କେନ୍ଦୁଝର: ନଦୀରେ ପଡି ଯୁବକ ମୃତ । କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅନ୍ତର୍ଗତ ଗରଗଡବାହାଳୀ ଗ୍ରାମ ନିକଟସ୍ଥ ପାଟହରାଠାରେ ମୂଷଳ ନଦୀର ଚେକଡ୍ୟାମରେ ଗୋଡ଼ ଖସିଯିବାରୁ ପାଣିରେ ପଡି ଯୁବକଙ୍କ ମୃତ୍ୟୁ ଘଟିଛି । ମୃତକ ଯୁବକ ଜଣଙ୍କ କେନ୍ଦୁଝର ଅଞ୍ଚଳର ଲିଟୁ ପାତ୍ର ବୋଲି ଜଣାପଡ଼ିଛି ।
ସୂଚନା ଅନୁଯାୟୀ, ଗତ ବୁଧବାର ସନ୍ଧ୍ୟାରେ ଲିଟୁ ଗରଗଡବାହାଳୀ ଗ୍ରାମର ପିଉସା ରୁଲେନ ପାତ୍ରଙ୍କ ଘରକୁ ବୁଲିବାକୁ ଆସିଥିଲେ । ଗୁରୁବାର ୧୨ଟା ସମୟରେ ଉକ୍ତ ଗ୍ରାମ ନିକଟସ୍ଥ ପାଟହରାକୁ ବୁଲିବାକୁ ଯାଇଥିଲେ । ବୁଲାବୁଲି କରୁଥିବା ସମୟରେ ମୂଷଳ ନଦୀର ଚେକଡ୍ୟାମରେ ଗୋଡ଼ ଖସିଯିବାରୁ ପାଣି ଭିତରେ ପଡି ବୁଡି ଯାଇଥିଲେ ।
ନିକଟସ୍ଥ ଲୋକମାନେ ପାଣିରେ ବୁଡିଯିବାର ଦେଖି ସଙ୍ଗେ ସଙ୍ଗେ ହରିଚନ୍ଦନପୁର ଅଗ୍ନିଶମ ବିଭାଗକୁ ଫୋନ୍ ଯୋଗେ ଜଣାଇଥିଲେ । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ଗୁରୁତର ଅବସ୍ଥାରେ ପାଣିରୁ ଉଦ୍ଧାର କରି ହରିଚନ୍ଦନପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
