କେନ୍ଦୁଝର: ତେଲକୋଇ ଅଞ୍ଚଳରେ ଦେଖିବାକୁ ମିଳିଛି ସ୍ବାସ୍ଥ୍ୟସେବାର ବିକଳ ଚିତ୍ର । ଶିବନାରାୟଣପୁର ଗୋଡା ପଞ୍ଚାୟତ ତମାଙ୍ଗ ଗାଁରେ ଜଣେ ଗର୍ଭବତୀ ଭାରରେ ବୁହା ହେଉଥିବା ଦେଖିବାକୁ ମିଳିଛି ।
ସୂଚନା ଅନୁସାରେ, ଗାଁର ଜଗା ଦେହୁରୀଙ୍କ ପତ୍ନୀ ନନ୍ଦିନୀ ଦେହୁରୀଙ୍କ ପ୍ରସବ ବେଦନା ହୋଇଥିଲା । ଏହି ସମୟରେ କେହି ଘରେ ନଥିବାରୁ ସେହିପରି ଯନ୍ତ୍ରଣା ଅନୁଭବ କରିଥିଲେ ଗର୍ଭବତୀ । ସେପଟେ ଦୁର୍ଗମ ଅଞ୍ଚଳ ହୋଇଥିବାରୁ ତାଙ୍କ ନିକଟରେ ଆମ୍ବୁଲାନ୍ସ ପହଞ୍ଚି ପାରିନଥିଲା ।
ପରେ ଗାଁ ଲୋକେ ପାଖାପାଖି 4 କିଲୋମିଟର ପାହାଡତଳ ଗାଁ ହଳଦୀପାଣି ନିକଟକୁ ଭାରରେ ଆଣିବା ପରେ ସେଠାରୁ ତାଙ୍କୁ ଆମ୍ବୁଲାନ୍ସ ଯୋଗେ ଡାକ୍ତରଖାନାକୁ ଅଣାଯାଇଥିଲା । ତେବେ ସେଠାରେ ଗର୍ଭବତୀ ଜଣକ ଗୋଟିଏ ମୃତ ଶିଶୁକୁ ଜନ୍ମ ଦେଇଥିଲେ ।
ଅନ୍ୟପଟେ ଦୁର୍ଗମ ଅଞ୍ଚଳର ଗର୍ଭବତୀ ମହିଳାଙ୍କୁ ସୁରକ୍ଷିତ ମାତୃତ୍ବ ପାଇଁ ମା ଗୃହରେ ରଖିବାର ବ୍ୟବସ୍ଥା ରହିଛି । ହେଲେ ମହିଳା ଜଣଙ୍କୁ କାହିଁକି ଏଥିରେ ସାମିଲ କରାଯାଇନାହିଁ ବୋଲି ପ୍ରଶ୍ନ ଉଠୁଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
