ଆନନ୍ଦପୁର:କେନ୍ଦୁଝର ଜିଲ୍ଲା ଘସିପୁରା ବ୍ଲକ ମଙ୍ଗଳପୁର ଗାଁର ବିଭୂପ୍ରସାଦ । ଭଲ ପାଠ ପଢୁଥିଲେ । ଆଶା ଥିଲା ଚାକିରି କରି ପରିବାରର ଦୁଃଖ ଦୂର କରିବେ, ହେଲେ ଦଇବ ଦାଉ ସାଜିଲା । ଦଶମ ଶ୍ରେଣୀରେ ପଢିବା ବେଳେ ଆଖି ଖରାପ ହୋଇଗଲା । ଏବେ ନଅ ବର୍ଷ ଧରି ନିଜ ଦୃଷ୍ଟିଶକ୍ତି ଫେରି ପାଇବାକୁ ବିଭୂ ସଂଘର୍ଷ କରୁଛନ୍ତି । ପୁଅର ଚିକିତ୍ସା ପାଇଁ ଗରିବ ବାପାମାଆଙ୍କ ପାଖରେ ସମ୍ବଳ ନ ଥିବା ବେଳେ ଏବେ କେବଳ ସରକାରୀ ସହାୟତା ହିଁ ଏକମାତ୍ର ଭରସା ପାଲଟିଛି ।
ଦୃଷ୍ଟିଶକ୍ତି ଫେରି ପାଇବାକୁ ନଅ ବର୍ଷର ସଂଘର୍ଷ
ପୁଅ ବିଭୂପ୍ରସାଦଙ୍କର ଦୃଷ୍ଟିଶକ୍ତିକୁ ନେଇ ଚିନ୍ତାରେ ପଡିଛନ୍ତି ତାଙ୍କ ପରିବାର । ପଢିବା ଠାରୁ ଆରମ୍ଭ କରି ପ୍ରତ୍ୟେକ କାମ ପାଇଁ ବିଭୂ ଏବେ ଅନ୍ୟର ସାହାରା ଲୋଡୁଛନ୍ତି । ଦୃଷ୍ଟିଶକ୍ତି କ୍ଷୀଣ ହେବା ସହ ତାଙ୍କର ଭବିଷ୍ୟତ ମଧ୍ୟ ଅନ୍ଧାରକୁ ଠେଲି ହୋଇଯାଇଛି । ପାଠ ପଢି ଭବିଷ୍ୟତରେ ଭଲ ଚାକିରି କରିବାକୁ ଲକ୍ଷ୍ୟ ରଖିଥିବା ବିଭୂ ଏବେ ଦୁଃଶ୍ଚନ୍ତା ଭିତରେ ଜୀବନ ବିତାଉଛନ୍ତି ।
