ଖୋର୍ଦ୍ଧା: ହାତୀ ନେଲା ଜୀବନ । ଦନ୍ତା ଆକ୍ରମଣରେ ପୁଅର ମୃତ୍ୟୁ ହୋଇଥିବା ବେଳେ ମାଆ ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଏଭଳି ଏକ ଦୁଃଖଦାୟକ ଘଟଣା ଘଟିଛି ଖୋର୍ଦ୍ଧା ବନାଞ୍ଚଳ ନନ୍ଦପୁର ପଞ୍ଚାୟତ ଅଣ୍ଡା ନିକଟ ମହତପଡାରେ । ଅନ୍ୟପଟେ ଖବର ପାଇ ଘଟଣାସ୍ଥଳରେ ବନବିଭାଗର ଟିମ ପହଞ୍ଚି ତଦନ୍ତ ଆରମ୍ଭ କରିଛି ।
ହାତୀ ଆକ୍ରମଣରେ ପୁଅ ମୃତ, ମାଆ ଗୁରୁତର:
ସୂଚନା ଅନୁଯାୟୀ, ଆଜି (ସୋମବାର) ସକାଳ ସମୟରେ ଖୋର୍ଦ୍ଧା ବନାଞ୍ଚଳ ନନ୍ଦପୁର ପଞ୍ଚାୟତ ଅଣ୍ଡା ନିକଟ ମହତପଡାର ସୁରେନ୍ଦ୍ର ମାର୍ଥାଙ୍କ ସ୍ତ୍ରୀ ସୁଲୋଚନା ମାର୍ଥା ଓ ତାଙ୍କ 14 ବର୍ଷୀୟ ପୁଅ ସତ୍ଯରଞ୍ଜନ ମାର୍ଥା ଶୌଚ ହେବାକୁ ଘର ବାରିପଟକୁ ଯାଇଥିଲେ । ଏହି ସମୟରେ ସେମାନଙ୍କୁ ହାତୀ ଆକ୍ରମଣ କରିଥିଲା । ଘଟଣାସ୍ଥଳରେ ପୁଅର ମୃତ୍ୟୁ ହୋଇଥିବା ବେଳେ ମାଆ ଗୁରୁତର ଆହତ ହୋଇଛନ୍ତି । ତାଙ୍କୁ ଭୁବନେଶ୍ବର ସ୍ଥାନାନ୍ତର କରାଯାଇଛି । ତେବେ ଭୋର ସମୟରେ ଅନ୍ଧାର ଥିବାରୁ ହାତୀକୁ ସେମାନେ ଦେଖିପାରି ନଥିଲେ ।
ଘଟଣାସ୍ଥଳରେ ବନ ବିଭାଗ ଟିମ୍:
ଅନ୍ୟପଟେ ଖବର ପାଇ ବନବିଭାଗର ଟିମ ପହଞ୍ଚି ତଦନ୍ତ ଆରମ୍ଭ କରିଛି । ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି । ତେବେ ଜଙ୍ଗଲ କ୍ଷୟ ହେଉଥିବାରୁ ଖାଦ୍ୟ ଅନ୍ବେଷଣରେ ଜନବସତି ମୁହାଁ ହେଉଛନ୍ତି ଜଙ୍ଗଲୀ ଜନ୍ତୁ । ଯେଉଁଥିପାଇଁ ବାରମ୍ବାର ଏଭଳି ଘଟଣା ଦେଖିବାକୁ ମିଳିଛି । ଗାଁ ସହରରେ ପଶି ଧନଜୀବନ କ୍ଷତି ଘଟାଉଛନ୍ତି ହାତୀ ।ବିଶେଷକରି ଖୋର୍ଦ୍ଧା ବନାଞ୍ଚଳରେ ହାତୀ ବିଭିନ୍ନ ସମୟରେ ଆତଙ୍କ ରଚୁଥିବା ନଜରକୁ ଆସୁଛି । ହାତୀ ମଣିଷ ଲଢେଇରେ କେତେବେଳେ ହାତୀ ତ ଆଉ କେତେବେଳେ ମଣିଷର ଜୀବନ ଯାଉଛି ।
ଗତ ଶନିବାର ଖୋର୍ଦ୍ଧା ବନାଞ୍ଚଳର ଡାଳତୋଳା ନିକଟ କାଣିବାରୀରେ ବିଦ୍ୟୁତ ଆଘାତରେ ଗୋଟିଏ ମାଈ ହାତୀର ମୃତ୍ୟୁ ହୋଇଥିବା ଖବର ସାମ୍ନାକୁ ଆସିଥିବା ବେଳେ ଆଜି ସକାଳୁ ହାତୀ ଆକ୍ରମଣରେ ମା ଗୁରୁତର ଆହତ ହୋଇଥିବା ବେଳେ ପୁଅର ମୃତ୍ୟୁ ହୋଇଛି ।
୨୦୨୪ରେ ଜିଲ୍ଲାରେ ୫ ହାତୀ ମୃତ:
ବିଦ୍ୟୁତ୍ ଆଘାତ ହେଉ ବା ବିଭିନ୍ନ କାରଣରୁ ଗତବର୍ଷ 5ଟି ହାତୀଙ୍କର ମୃତ୍ୟୁ ଘଟିଛି । ୨୦୨୪ରେ ଖୋର୍ଦ୍ଧାରେ ହାତୀ ଆକ୍ରମଣରେ 3 ଜୀବନ ଯାଇଥିବା ବେଳେ ବିଭିନ୍ନ କାରଣରୁ ୫ ହାତୀ ମରିଛନ୍ତି । ୨୦୨୪ ଫେବୃଆରୀ 2ରେ ବାଲୁଗାଁ ବନାଞ୍ଚଳରେ ଗୋଟିଏ ହାତୀର ମୃତଦେହ ଠାବ କରାଯାଇଥିଲା । ଅଗଷ୍ଟ 7ରେ ଟଙ୍ଗା ବନାଞ୍ଚଳ ଜମଣଭୂମି ଗ୍ରାମରେ ବିଦ୍ୟୁତ୍ ଆଘାତରେ ଏକ ଦନ୍ତାର ମୃତ୍ୟୁ ଘଟିଥିଲା । ସେହି ମାସ 30ରେ ଜଣ୍ଟାରିଝର ନିକଟରୁ ଆଉ ଏକ ଦନ୍ତାର ମୃତଦେହ ମିଳିଥିଲା । ସେହିଭଳି ଡିସେମ୍ବର 10ରେ ମୟୂରଝାଲିଆରେ ଏକ ହାତୀ ଛୁଆର ମୃତ୍ୟୁ ହୋଇଥିଲା । ସେହିପରି ଜୁନ୍ 25ରେ ଗଙ୍ଗା ବନାଞ୍ଚଳ ଓଳସିଂହ ଗ୍ରାମରେ ଆଦିବାସୀ ସାହିର ରୀନା ପାତ୍ର ଓ ତାଙ୍କର 5 ବର୍ଷ ପୁଅ ବିଶ୍ବଜିତ୍ରଙ୍କ ହାତୀ ଆକ୍ରମଣରେ ମୃତ୍ୟୁ ହୋଇଥିଲା । ହାତୀ ଆକ୍ରମଣରେ ଜଣେ ବ୍ୟକ୍ତିଙ୍କର ମଧ୍ୟ ମୃତ୍ୟୁ ଘଟିଛି ।
ଇଟିଭି ଭାରତ, ଖୋର୍ଦ୍ଧା
