କେନ୍ଦୁଝର: ଘଟଗାଁ ଥାନା ଅନ୍ତର୍ଗତ ଛୋଟରାୟପୁର ଠାରେ ଶିକ୍ଷକ ମାନଙ୍କୁ ଲୁଟ ମାମଲାରେ ପୋଲିସ ଦୁଇ ଜଣଙ୍କୁ ଗିରଫ କରିଛି । ଗିରଫ ହୋଇଥିବା ଦୁଇ ଜଣ ପୁଛୁଳାବେଡା ଗ୍ରାମର ବସନ୍ତ ନାଏକ ଓ ଦୁଷ୍ମ୍ମନ୍ତ ମହାକୁଡ ବୋଲି ଜଣାପଡିଛି । ସେମାନଙ୍କ ଠାରୁ ଗୋଟିଏ ଦେଶୀ ବନ୍ଧୁକ, ୫ ରାଉଣ୍ଡ ଗୁଳି, ୨ଟି ମୋବାଇଲ ଓ ୩ଟି ବାଇକ ପୋଲିସ ଜବତ କରିଛି । ଏହି ଘଟଣାରେ ସଂପୃକ୍ତ ଥିବା ଅନ୍ୟ ୪ ଜଣ ଏବେ ବି ଫେରାର ଅଛନ୍ତି । ତେବେ ସେମାନଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି ।
ସୂଚନାଯୋଗ୍ୟ, ହରିଚନ୍ଦନପୁର ବ୍ଲକର ବିଭିନ୍ନ ସ୍ଥାନରେ ଚାକିରି କରୁଥିବା ୪ ଜଣ ଶିକ୍ଷକ ସ୍କୁଲ ଛୁଟି ପରେ ଘରକୁ ଯାଉଥିଲେ । ଛୋଟରାୟପୁରଠାରେ ୬ ଜଣ ଦୁର୍ବୃତ୍ତ ୩ଟି ବାଇକରେ ଆସି ବନ୍ଧୁକ ଓ ମାରଣାସ୍ତ୍ର ଦେଖାଇ ସେମାନଙ୍କ ଠାରୁ ଲୁଟ କରିଥିଲେ । ଲୁଟେରା ମାନେ ଗୋଟିଏ ବାଇକ, ଜରୁରୀ କାଗଜପତ୍ର ଥିବା ୩ଟି ବ୍ୟାଗ, ୨ଟି ମୋବାଇଲ ଓ ଟଙ୍କା ଲୁଟ କରି ଫେରାର ହୋଇଯାଇଥିଲେ । ଏନେଇ ଶିକ୍ଷକଙ୍କ ପକ୍ଷରୁ ଘଟଗାଁ ଥାନାରେ ଅଭିଯୋଗ କରାଯାଇଥିଲା । ଏହାପରେ ପୋଲିସ ଘଟଗାଁ ଥାନା ଅଧୀନରେ ଥିବା ପୁଛୁଳାବେଡା ଗ୍ରାମରେ ଚଢାଉ କରିଥିଲା । ସେଠାରୁ ବସନ୍ତ ନାଏକ ଓ ଦୁଷ୍ମ୍ମନ୍ତ ମହାକୁଡକୁ ଗିରଫ କରାଯାଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
