କେନ୍ଦୁଝର: ପାଟଣା ଥାନା ଅନ୍ତର୍ଗତ ଧାନବେଣୀ ଗ୍ରାମରେ ମର୍ମନ୍ତୁଦ ସଡକ ଦୁର୍ଘଟଣା । କେନ୍ଦୁଝର ଜିଲ୍ଲା ସାହାରପଡା ବ୍ଲକ କପୁଣ୍ଡି ଗ୍ରାମ ପଞ୍ଚାୟତ ଅନ୍ତର୍ଗତ ଧାନବେଣୀ ଗ୍ରାମର ବିଜୟ ମହାନ୍ତଙ୍କର ସ୍ତ୍ରୀ କମଳା ମହାନ୍ତଙ୍କ ଗାଡି ଧକ୍କାରେ ମୃତ୍ୟୁ ଘଟିଛି ।
ସୂଚନା ଅନୁଯାୟୀ ରାଞ୍ଚି-ବିଜୟୟାଡା ୨୨୦ନଂ ଜାତୀୟ ରାଜପଥର ଧାନବେଣୀ ନିକଟରେ ଘଟଣାଟି ଘଟିଛି । ମଙ୍ଗଳବାର ବିଜୟ ମହାନ୍ତଙ୍କ ସ୍ତ୍ରୀ ଘର ଦୁଆର ମୁହଁ ପାଖ ରାସ୍ତା କଡରେ ବାସନ ମାଜୁଥିବା ସମୟରେ କରଞ୍ଜିଆରୁ ପାଟଣା ପଟକୁ ଆସୁଥିବା ଏକ ଇଣ୍ଡିକା କାର ମହିଳାଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ମହିଳାଙ୍କ ମୃତ୍ୟୁ ଘଟିଥିଲା । ଗାଡି ଚାଳକ ଜଣକ ପାଟଣା ଥାନାରେ ଆତ୍ମସମର୍ପଣ କରିଥିବା ଜଣାପଡିଛି ।
ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଦୁର୍ଘଟଣା ଫଳରେ ଉକ୍ତ ରାସ୍ତାକୁ ଗ୍ରାମବାସୀ କିଛି ସମୟ ଅବରୋଧ କରିଥିଲେ ହେଁ ପୋଲିସ ବୁଝାସୁଝା ପରେ ଅବରୋଧ ହଟିଥିଲା ।
କେନ୍ଦୁଝରରୁ ସନ୍ତୋଷ କୁମାର ପାତ୍ର, ଇଟିଭି ଭାରତ
