ଖୋର୍ଦ୍ଧା: ରଜ ପାଇଁ ବିଭିନ୍ନ ଅଞ୍ଚଳରେ ଜୁଆଡ଼ି ମାନେ ସକ୍ରିୟ ହୋଇଉଠିଥିବାର ଦେଖାଯାଇଛି l ପୋଲିସ ମଧ୍ୟ ଏମାନଙ୍କ ଉପରେ କଡ଼ା ନଜର ରଖୁଛି l ଖୋର୍ଦ୍ଧା ଜିଲ୍ଲା ଅନ୍ତର୍ଗତ ନାଚୁଣୀ ଅଞ୍ଚଳରେ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ମଙ୍ଗଳବାର ଜୁଆଡ଼ିଙ୍କୁ ଗିରଫ କରିଛି l
ନାଚୁଣୀ ଫାଣ୍ଡି ଅଧିକାରୀ ଉମାକାନ୍ତ ସାହୁ ବିଭିନ୍ନ ଗ୍ରାମରେ ଜୁଆ ଆଡ୍ଡା ଚାଲିଥିବାର ସୂଚନା ପାଇ ଟିମ ସହ ଚଢ଼ାଉ କରିଥିଲେ l ଏହି ପରିପ୍ରେକ୍ଷୀରେ ପୋଲିସ ଭବାନୀପୁର ଆମ୍ବ ତୋଟା ଜଙ୍ଗଲ ଅଞ୍ଚଳ ଏବଂ ସରଳସିଂହ ସ୍କୁଲରେ ଚଢ଼ାଉ କରି ୮ ଜଣ ଜୁଆଡ଼ିଙ୍କୁ ଗିରଫ କରିଛି l
ତେବେ ଅନ୍ୟ ଜୁଆଡ଼ି ମାନେ ଜଙ୍ଗଲ ତଥା ଖୋଲା ଅଞ୍ଚଳର ଫାଇଦା ନେଇ ଖସି ପଳାଇଥିଲେ l ପୋଲିସ ସମସ୍ତ ଅଭିଯୁକ୍ତଙ୍କ ନିକଟରୁ ଟାରପୁଲିନ, ତାସ, ୫ ହଜାର ୬ ଶହ ନଗଦ ଟଙ୍କା, ୬ ଗୋଟି ବାଇକ ଏବଂ ୩ ଗୋଟି ସାଇକେଲ ଜବତ କରିବା ସହ ସେମାନଙ୍କ ବିରୋଧରେ ୩ ଓପିଜି ନିୟମ ଅନୁଯାୟୀ ବାଣପୁର ଥାନାରେ କେସ ନମ୍ବର ୨୧୧/୨୧ ଏବଂ ୨୧୨/୨୧ ରେ ମାମଲା ରୁଜୁ କରି ସମସ୍ତଙ୍କୁ କୋର୍ଟ ଚାଲାଣ କରିଥିବା ସୂଚନା ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
