କେନ୍ଦୁଝର: ସରକାର ପିଲାଙ୍କ ପାଠପଢା ପାଇଁ ଉତ୍ତର ଓଡ଼ିଶା ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସ ଖୋଲିଦେଲେ । ହେଲେ ଯାତାୟାତ ପାଇଁ ଭଲ ରାସ୍ତା ଦେବାକୁ ଭୁଲି ଗଲେ । କାଦୁଅ ପଚ ପଚ ରାସ୍ତାରେ ପ୍ରତିଦିନ ଯିବା ଆସିବା ମୁସ୍କଲ ହେବାରୁ ଆଜି ବାଧ୍ୟ ହୋଇ ରାସ୍ତାରୋକ କରିଛନ୍ତି ଛାତ୍ରଛାତ୍ରୀ ।
କେନ୍ଦୁଝର ପୁରୁଣା ସହରରେ ଥିବା ଉତ୍ତର ଓଡ଼ିଶାର ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସର ଛାତ୍ରଛାତ୍ରୀ ଆଜି କ୍ୟାମ୍ପସକୁ ଭଲ ରାସ୍ତା ଦାବି ଜଣାଇ ରାସ୍ତାରୋକ କରିଛନ୍ତି । ଏଥିସହ କଲେଜରେ ବିଜ୍ଞାନ ଛାତ୍ରଛାତ୍ରୀଙ୍କ ପାଇଁ ଲାବ୍ରୋଟୋରୀ ନଥିବାର ଅଭିଯୋଗ ମଧ୍ୟ କରିଛନ୍ତି । ସେପଟେ, ଯେଉଁ ରାସ୍ତା ଦେଇ କଲେଜ ଛାତ୍ରଛାତ୍ରୀ କ୍ୟାମ୍ପସ ଯାଉଛନ୍ତି ସେହି ରାସ୍ତା ଏକ ଘରୋଇ ଜମି । ତେଣୁ ଉକ୍ତ ମାଲିକ ନିଜ ଗୃହ ନିର୍ମାଣ ପାଇଁ ରାସ୍ତା ଉପରେ ମାଟି ପକାଇ ଅବରୋଧ କରିଛନ୍ତି ।
ଏନେଇ କ୍ୟାମ୍ପସର କର୍ତ୍ତୃପକ୍ଷଙ୍କୁ ପଚାରିବାରୁ ଏହାର ସମାଧାନ ପାଇଁ ପ୍ରଚେଷ୍ଟା ଚାଲିଛି । ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇ ଦିଆଯାଇଛି । ଯଥାଶୀଘ୍ର ସମାଧାନ ହୋଇଯିବ ବୋଲି କହିବାରୁ ରାସ୍ତାରୋକ ହଟିଥିଲା । ସୂଚନାଯୋଗ୍ୟ, ରାସ୍ତା ଖରାପ ପାଇଁ ଆଜି କ୍ୟାଟ ପରୀକ୍ଷା ବାତିଲ ହୋଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
