ଆନନ୍ଦପୁର: ତୁଳସୀ ଦୁଇ ପତ୍ରରୁ ବାସିବା ପରି ଛୋଟ ବେଳୁ ଥିଲା ଜନସେବା କାମ ଏବଂ ଗ୍ରାମର ବିଭିନ୍ନ ସମସ୍ୟା ପାଇଁ ପଦକ୍ଷେପ ନେବା । ଆଉ ସେହି ସ୍ବପ୍ନ ସେହି ସଂକଳ୍ପ ଆଜି ପୁରା ହୋଇଛି। ଛୋଟବେଳୁ ଭଲ ପଢିବା ସହ ଟାଟା କମ୍ପାନୀରେ ଚାକିରୀ ବି ମିଳିଥିଲା । ଦରମା ବି ଭଲ ମିଳୁଥିଲା, ହେଲେ ଆତ୍ମସନ୍ତୋଷ ନମିଳିବାରୁ ଚାକିରୀ ଛାଡି ଚାଲିଆସିଥିଲେ ଗାଁ କୁ । ଆଉ ଘରେ ରହି ଓଏଏସ ପାଇଁ ପ୍ରସ୍ତୁତ ହୋଇଥିଲେ । କେବଳ ସେତିକି ନୁହେଁ ପ୍ରଥମ ଥରରେ ହିଁ ସଫଳତା ପାଇଁ ଏବେ ସେ ଚର୍ଚ୍ଚାରେ । ଆସନ୍ତୁ ଦେଖିବା କେନ୍ଦୁଝର ଜିଲ୍ଲା ହାଟଡିହି ବ୍ଲକ ବେରୁଣପଦୀ ଗ୍ରାମର ଅପୂର୍ବ ରଞ୍ଜନ ଆଇଚଙ୍କ ସଫଳତାର କାହାଣୀ।
କେନ୍ଦୁଝର ଜିଲ୍ଲା ହାଟଡିହି ବ୍ଲକ ବେରୁଣପଦୀ ଗ୍ରାମର ଅପୂର୍ବ ରଞ୍ଜନ ଆଇଚ। ବାପା ଶୁଭେନ୍ଦୁ କୁମାର ଜଣେ ଚାଷୀ । ଦୁଇ ଭାଇ ଭଉଣୀଙ୍କ ସହ ବାପା ମା ଏବଂ ୯୫ ବର୍ଷିୟ ବୁଢ଼ୀ ମାଙ୍କୁ ନେଇ ତାଙ୍କର ମଧ୍ୟବିତ୍ତ ପରିବାର। ବାପାଙ୍କୁ ଚାଷ କାମରେ ଦୁଇ ଭାଇ ମଧ୍ୟ ତାଙ୍କୁ ସାହାଯ୍ୟ କରିଥାନ୍ତି । ଖାଲି ଏତିକି ନୁହେଁ ଅପୂର୍ବ ରଞ୍ଜନ ପିଲାଟି ବେଳୁ ଜଣେ ମେଧାବୀ ଛାତ୍ର ଥିଲେ । ଟାଟା କମ୍ପାନୀରେ ଚାକିରୀ ପାଇଥିଲେ । ହେଲେ ଲୋକଙ୍କ ସେବା କରିବା ନିଶା ତାଙ୍କୁ ବେଶି ଦିନ ବାନ୍ଧି ପାରିନଥିଲା । ଯାହା ଫଳରେ ଚାକିରୀ ଛାଡି ଗାଁ ରେ ରହି ଓଏଏସ ପାଇଁ ପ୍ରସ୍ତୁତ ହୋଇଥିଲେ। ଆଉ ପ୍ରଥମ ଥରରେ କୃତକାର୍ଯ୍ୟ ହୋଇ ଗାଁକୁ ଗୌରବ ଆଣିଛନ୍ତି ଅପୂର୍ବ ।
ବହୁ ବାଧାବିଘ୍ନ ସାମ୍ନା କରିଛନ୍ତି ଅପୂର୍ବ । ଗାଁ କୁ ଖବର କାଗଜ ଆସେ ନାହିଁ ଯାହାଫଳରେ ସେହି ଦିନ ଖବର କାଗଜ ପଢିବା ପାଇଁ ଯିବାକୁ ପଡେ ୧୦ କଲୋମିଟର। ହେଲେ ଦୃଢ଼ ଇଚ୍ଛାଶକ୍ତି ବଳରେ ଆଜି ସଫଳତା ପାଇଛନ୍ତି ଅପୂର୍ବ। ଦିନକୁ ୮ ରୁ ୧୦ ଘଣ୍ଟା ପାଠ ପଢି ସଫଳତା ମିଳିବା ସହ ତାଙ୍କ ଉପରେ ବାପା ମାଆ ଓ ଭଗବାନଙ୍କ ଆଶୀର୍ବାଦ ରହିଛି ଓ ଲୋକଙ୍କ ସେବା ସେବା ପାଇଁ ସଦାସର୍ବଦା ଚେଷ୍ଟିତ ବୋଲି ଅପୂର୍ବଙ୍କ ବାପା ମାଆ କହିଛନ୍ତି ।
ଚାକିରୀ ଆଗରେ ଫିକା ପଡିଲା ଲୋକଙ୍କ ସେବାର ଝୁଙ୍କ ମନୋବଳ । ଦୃଢ଼ ଇଚ୍ଛାଶକ୍ତି ଏବଂ ଏକାଗ୍ରତା ଥିଲେ ନିଶ୍ଚୟ ଭାବେ ସଫଳତା ମିଳିବ ବୋଲି ପ୍ରମାଣ କରି ଦେଖାଇଛନ୍ତି ଅପୂର୍ବ ରଞ୍ଜନ।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
