କେନ୍ଦୁଝର: ଦିନକୁ ଦିନ ବଢିଚାଲିଛି କେନ୍ଦୁଝର ପୋଲିସର ଦବଙ୍ଗଗିରି । ଭାଇରଲ ଭିଡ଼ିଓ ବିବାଦ ପିଚ୍ଛା ଛାଡୁନାହିଁ କେନ୍ଦୁଝର ପୋଲିସର। କେତେବେଳେ ଟାଉନ ଥାନାରେ ଜଣେ ନିୟୁଜ କ୍ୟାମେରା ମ୍ୟାନକୁ ଦୁର୍ବ୍ୟବହାର କରି ଜଣେ ଏସଆଇଙ୍କ ବଦଳି ହେବା ତ ଆଉ କେତେବେଳେ ରାମଚନ୍ଦ୍ରପୁର ଥାନାର ଏସଆଇ ଜଣେ ଲୋକଙ୍କୁ ଉଲଗ୍ନ କରି ମାଡ଼ ମାରି ନିଲମ୍ବନ ହେବା । ଏହା ସହ ଟାଉନ ଥାନାର ଏସଆଇ ଜଣେ ରିପୋର୍ଟରଙ୍କୁ ମାଡ଼ ମାରିଥିଲେସୁଦ୍ଧା ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନହେବାରୁ ଏବେ ଏମାନଙ୍କ ଔଧତ୍ୟ ବଢିଯାଇଛି ।
ଲକଡାଉନ ସମୟରେ ସାଧାରଣ ଲୋକଙ୍କୁ ଯାହା ପିଟିଲେ ପିଟିଲେ ଏବେ କିନ୍ତୁ ଅନ୍ୟ କାରଣରୁ ଥାନାକୁ ଡାକି ପାଟଣା ଥାନା ପୋଲିସ ମ୍ୟାଡାମ ଜଣେ ଯୁବକକୁ ବାଡ଼ି ପାହାର ସାଙ୍ଗକୁ ଗୋଇଠା ମାଡ଼ କରୁଛନ୍ତି । ତଥାପି ଶାନ୍ତ ହୋଇନଥିଲା ପୋଲିସ ମ୍ୟାଡାମଙ୍କ ରାଗ । ପିଟିପିଟି ସନ୍ତୁଷ୍ଟ ହେଲେ ନାହିଁ ଯେ ପୁଣି ଗୋଇଠା ମାରିବାକୁ ବି ପଛାଇଲେ ନାହିଁ ସେ । ଏହି ମାଡ଼ମରା ଭିଜୁଆଲ ସୋସିଆଲ ମିଡିଆରେ ଭାଇରଲ ହେବାରେ ଲାଗିଛି ।
ମହିଳା ଜଣଙ୍କ ହେଉଛନ୍ତି ପାଟଣା ଥାନା ଆଇଆଇସି ସଂଧ୍ୟା ରାଣୀ ଜେନା । କିଛି ଦିନ ତଳେ ସେ ଜିଲ୍ଲାର ଶ୍ରେଷ୍ଠ ପୋଲିସ ଅଧିକାରୀ ପଦକ ପାଇଥିଲେ । ଏହି ଭିଡ଼ିଓ ଭାଇରଲ ହେବା ପରେ ପୋଲିସର କାର୍ଯ୍ୟ ନେଇ ଜିଲ୍ଲାରେ ଚର୍ଚ୍ଚା ଜୋର ଧରିଛି । ଏନେଇ କୌଣସି ପୋଲିସ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
