ଆନନ୍ଦପୁର: ଡାହାଣୀ ସନ୍ଦେହରେ ମାଇଁକୁ ହତ୍ୟା କଲା ଭଣଜା । ଅଭିଯୁକ୍ତ ଭଣଜାକୁ ଅଟକ ରଖିଛି ଆନନ୍ଦପୁର ପୋଲିସ । ଏଭଳି ଅଭାବନୀୟ ଘଟଣା ଘଟିଛି ଆଦିବାସୀ ଅଧ୍ୟୁଷିତ କେନ୍ଦୁଝର ଜିଲ୍ଲା ଆନନ୍ଦପୁର ଥାନା ଗହଳମୁଣ୍ଡା ପଞ୍ଚାୟତ କନ୍ତଳା ଗ୍ରାମରେ ।
ଗତକାଲି(ଗୁରୁବାର) ରାତିରେ କୌଣସି କାରଣରୁ ଡାହାଣୀ ସନ୍ଦେହ କରି କନ୍ତଳା ଗ୍ରାମର ବାରଙ୍ଗୀ ପୂର୍ତ୍ତିକୁ ନିଜ ଭଣଜା କାର୍ତ୍ତିକେଶ୍ବର ବିରୁଆ ହତ୍ୟା କରିଥିଲା । ଖବର ପାଇ ଆନନ୍ଦପୁର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଅଭିଯୁକ୍ତ ଭଣଜାକୁ ଅଟକ ରଖିଛି ।
ଗୁରୁବାର ସନ୍ଧ୍ୟାରେ ଉଭୟ ବାରଙ୍ଗୀ ଓ କାର୍ତ୍ତିକେଶ୍ବର ମଦ ପିଇବାକୁ ନିକଟସ୍ଥ ବଜାରକୁ ଯାଇଥିଲେ । ମଦ ପିଇବା ପରେ ବାରଙ୍ଗୀକୁ ଏକ ଟାଙ୍ଗିଆରେ କାର୍ତ୍ତିକେଶ୍ବର ହତ୍ୟା କରିଥିବା ଜଣାପଡିଛି । ତେବେ ସେ ନିଜ ମାଇଁକୁ ଡାହାଣୀ ସନ୍ଦେହରେ ହତ୍ୟା କରିଥିବା ପୋଲିସ ଆଗରେ ପ୍ରକାଶ କରିଛି ।
ସୂଚନା ଅନୁସାରେ, କାର୍ତ୍ତିକେଶ୍ବରର ଶିଶୁପୁତ୍ର କାନ୍ଦିବାରୁ ବାରଙ୍ଗୀ ଆସି ଝଡାଫୁଙ୍କା କରିଥିଲା । ତେବେ ଏଥିରେ ଶିଶୁଟିର କାନ୍ଦ କମିନଥିଲା । ପରେ ବାରଙ୍ଗୀ ହିଁ ଏଥିଲାଗି ଦାୟୀ ବୋଲି କିଛି ଲୋକ କହିବାରୁ କାର୍ତ୍ତିକେଶ୍ବରର ରାଗ ଚଢିଯାଇଥିଲା । ଏଥିଲାଗି ଗୁରୁବାର ସନ୍ଧ୍ୟାରେ ତାକୁ ମଦ ପିଆଇବାକୁ ନେବା ସହ ତାକୁ ହତ୍ୟା କରିଦେଇଥିଲା ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
