ଖୋର୍ଦ୍ଧା: ସ୍ଥାନୀୟ ଟାଙ୍ଗିଆପଡା ପଞ୍ଚାୟତ ଉଇଲକିଶନ ନଗରରେ ଜଣେ କୋରୋନା ଆକ୍ରାନ୍ତ ଚିହ୍ନଟ ହେବା ପରେ ସ୍ଥାନୀୟ ଅଞ୍ଚଳରେ ସୃଷ୍ଟି ହୋଇଛି ଭୟର ବାତାବରଣ । ଏମିତିରେ ସ୍ଥାଲନୀୟ ଅଞ୍ଚଳବାସୀଙ୍କ ସୁରକ୍ଷାକୁ ନଜରରେ ରଖି ସରପଞ୍ଚ କଲ୍ୟାଣୀ ଦଳାଇ ଜିଲ୍ଲାପାଳଙ୍କ କ୍ଷମତା ପ୍ରୟୋଗ କରି ରବିବାରଠାରୁ ସମ୍ପୃକ୍ତ ଅଞ୍ଚଳରେ 72 ଘଣ୍ଟା ସଟଡାଉନ ଘୋଷଣା କରିଛନ୍ତି ।
ସରପଞ୍ଚଙ୍କ ଘୋଷଣା ଅନୁଯାୟୀ ଏହି ସଟଡାଉନ ସମୟରେ ଏହି ଅଞ୍ଚଳରୁ କେହି ଗ୍ରାମବାସୀ ବାହାରକୁ ଯାଇ ପାରିବେ ନାହିଁ । ସେପଟେ ବାହାରୁ କୌଣସି ଲୋକ ଏହି ସମୟରେ ଗାଁରେ ପ୍ରବେଶ କରିପାରିବେ ନାହିଁ । ସମସ୍ତ ଦୋକାନ ବଜାର ଇତି ମଧ୍ୟରେ ବନ୍ଦ ରହିବ ଓ ସମ୍ପୃକ୍ତ ଅଞ୍ଚଳକୁ ସାନିଟାଇଜ କରାଯିବା ନେଇ ମଧ୍ୟ ନିର୍ଦ୍ଦେଶ ରହିଥିବା ଜଣା ପଡିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
