କେନ୍ଦୁଝର: ପୁଣି ଗୁରୁ ଶିଷ୍ୟ ପବିତ୍ର ସମ୍ପର୍କରେ ଲାଗିଲା କଳଙ୍କ। ଯୋଡା ବ୍ଳକ ବେଲଦା ଉଚ୍ଚ ପ୍ରାଥମିକ ବିଦ୍ୟାଳୟରେ ଘଟିଛି ଏପରି ଘଟଣା । ସ୍କୁଲର ପ୍ରଧାନ ଶିକ୍ଷକ ବାଣେଶ୍ଵର ପାତ୍ର ବିଭିନ୍ନ ସମୟରେ ମଦ୍ୟପାନ କରି ପଞ୍ଚମ ଶ୍ରେଣୀ ଛାତ୍ରୀଙ୍କୁ ଅସଭ୍ୟ ଭାଷାରେ ଗାଳି ଗୁଲଜ କରନ୍ତି । ଖାଲି ସେତିକି ନୁହେଁ ତାଙ୍କୁ ସ୍କୁଲ ଓ ହଷ୍ଟେଲ କ୍ୟାମ୍ପସରେ ଶ୍ରମିକ ମାନଙ୍କ ଭଳି କାମ ମଧ୍ୟ କରାନ୍ତି । ଗତ ଶନିବାର ରାତିରେ ପ୍ରଧାନ ଶିକ୍ଷକ ମଦ୍ୟପାନ କରି ହଷ୍ଟେଲରେ ପସି ଝିଅମାନଙ୍କୁ ଟଣାଓଟରା କରିଥିବା ଅଭିଯୋଗ ହୋଇଥିଲା ।
ଯାହାକୁ ମୁଣ୍ଡ ପାତି ସହିଯାଇଥିଲେ ପିଲାମାନେ । ହେଲେ ଶୁକ୍ରବାର ସଂଧ୍ୟାରେ ଶିକ୍ଷକ ଜଣଙ୍କ ମାତାଲ ଅବସ୍ଥାରେ ଛାତ୍ରୀଙ୍କୁ ପାଟିତୁଣ୍ଡ କରିବା ସହ ଖାଇ ସାରି ରୁମକୁ ଆସିବାକୁ କହିଥିଲେ । ଯାହା ଶୁଣି ପିଲାମାନେ ଡରି ଯାଇଥିଲେ । ଅନ୍ଧାର ହେବାରୁ ୧୫ ଜଣ ଝିଅ ଭୟରେ ହଷ୍ଟେଲ ଛାଡ଼ି ପାଖରେ ଥିବା ଜଣେ ଅଭିଭାବକଙ୍କ ଘରକୁ ଯାଇଥିଲେ ।
ଅଭିଭାବକ ଜଣଙ୍କ ସ୍କୁଲର ଅନ୍ୟ ଶିକ୍ଷକଙ୍କୁ ଜଣାଇବା ସହ ପୋଲିସକୁ ଜଣାଇଥିଲେ । ରାତିରେ ପୋଲିସ ଘଟଣାସ୍ଥଳରେ ପହଞ୍ଚି ପ୍ରଧାନ ଶିକ୍ଷକଙ୍କୁ ଅଟକ ରଖିବା ସହ ଅନ୍ୟ ମହିଳା ଶିକ୍ଷୟିତ୍ରୀଙ୍କୁ ପିଲାଙ୍କୁ ହସ୍ତାନ୍ତର କରିଥିଲେ। ପରବର୍ତ୍ତୀ ସମୟରେ ପ୍ରଧାନ ଶିକ୍ଷକଙ୍କୁ ନିଲମ୍ବନ କରାଯାଇଥିବା ଜଣାପଡିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
