ଆନନ୍ଦପୁର: ସୋମବାର ସନ୍ଧ୍ୟାରେ ଆନନ୍ଦପୁର ଉପଖଣ୍ଡ ଅଞ୍ଚଳରେ ପ୍ରଚଣ୍ଡ ବଜ୍ରପାତ ଯୋଗୁଁ ଜଣେ ୪ ବର୍ଷ ନାବାଳକର ମୃତ୍ୟୁ ଘଟିଛି । ସେହିପରି ଅନ୍ୟଜଣେ ଯୁବତୀ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ପାଖାପଖି ସନ୍ଧ୍ୟା ୫ଟାରେ ଆନନ୍ଦପୁର ଉପଖଣ୍ଡ ଅଞ୍ଚଳରେ ତୁହାକୁତୁହା ବଜ୍ରପାତ ହୋଇଥିଲା ।
ଏହି ସମୟରେ ଆନନ୍ଦପୁର ଥାନା ମୁଗୁପୁର ଗାଁର ସତ୍ୟ ଜେନାଙ୍କ ୪ ବର୍ଷର ପୁଅ ସୁବ୍ରତ ଘର ବାରଣ୍ଡାରେ ଖେଳୁଥିଲା। ବଜ୍ରାଘାତ ଲାଗିବାରୁ ଶିଶୁଟି ସେହିଠାରେ ଟଳିପଡିଥିଲା । ପରିବାର ଲୋକେ ତାକୁ ତୁରନ୍ତ ଆନନ୍ଦପୁର ଡାକ୍ତରଖାନା ନେଇଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଅନ୍ୟପଟେ ବିରିଡିହା ଗାଁର ପ୍ରଫୁଲ୍ଲ ପ୍ରଧାନଙ୍କ ଝିଅ ରିତାରାଣୀ ବଜ୍ରପାତ ସମୟରେ ଘର କବାଟ ନିକଟରେ ବସି ଖାଉଥିଲେ। କବାଟ ଖୋଲାଥିବା ଯୋଗୁ ବଜ୍ରାଘାତରେ ସେ ଗୁରୁତର ହୋଇଛନ୍ତି । ତାଙ୍କୁ ଆମ୍ବୁଲାନ୍ସ ଯୋଗେ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଛି ।
ଆନନ୍ଦପୁରରୁ ସ୍ମୁତି ରଞ୍ଜନ ବିହାରୀ, ଇଟିଭି ଭାରତ
