ଭୁବନେଶ୍ୱର: ନିର୍ବାଚନ ବିଗୁଲ ବାଜି ସାରିବା ପରେଏବେ ସବୁଆଡେ ନିର୍ବାଚନୀ ମାହୋଲ । ବିଭିନ୍ନପର୍ଯ୍ୟାୟରେ ହେବ ମତଦାନ । ସେଥିପାଇଁ ପ୍ରାର୍ଥୀଙ୍କ ନାମାଙ୍କନ ଦାଖଲ ବି ଜମୁଛି । ଏହି କ୍ରମରେ ଗୁରୁବାର ଠାରୁ 3ୟ ପର୍ଯ୍ୟାୟ ମତଦାନ ନିମନ୍ତେ ଆରମ୍ଭ ହୋଇଛି ନାମାଙ୍କନ ଦାଖଲ ପ୍ରକ୍ରିୟା । ଗତକାଲି (ଗୁରୁବାର) ଭୁବନେଶ୍ୱର ଲୋକସଭା ଆସନ ପାଇଁ କୌଣସି ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିନଥିଲେ । କିନ୍ତୁ ଶୁକ୍ରବାର ଦ୍ଵିତୀୟ ଦିନରେ ସ୍ୱାଧୀନ ପ୍ରାର୍ଥୀ ଭାବେ ସଞ୍ଜୟ କୁମାର ସାହୁ ଏବଂ ସିପିଆଇ (ଏମଏଏଲ) ରେଡ଼ ଷ୍ଟାର ପକ୍ଷରୁ ପ୍ରମିଳା ବେହେରା ନାମାଙ୍କନ ଦାଖଲ କରିଛନ୍ତି । ଉଭୟ ଏହି ନାମାଙ୍କନ ଖୋର୍ଦ୍ଧା ଜିଲ୍ଲାପାଳ ନିର୍ମଳ ଚନ୍ଦ୍ର ମିଶ୍ରଙ୍କ ନିକଟରେ ଦାଖଲ କରିଛନ୍ତି ।
ସେହିପରି ଶୁକ୍ରବାର ଜଟଣୀ ବିଧାନସଭା କ୍ଷେତ୍ର ଓ ଭୁବନେଶ୍ୱର ଏକାମ୍ର କ୍ଷେତ୍ର ପାଇଁ କଂଗ୍ରେସ ବିଧାୟକ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି । ଏକାମ୍ର ନିର୍ବାଚନ ମଣ୍ଡଳୀରୁ ରଶ୍ମି ମହାପାତ୍ର ନାମାଙ୍କନ ଦାଖଲ କରିଥିବା ବେଳେ ଜଟଣୀ ପାଇଁ ସୁରେଶ ରାଉତରାୟ ନାମାଙ୍କନ ଦାଖଲ କରିଛନ୍ତି । ଏହି ସମୟରେ ଉଭୟ ପ୍ରାର୍ଥୀ ନିଜ ନିଜ ସମର୍ଥକଙ୍କ ସହ ଶକ୍ତି ପ୍ରଦର୍ଶନ କରିଥିଲେ । ରଶ୍ମି ମହାପାତ୍ର ଲିଙ୍ଗରାଜ ମନ୍ଦିର ପରିସରରୁ ଏକ ବିଶାଳ ଶୋଭାଯାତ୍ରାରେ ବାହାରି ହଜାର ହଜାର ସଂଖ୍ୟାର ଦଳୀୟ କର୍ମୀ ଓ ସମର୍ଥକଙ୍କ ସହ ଆସି ଭୁବନେଶ୍ୱର ଉପଜିଲ୍ଲାପାଳଙ୍କ ନିକଟରେ ନାମାଙ୍କନ ଭରି ଥିଲେ । ଆଉ ଏହି ଶକ୍ତି ପ୍ରଦର୍ଶନରୁ ନିଜକୁ ବାଦ ପକାଇନଥିଲେ ଜଟଣୀର କଂଗ୍ରେସ ପ୍ରାର୍ଥୀ ସୁର ରାଉତରାୟ । ସୁର ମଧ୍ୟ ଏକ ବିଶାଳ ଶୋଭାଯାତ୍ରା କରି ନାମାଙ୍କନ ଦାଖଲ କରିଥିଲେ ।
ସୁରଙ୍କ ବିଶ୍ୱାସ ଜଟଣୀରେ ତାଙ୍କୁ କେହି ଟକ୍କର ଦେଇ ପାରିବେନାହିଁ । ଜଟଣୀବାସୀ ସ୍ୱାଭିମାନ ଓ ଆଭିଜାତ୍ୟ ସମ୍ପନ୍ନ। ସେମାନଙ୍କ ଅଧା ଭୋଟ କଂଗ୍ରେସର । ଆଉ ତାଙ୍କ ସୁର ଭାଇଙ୍କୁ ଜିଲ୍ଲାବାସୀ ବିଧାନସଭା ପଠାଇବାକୁ ସ୍ଥିର କରିଥିବା ସେ ଦୃଢୋକ୍ତି ପ୍ରକାଶ କରିଛନ୍ତି ।
ଜିତିବା ପରେ ଜଟଣୀବାସୀଙ୍କ ସମସ୍ତ ଅଧାପନ୍ତରିଆ କାମକୁ ସମ୍ପୂର୍ଣ୍ଣ କରିବାକୁ ସ୍ଥିର କରିଥିବା ବିଧାନସଭା କଂଗ୍ରେସ ବିଧାୟକ ପ୍ରାର୍ଥୀ ସୁର ରାଉତରାୟ କହିଛନ୍ତି । ସେହିପରି ଏକାମ୍ର ବିଧାନସଭା କଂଗ୍ରେସ ବିଧାୟିକା ପ୍ରାର୍ଥୀ ରଶ୍ମି ମହାପାତ୍ର ଲୋକଙ୍କ ସହ ସର୍ବଦା ରହିଛନ୍ତି ବୋଲି କହିଛନ୍ତି ।
ଭୁବନେଶ୍ବର ଓ ଖୋର୍ଦ୍ଧାରୁ ସଞ୍ଜୀବ ରାୟ, ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
