ଭୁବନେଶ୍ବର: ଓଡିଶାରେ 2024 ଲୋକସଭା ଓ ବିଧାନସଭା ନିର୍ବାଚନରେ ବ୍ୟାପକ ଭୋଟ ଜାଲିଆତି ହୋଇଥିବା ଅଭିଯୋଗ। ଭୋଟ ଦାନ ସଂଖ୍ୟା ନେଇ ଦୁଇ ପ୍ରକାରର ତଥ୍ୟ ସାମ୍ନାକୁ ଆସିବାରେ ଲାଗିଛି । ପ୍ରିଜାଇଡିଂ ଅଫିସର ଓ ରିଟର୍ଣ୍ଣିଂ ଅଫିସରଙ୍କ ତଥ୍ୟରେ ତାଳମେଳ ନଥିବା ନିର୍ବାଚନର 6 ମାସ ପରେ ଅଭିଯୋଗ ଆଣିଛି ବିଜେଡି । ଏହାକୁ ନେଇ ସୋମବାର ଦିନ ବିଜେଡିର ଏକ ପ୍ରତିନିଧି ଦଳ ଜାତୀୟ ନିର୍ବାଚନ କମିଶନଙ୍କୁ ଭେଟିଛନ୍ତି ।
#WATCH | Biju Janata Dal (BJD) delegation arrives at the Election Commission Office in Delhi
— ANI (@ANI) December 23, 2024
As per BJD, they will submit a memorandum on variances in the votes cast in the 2024 Parliament and Assembly Elections in Odisha to the Election Commission of India today. pic.twitter.com/ArDnZG8KNT
ନିର୍ବାଚନ କମିଶନଙ୍କୁ ଭେଟିଲେ ବିଜେଡି ଉଚ୍ଚସ୍ତରୀୟ ପ୍ରତିନିଧି ଦଳ:
ବିଜେଡିର ଏକ ଉଚ୍ଚସ୍ତରୀୟ ପ୍ରତିନିଧି ଦଳ ସୋମବାର ଦିନ ଜାତୀୟ ନିର୍ବାଚନ କମିଶନଙ୍କୁ ଭେଟିଛନ୍ତି । ପୂର୍ବତନ ସାଂସଦ ଅମର ପଟ୍ଟନାୟକଙ୍କ ନେତୃତ୍ୱରେ ବିଜେଡି ପ୍ରତିନିଧି ଦଳରେ ସୁଲତା ଦେଓ, ସସ୍ମିତ ପାତ୍ର, ଶୁଭାଶିଷ ଖୁଣ୍ଟିଆ, ମାନସ ରଞ୍ଜନ ମଙ୍ଗରାଜ, ଦେବାଶିଷ ସାମନ୍ତରାୟ, ମୁନ୍ନା ଖାଁ, ନିରଞ୍ଜନ ବିଶି ପ୍ରମୁଖ ନିର୍ବାଚନ ଆୟୋଗଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି । ନିର୍ବାଚନ ମଣ୍ଡଳିୱାରୀ ତଥ୍ୟରେ ତାଳମେଳ ନଥିବା ତଥ୍ୟ ବିଜେଡି ପ୍ରତିନିଧି ଦଳ ନିର୍ବାଚନ କମିଶନଙ୍କ ନିକଟରେ ଦାଖଲ କରିଛନ୍ତି । ଭୋଟ ଗ୍ରହଣ ସମୟ ପରେ ମଧ୍ୟ ଇଭିଏମରେ ଭୋଟ ପଡିଥିବା ଅଭିଯୋଗ କରିଛି ଦଳ । ଭୋଟର ସଂଖ୍ୟା ଓ ଭୋଟ ହାରକୁ ନେଇ ଏଡିଆର ରିପୋର୍ଟରେ ମଧ୍ୟ ପ୍ରଶ୍ନ ଉଠିଥିଲା ।
ପ୍ରିଜାଇଡିଂ ଅଫିସର ଓ ରିଟର୍ଣ୍ଣିଂ ଅଫିସରଙ୍କ ତଥ୍ୟରେ ତାଳମେଳ ନାହିଁ:
