ଭୁବନେଶ୍ବର: ୧୫ ତାରିଖରୁ ଆରମ୍ଭ ହୋଇଥିବା ସିଟି ଫେଷ୍ଟିଭାଲ୍ ‘ଡଟ୍ ଫେଷ୍ଟ’ ସଫଳତାର ସହ ତୃତୀୟ ସନ୍ଧ୍ୟା ଶେଷ ହୋଇଛି । ତୃତୀୟ ସନ୍ଧ୍ୟାରେ ୧୦ ହଜାରରୁ ଊର୍ଦ୍ଧ୍ବ ଲୋକଙ୍କ ଭିଡ଼ ପରିଲିକ୍ଷିତ ହୋଇଛି । ଦର୍ଶକଙ୍କ ମନୋରଞ୍ଜନ ପାଇଁ ପୁଣିଥରେ ଏକ ନୂଆ ଓ ଆକର୍ଷଣୀୟ ଅବତାରରେ ଅତୁଳନୀୟ ପ୍ରଦର୍ଶନଗୁଡିକୁ ଦେଖିବାକୁ ମିଳିଥିଲା । ଯେଉଁଠାରେ ପ୍ରଚ୍ଛଦପଟ ଗାୟକ ଦିବ୍ୟ କୁମାର, ନୀତି ମୋହନ ନିଜର ସଙ୍ଗୀତ ମାଧ୍ୟମରେ ଦର୍ଶକଙ୍କୁ ବାନ୍ଧି ରଖିଥିଲେ । ଲୋକପ୍ରିୟ ଓଡିଆ ଗାୟକ ପ୍ରଜ୍ଞା ହୋତାଙ୍କ ସୁୁମଧୁର ସ୍ବର ଦର୍ଶକଙ୍କ ମନ ଜିଣିଥିଲେ ।
୨୪ ରାଜ୍ୟର ଆଞ୍ଚଳିକ ଖାଦ୍ୟ ସମେତ ହକି ବିଶ୍ବକପ୍ରେ ଅଂଶଗ୍ରହଣ କରିଥିବା ୧୬ ଦେଶର ସ୍ୱାଦିଷ୍ଟ ଖାଦ୍ୟର ମଜା ଉଠାଇଲେ ଦର୍ଶକ । ଓଡିଶାର ପାରମ୍ପରିକ ଓ ଲୋକପ୍ରିୟ ଖାଦ୍ୟର ମଧ୍ୟ ସ୍ୱାଦ ଚାଖିଥିଲେ। ଡଟ୍ ଫେଷ୍ଟରେ ଅନ୍ୟ ଏକ ଆକର୍ଷଣ ନାଇଟ୍ ବଜାର । ସ୍ଥାନୀୟ କଳାକାର, ଷ୍ଟାର୍ଟଅପ୍, ପ୍ରଦର୍ଶନକାରୀ, କାରିଗର ଓ ଉଦ୍ଭାବକଙ୍କୁ ନିଜ ସାମଗ୍ରୀ ପ୍ରଦର୍ଶିତ କରିବା ପାଇଁ ଏକ ବଡ ମଞ୍ଚ ପ୍ରଦାନ କରିବା ସହ ଭୁବନେଶ୍ବରର ଶୀତୁଆ ରାତିକୁ ଆହୁରି ଜୀବନ୍ତ କରିଥିଲା । ଡଟ୍ ଫେଷ୍ଟର ଦ୍ବିତୀୟ ସନ୍ଧ୍ୟା ପରି ତୃତୀୟ ସନ୍ଧ୍ୟା ମଧ୍ୟ ଓଡିଆ କଳାକାରଙ୍କ ପ୍ରଦର୍ଶନରୁ ଆରମ୍ଭ ହୋଇଥିଲା ।
ନିର୍ଦ୍ଧାରିତ ସମୟ ପୂର୍ବରୁ ଆରମ୍ଭ ହୋଇଥବା ଏହି କାର୍ଯ୍ୟକ୍ରମରେ ଓଡ଼ିଆ ଚୁଲବୁଲି ସଙ୍ଗତକାର ପ୍ରଜ୍ଞା ହୋତାଙ୍କୁ ଦେଖିବାକୁ ମିଳିଥିଲା । ପ୍ରଜ୍ଞା ‘ପ୍ୟାର୍ ୱାଲା ହିଚ୍କି’, ‘ଓ ସୁନୟନା’, ‘ମତେ ତୁ ତୋ ପ୍ରେମର ମିଠା ମିଠା’, ‘ତୁ ମୋ ଡାର୍ଲିଂ’, ‘ରାମା ରାମା ରାମା ଏଇ ଝିଅଟା’ ଭଳି ଗୀତରେ ଦର୍ଶକଙ୍କୁ ବାନ୍ଧି ରଖିଥିଲେ । ପରେ ସେ ଝୁରାବେଣୀ, ଗୁଆଘିଅ ଭଳି ଓଡ଼ିଆ ଆଇଟମ୍ ଗୀତ ଗାଇ ଦର୍ଶକଙ୍କୁ ନଚାଇଥିଲେ । ଅନ୍ୟପଟେ ଡଟ୍ ଫେଷ୍ଟର ତୃତୀୟ ସନ୍ଧ୍ୟାର ମୁଖ୍ୟ ଆକର୍ଷଣ ଥିଲେ ବଲିଉଡ ଲୋକପ୍ରିୟ ଗାୟିକା ନୀତି ମୋହନ। ସେ ତାଙ୍କ ସଙ୍ଗୀତରେ ଦର୍ଶକଙ୍କ ଯେତିକି ମନ ଜିଣିଥିଲେ । ଆକ୍ଟ ମଝିରେ ନୀତି ଦର୍ଶକଙ୍କ ସହ ଓଡ଼ିଆରେ କଥା ହୋଇଥିଲେ । ‘ମୋ ତରଫରୁ ଆପଣଙ୍କୁ ନମସ୍କାର । ଆପଣମାନେ ଭଲ ଅଛନ୍ତି ତ? ଖାଇ ପିଇ ଆସିଛନ୍ତି ତ? ଆପଣମାନେ ଖୁସି ତ? ଓଡ଼ିଶାକୁ ମୁଁ ଆସି ବହୁତ ଖୁସି' ବୋଲି କହିଥିଲେ । ନୀତିଙ୍କ ଏହି ବାର୍ତ୍ତାଳାପ ସମୟରେ ଦର୍ଶକ ମଧ୍ୟ ତାଙ୍କୁ ଭଲପାଇବା ଦେଇଥିଲେ ।
ନୀତି ମୋହନ ନିଜ କଣ୍ଠର ଯାଦୁ ଖେଳାଇବା ସହ ଓଡ଼ିଶାର ବହୁ ପ୍ରଶଂସା କରିଛନ୍ତି । ଓଡ଼ିଶା କଳା, ସଂସ୍କୃତି ଓ ସଙ୍ଗୀତରେ ଧୁନ କଥା କହି ଓଡ଼ିଆ ଗୀତ ରଙ୍ଗବତୀର ବହୁ ପ୍ରଶଂସା କରିଥିଲେ। "ଓଡ଼ିଶା ମାଟିକୁ ନମସ୍କାର କରିବାକୁ ଚାହୁଁଛି । ସଙ୍ଗୀତ, କଳା ଓ ସଂସ୍କୃତିରେ ଓଡ଼ିଶା ବହୁତ ଧନୀ ।" ମୁଁ ସବୁବେଳେ ଓଡ଼ିଶା ଆସି ବହୁତ ଖୁସି ବୋଲି ପ୍ରକାଶ କରିଥିଲେ । ରାଜ୍ୟ ସଙ୍ଗୀତ 'ବନ୍ଦେ ଉତ୍କଳ ଜନନୀ' ଗାଇ ସମସ୍ତଙ୍କ ହୃଦୟକୁ ଛୁଇଁବା ସହ ଉପସ୍ଥିତ ଦର୍ଶକଙ୍କୁ ଛିଡା କରିବାକୁ ବାଧ୍ୟ କରିଥିଲେ ।
ସେହିପରି ନିଜ କଣ୍ଠର ଯାଦୁଗରି ଦେଖାଇଥିବା ବେଳେ 'ୟେ ଜୋ ଅବ୍ ହୋ ରାହା ହେ' ଗୀତରୁ ନିଜ ଆକ୍ଟ ଆରମ୍ଭ କରି ନୀତି ପ୍ରାୟ ୨୦ରୁ ୨୫ ଗୀତ ଗାଇଥିଲେ। ବିଶେଷ କରି ଓଡ଼ିଆ ଗୀତ ବନ୍ଦେ ଉତ୍କଳ ଜନନୀ ଓ ରଙ୍ଗବତୀ ଦର୍ଶକଙ୍କ ମନକୁ ଛୁଇଁଥିଲା । ଏହାବାଦ ସେ ‘ଲାକ୍ଷୋନ୍ ମିଲେ’, ‘ନୈନୋ ବାଲେନେ’, ‘ଇସ୍କ ୱାଲା ଲଭ୍’, ‘ଡୋଣ୍ଟ ବିଲିଭ୍ ଜଷ୍ଟ ୱାଚ୍’, ‘ବ୍ୟାଙ୍ଗ ବ୍ୟାଙ୍ଗ’, ‘ଘୁଙ୍ଗରୁ’, ‘ଜିଆ’, ‘ମେରି ଜାନ୍’ ଭଳି ଗୀତ ଗାଇ ଦର୍ଶକଙ୍କ ମନୋରଞ୍ଜନ କରିଥିଲେ । ଆଉ ଦର୍ଶକଙ୍କ ଗହଣରେ ଆସି ନାଚିବା ସହ ସେଲ୍ଫି ନେଇଥିଲେ ।
