ଭୁବନେଶ୍ବର: ପ୍ରଳୟଙ୍କାରୀ ବାତ୍ୟା 'ଫନି' ଛାରଖାର କରିଦେଇଛି ସ୍ମାର୍ଟ ସିଟି ଭୁବନେଶ୍ବରକୁ । ଅଣଚାଶ ପବନ ମାଡରେ ଛିନଛତ୍ର ହୋଇଛାଇଛି ସବୁକିଛି । ତେବେ ବାତ୍ୟାର ସେ କରାଳ ରୂପ ପରେ ବସ୍ତି ବାସିନ୍ଦାଙ୍କ କରୁଣ ଚିତ୍କାର ବେଶ୍ ହୃଦୟ ବିଦାରକ । ଅଖିଆ ଅପିଆ ସହ ଭଙ୍ଗା ଘରେ ଅତ୍ୟନ୍ତ ଦୟନୀୟ ଭାବରେ ଦିନ କାଟୁଛନ୍ତି ଏମାନେ ।
ଆଜିକୁ ପାଞ୍ଚ ଦିନ ବିତି ଯାଇଥିଲେ ସୁଦ୍ଧା ବିନା ଲାଇନ ଓ ମହଙ୍ଗା ପାଣିରେ କଲବଲ ହେଉଛନ୍ତି ରାଜଧାନୀବାସୀ । ବଡବଡିଆଙ୍କ ଠାରୁ ଆରମ୍ଭ କରି ବସ୍ତି ବାସିନ୍ଦା ସଭିଏଁ ଦୁର୍ଦ୍ଦିନ, ଦୁସ୍ଥିତି ଏବଂ ଦୁର୍ଦ୍ଦଶାରେ ଘାଣ୍ଟିଚକଟି ହେଉଛନ୍ତି ।
ସିଆରପି ଛକ ନିକଟସ୍ଥ ମୁଣ୍ଡା ସାହି ବସ୍ତିର ସ୍ଥିତି ପରଖିବା ପାଇଁ ଆଜି ପହଁଞ୍ଚିଥିଲା ଆମ ‘ଇଟିଭି ଭାରତ’ ଟିମ୍ । ଯାହା ଦେଖଥିଲା ତାହା ଥିଲା ଅତ୍ୟନ୍ତ ହୃଦୟ ବିଦାରକ । ଘର ଦ୍ବାର ସବୁ ନଷ୍ଟ ହୋଇଯିବା ପରେ ଏବେ ସରକାରଙ୍କ ସାହାଯ୍ୟକୁ କେବଳ ଚାହିଁ ବସିଛନ୍ତି ଏମାନେ । ପ୍ରଶାସନ ଦିନଟିଏ ଖାଇବାକୁ ଦେଇଥିବା ବେଳେ ଚାରି ଦିନ ହେବ ସେମାନେ ଉପାସ ଥିବା କହିଛନ୍ତି ।
ଭୁବନେଶ୍ବରରୁ ସତରୂପା ସାମନ୍ତରାୟ, ଇଟିଭି ଭାରତ
