ଆନନ୍ଦପୁର: ଦୁଃଖ କେତେବେଳେ କେମିତି ଆସିବ ତାହା କହିବା ଅସମ୍ଭବ । ଯେମିତି କେନ୍ଦୁଝର ଜିଲ୍ଲା ଆନନ୍ଦପୁରର ପଦ୍ମପୁର ଗ୍ରାମର ଦିଲ୍ଲୀପ ସାମଲ ଙ୍କ କ୍ଷେତ୍ରରେ ଏବେ ଦୁଃଖର ପାହାଡ ଛିଡା ହୋଇଛି । ଦିଲ୍ଲୀପ ସାମଲ ହେଉଛନ୍ତି ଜଣେ ଅଭାବୀ ଚାଷୀ । ନିଜ ପାଞ୍ଚ ପ୍ରାଣୀ ପରିବାକୁ ନେଇ ଯେମିତି ସେମିତି ଚଳିଯାଉଥିଲେ । ହେଲେ ହଠାତ ପରିବାର ପଡିଲା ବିଧାତାଙ୍କ କୋପ ଦୃଷ୍ଟି । ଦିଲ୍ଲୀପଙ୍କ ଝିଅ ନିତିଦିନ ସ୍କୁଲ ଯିବାଆସିବା କରିବା ସହ ଭଲ ପାଠ ମଧ୍ୟ ପଢୁଥିଲେ ।
ହେଲେ କେବେ କିଛି ସମସ୍ୟା ନଥିବା ଝିଅ ବିଭାବରିର ଆଖି ବନ୍ଦ ହୋଇଗଲା । ଏଥିରେ ବିଚଳିତ ହୋଇ ପରିବାର ଲୋକେ ସ୍ଥାନୀୟ ଡାକ୍ତର ଖାନାରେ ଚିକିତ୍ସା କଲେ ହେଲେ ଫଳ କିଛି ମିଳିଲା ନାହିଁ । ପରେ ଭୁବନେଶ୍ବରର ଏକ ଘରୋଇ ମେଡିକାଲରେ ଚିକିତ୍ସା ପାଇଁ ଆସିଲେ । ସେଠି ମଧ୍ୟ ନିରାଶ ହେଲେ ଦିଲ୍ଲୀପ । ପୁଣି କିଛି ଲୋକଙ୍କ ପରାମର୍ଶରେ ଭୁବନେଶ୍ବର ଏମ୍ସକୁ ଆସି ଡାକ୍ତରଙ୍କ ପରାମର୍ଶ ନେଲେ । ସମସ୍ତ ପରୀକ୍ଷା ନିରୀକ୍ଷା ପରେ ଏହା ଏକ ବିରଳ ରୋଗ ବୋଲି ଡାକ୍ତର କହିବା ସହ ଅପରେସନ ପାଇଁ ଅଢେଇ ଲକ୍ଷ ଟଙ୍କା ଆବଶ୍ୟକ ବୋଲି କହିଲେ । ଗରୀବ ଦିଲ୍ଲୀପ ଏଥିରେ ଭାଙ୍ଗିପଡିଲେ । ଯଦିଓ ଏହା ପୂର୍ବରୁ ଆନନ୍ଦପୁର ପ୍ରଶାସନ 30 ହଜାର ଟଙ୍କା ସହାୟତା ଦେଇଥିଲେ । ଏହାସହ ଦିଲ୍ଲୀପଙ୍କ ଝିଅ ପଢୁଥିବା ସ୍କୁଲର ଶିକ୍ଷକ ଓ ଛାତ୍ରଛାତ୍ରୀ ମଧ୍ୟ ସଂଗ୍ରହ କରି 30 ହଜାର ଟଙ୍କା ସହାୟତା ଦେଇଥିଲେ । ଏହି ଟଙ୍କା ସବୁ ଭୁବନେଶ୍ବର ଯିବା ଆସିବା ଓ ଚିକିତ୍ସା କରିବାରେ ଖର୍ଚ୍ଚ ହୋଇଯାଇଛି । ଏବେ ଅପରେସନ ପାଇଁ ଟଙ୍କା ନାହିଁ । ଫଳରେ ନିଜ ଅଳିଅଳି ଝିଅର ଏମିତି ଅବସ୍ଥାରେ ଚିକିତ୍ସା କରି ନପାରି ବାପା ମା ଭାଙ୍ଗି ପଡିଛନ୍ତି ।
କେମିତି ଝିଅର ଚିକିତ୍ସା କରିବେ ସେଇ ଚିନ୍ତାରେ ଦିନ କାଟୁଛନ୍ତି । ଯଦି ରାଜ୍ୟ ସରକାର ଝିଅର ଚିକିତ୍ସା ପାଇଁ ସହାୟତା ଯୋଗାଇ ଦେବେ ତେବେ ନିଜ ଝିଅ ପୁଣିଥରେ ନିଜ ଦୁନିଆ ଦେଖିପାରିବ ବୋଲି କହିଛନ୍ତି ଝିଅର ବାପା ଦିଲ୍ଲୀପ ସାମଲ । ତେବେ ଦେଖିବାର କଥା ସରକାର କେବେ ଚିକିତ୍ସା ପାଇଁ ସହାୟତା ଯୋଗାଇଦେଉଛନ୍ତି ।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