ବିଜେଡି ନେତା ଅମର ପଟ୍ଟନାୟକ କହିଛନ୍ତି, "ବିଜେଡି ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଆମେ ଜାତୀୟ ନିର୍ବାଚନ ଆୟୋଗଙ୍କୁ ଭେଟି ଏକ ଦାବିପତ୍ର ଦେଇଛୁ । ଓଡିଶା ଓ ଆନ୍ଧ୍ରପ୍ରଦେଶରେ ଉଭୟ ବିଧାନସଭା ଓ ଲୋକସଭା ନିର୍ବାଚନ ଏକ ସମୟରେ ହୋଇଥିଲା । ନିର୍ବାଚନ ପରେ ଦଳ ଭୋଟିଂର ତରିକା ନେଇ ରିସର୍ଚ୍ଚ କରିଛି । ମୋଟ ଭୋଟ ଓ ଉକ୍ତ ଇଭିଏମରେ ଗଣିତ ଭୋଟରେ ଅସଙ୍ଗତି ଥିବା ଆମ ନଜରକୁ ଆସିଛି । ଫର୍ମ 17(C) ଯାହା ଭୋଟ ସମୟରେ ଫିଲଅପ ହୁଏ । ପ୍ରିଜାଇଡିଂ ଅଫିସର ଏହାକୁ କରନ୍ତି । ଫର୍ମ 20 ରିଟର୍ଣ୍ଣିଂ ଅଫିସର ଭୋଟ ଗଣତିରେ ଦିଅନ୍ତି । ଉଭୟ ତଥ୍ୟରେ ତାଳମେଳ ନଥିବା ଜାଣିବାକୁ ପାଇଛୁ ।"
ସେହିପରି ସେ ଆହୁରି ମଧ୍ୟ କହିଛନ୍ତି, "ଭୋଟିଂ ଦିନ ରାଜ୍ୟ ନିର୍ବାଚନ ଅଧିକାରୀଙ୍କ ପକ୍ଷରୁ ଏକ ତଥ୍ୟ ଦିଆଯାଏ । ଏହାର ଦୁଇ ଦିନ ପରେ ନିର୍ବାଚନ ଆୟୋଗ ଚୂଡାନ୍ତ ତଥ୍ୟ ପ୍ରଦାନ କରନ୍ତି । 2004ରୁ ଓଡିଶାରେ ଏକକ ନିର୍ବାଚନ ହୋଇ ଆସୁଛି । ଭୋଟ ପୋଲିଂ ଓ ଭୋଟ ଗଣତି ମଧ୍ୟରେ ସର୍ବାଧିକ 2 ପ୍ରତିଶତ ବ୍ୟବଧାନ ରହୁଥିଲା । କିନ୍ତୁ ଚଳିତ ଥର ପ୍ରାୟ 30 ପ୍ରତିଶତ ରହିଛି । ଯାହା ଓଡ଼ିଶା ନିର୍ବାଚନ ଇତିହାସର ପ୍ରଥମ । ଓଡ଼ିଶାର 147ରୁ 50 ନିର୍ବାଚନ ମଣ୍ଡଳୀରେ 15ରୁ 30 ପ୍ରତିଶତ ବ୍ୟବଧାନ ରହିଛି । ସେହିପରି 38 ନିର୍ବାଚନ ମଣ୍ଡଳୀରେ 15ରୁ 20 ପ୍ରତିଶତ ବ୍ୟବଧାନ ହୋଇଛି । 10 ନିର୍ବାଚନ ମଣ୍ଡଳୀରେ 20ରୁ 25 ପ୍ରତିଶତ ମତଦାନ ହୋଇଛି । କଣ୍ଟାମାଳ ଓ କେନ୍ଦୁଝରରେ ବ୍ୟବଧାନ ସର୍ବାଧିକ ରହିଛି । କଣ୍ଟାମାଳରେ 28. 69 ପ୍ରତିଶତ ବ୍ୟବଧାନ ଥିବାବେଳେ କେନ୍ଦୁଝରରେ ଏହା 30.64 ପ୍ରତିଶତ ।"
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ କେନ୍ଦୁଝର ନିର୍ବାଚନ କ୍ଷେତ୍ରରେ ଭୋଟ ବ୍ୟବଧାନକୁ ନେଇ ପ୍ରଶ୍ନ ଉଠାଇଛନ୍ତି ଅମର । ନିର୍ବାଚନ ପ୍ରକ୍ରିୟା ଉପରେ ବିଜେଡି ସନ୍ଦେହ ସୃଷ୍ଟି କରିବା ସହ ତଦନ୍ତ କାରିବାକୁ ନିର୍ବାଚନ ଆୟୋଗ ନିକଟରେ ଦାବି କରାଯାଇଛି । ନିର୍ବାଚନ ଆୟୋଗ ଏହା ଉପରେ ସ୍ପଷ୍ଟୀକରଣ ରଖିଲେ, ନିର୍ବାଚନ ପ୍ରକ୍ରିୟା ବିଶ୍ଵାସ ଭାଜନ ହୋଇପାରିବ ବୋଲି ଦଳ ଦାବି କରିଛି ।
ଇଟିଭି ଭାରତ, ଭୁବନେଶ୍ବର