ଶେଷରେ ଦିବ୍ୟ କୁମାରଙ୍କ ଡ୍ୟାନ୍ସ ଆଇଟମ୍ ଜଲୱା ଦେଖିବାକୁ ମିଳିଥିଲା । ତାଙ୍କ ଗୀତରେ ଝୁମିଥିଲା ପୁରା ପ୍ରଦର୍ଶନୀ ପଡ଼ିଆ । ଦିବ୍ୟଙ୍କ ଗୀତରେ ଉପସ୍ଥିତ ଦର୍ଶକ ଖୁବ୍ ମଜା ନେବା ସହ ନାଚି ଗାଇ ମସଗୁଲ ହୋଇଥିଲେ । ସେହିପରି ଡଟ୍ ଫେଷ୍ଟର ଚତୁର୍ଥ ସନ୍ଧ୍ୟାକୁ 'ଚକ୍ ଦେ ଓଡିଶା' ଥିମ୍ ଦିଆଯାଇଛି । ଫେଷ୍ଟ୍ର ୪ର୍ଥ ଦିନରେ ସ୍ଥାନୀୟ ଲୋକମାନେ ନିଜ ପସନ୍ଦର ଓଡିଆ କଳାକାରଙ୍କ ପ୍ରଦର୍ଶନକୁ ଉପଭୋଗ କରିପାରିବେ । ଗାୟିକା ଲିସା ମିଶ୍ର, ସ୍ନିତି ମିଶ୍ର, ଋତୁରାଜ ମହାନ୍ତି ଓ ଓଡିଆ ରାପର୍ ସମିର୍ ରିଶୁ ମହାନ୍ତି (ବିଗ୍ଡିଲ୍) ନିଜର ପ୍ରଦର୍ଶନ ସହ ଦର୍ଶକଙ୍କୁ ମନ୍ତ୍ରମୁଗ୍ଧ କରିବେ ବୋଲି ଆୟୋଜନକାରୀ ସଂସ୍ଥା କହିଛି ।
ସରିଲା ‘ଭୁଫେଷ୍ଟୋ ୨୦୨୩’
ଡଟ୍ ଫେଷ୍ଟରେ ଆୟୋଜିତ ସର୍ବବୃହତ୍ ଆନ୍ତର୍ଜାତୀୟ ଓରାଲ୍ ଷ୍ଟୋରିଟେଲିଙ୍ଗ ଫେଷ୍ଟିଭାଲ- ଭୁଫେଷ୍ଟୋ (ଭୁବନେଶ୍ୱର ଫେଷ୍ଟିଭାଲ ଅଫ୍ ଷ୍ଟୋରିଟେଲିଙ୍ଗ୍) ଅନେକ ଉଲ୍ଲାସର ସହ ଶେଷ ହୋଇଛି । ଭୁଫେଷ୍ଟୋ ଗତ ଜାନୁୟାରୀ ୧୪ରୁ ୧୭ ଯାଏ ପ୍ରତ୍ୟେକ ଦିନ ଅପରାହ୍ନ ୨.୩୦ରୁ ସନ୍ଧ୍ୟା ୭.୩୦ ଯାଏ ଭୁବନେଶ୍ୱରର ୩ ପାର୍କ ଓ କଳାଭୂମୀରେ ଆୟୋଜିତ ହୋଇଥିଲା। ଉତ୍ସବର ଶେଷ ସନ୍ଧ୍ୟାରେ ନନ୍ଦିତା ଦାସ, ଲୋପାମୁଦ୍ରା ମହାନ୍ତି, ମୀରା ଦାସ, ହୃଦୟ ରଞ୍ଜନ, ଶାସ୍ବତି ପଟ୍ଟନାୟକ, ରବଣ ଛାୟା, ପ୍ରାଚୀ ତାରାଙ୍କ ଭଳି ଓଡ଼ଆ କଥାକାରମାନେ ସେମାନଙ୍କ କାହାଣୀ ଉପସ୍ଥାପନ କରିଥିଲେ ।
ସେହିଭଳି ଆରିଓ (ଇଣ୍ଡୋନେସିଆ), ମାରିଅନ କେନି(ସ୍କଟଲ୍ୟାଣ୍ଡ), ଅକ୍ଷୟ ଗାନ୍ଧୀ, ନୁପୁର ଅଗରୱାଲ, ଆଣ୍ଟୋନିଓ ରୋଚା, ଅନୁଭା, ବୋଗିସ୍ୱା(ସାଉଥ ଆଫ୍ରିକା), ରୋହିଣୀ ଭିଜ, ରୋଜର ଜେନକିନ୍ସ(ସିଙ୍ଗାପୋର)ଙ୍କ ଭଳି ଅନେକ ବିଶିଷ୍ଟ କଥାକାର ମଧ୍ୟ ସେମାନଙ୍କ କାହାଣୀ ଉପସ୍ଥାପନା କରିଥିଲେ।
ଇଟିଭି ଭାରତ, ଭୁବନେଶ୍ବର
