୁ ତ୍ବରାନ୍ବିତ କରିବା ସହ ବିଶେଷ କରି ଶିକ୍ଷା, ସଡକ ନିର୍ମାଣ ଭଳି ଭିତ୍ତିଭୂମି ଉନ୍ନୟନ ପ୍ରକଳ୍ପ କାର୍ଯ୍ୟକୁ ତ୍ବରାନ୍ବିତ କରିବା ଉପରେ ମୁଖ୍ୟ ଶାସନ ସଚିବ ଗୁରୁତ୍ବାରୋପ କରିଛନ୍ତି ।
ଏହା ମଧ୍ୟ ପଢ଼ନ୍ତୁ...୨୮ରୁ ସିଏସଙ୍କ ସମ୍ମିଳନୀ; ଅଧ୍ୟକ୍ଷତା କରିବେ ପ୍ରଧାନମନ୍ତ୍ରୀ, ଫୋକସରେ ଇଜ୍ ଅଫ୍ ଲିଭିଂ
ଭୂରାଜସ୍ବ, ଅବକାରୀ, ଜିଏସ୍ଟି ସଂଗ୍ରହ ଓ ଅନ୍ୟ ବ୍ୟବସ୍ଥା ମାଧ୍ୟମରେ ବାବଦରେ ରାଜସ୍ବ ସଂଗ୍ରହରୁ ମିଶାଇ ମୋଟ ରାଜସ୍ବ ଆଦାୟ ଗତବର୍ଷ ଡିସେମ୍ବର ତୁଳନାରେ ୧୯.୯ ପ୍ରତିଶତ ବୃଦ୍ଧି ପାଇଛି । ବିକ୍ରୟ କର ବାବଦରେ ଡିସେମ୍ବର ସୁଦ୍ଧା ୨୫,୭୬୮.୬୩ କୋଟି ସଂଗ୍ରହ ହୋଇଛି । ଗତ ଡିସେମ୍ବର ୨୦୨୨ ତୁଳନାରେ ୨୧.୩୬ ପ୍ରତିଶତ ବୃଦ୍ଧି ପାଇଛି । ଯାହାକି ରାଜସ୍ବ ଆଦାୟ କ୍ଷେତ୍ରରେ ପ୍ରମୁଖ ସହଯୋଗ ଦେଇଛି । ଅଣରାଜସ୍ବ କର ବାବଦରେ ୨୦.୨୨ ପ୍ରତିଶତ ବୃଦ୍ଧି ଘଟିଛି । ବିଭିନ୍ନ ସରକାରୀ କାର୍ଯ୍ୟାଳୟରେ ବକେୟା ପଡିଥିବା ବିଦ୍ୟୁତ ବିଲ ପୈଠ ଦେୟ ସମ୍ପର୍କରେ ବିଦ୍ୟୁତ ବିତରକ ସଂସ୍ଥାମାନଙ୍କୁ ପ୍ରଦାନ କରାଯାଇ ନଥିବାରୁ ତାହାକୁ ଠିକ ସମୟରେ ପୈଠ କରି ଆଦର୍ଶ ଉପଭୋକ୍ତା ହୋଇ ଉଦାହରଣ ସୃଷ୍ଟି କରିବାକୁ ବୈଠକରେ ପରାମର୍ଶ ଦିଆଯାଇଛି ।
ସେହିପରି ରାଜ୍ୟକୁ ସ୍ବତନ୍ତ୍ର ଅନୁଦାନ ସହାୟତାର ଅର୍ଥ ପ୍ରଦାନ ବାବଦରେ ହୋଇଥିବା କାର୍ଯ୍ୟ ସଂପର୍କିତ ବିନିଯୋଗ ପତ୍ର ପ୍ରଦାନ ସଂପର୍କରେ ବୈଠକରେ ଗୁରୁତ୍ବାରୋପ କରାଯାଇଛି । ବିଭିନ୍ନ ଜିଲ୍ଲାରେ କି କି ଦକ୍ଷତା ବିକାଶ ପ୍ରଶିକ୍ଷଣ ପ୍ରଦାନ କରାଯାଉଛି, ସେ ସଂପର୍କରେ ଜିଲ୍ଲାରେ ଦକ୍ଷତା ବିକାଶ ସଂପର୍କିତ ଏକ ସ୍କିଲ କ୍ୟାଲେଣ୍ଡର ରହିବ । ଫଳରେ ଯୁବକଯୁବତୀମାନେ ଏହାର ଲାଭ ନେଇ ପାରିବେ ବୋଲି ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ପ୍ରମୁଖ ଶାସନ ସଚିବ ଉଷା ପାଢ଼ୀ ସୂଚନା ଦେଇଛନ୍ତି । ବିଭିନ୍ନ ବିଭାଗ ଜରିଆରେ ଦକ୍ଷତା ବିକାଶ କାର୍ଯ୍ୟକ୍ରମ କରାଯାଉଥିବାରୁ ଏହାର ପ୍ରସ୍ତୁତି ପାଇଁ ସେ ସମସ୍ତ ବିଭାଗର ସହଯୋଗ କାମନା କରିଛନ୍ତି ।
ଇଟିଭି ଭାରତ, ଭୁବନେଶ୍ବର
