କେନ୍ଦୁଝର: ଗଣମାଧ୍ୟମର ପ୍ରଭାବ । ଅଭାବୀ, ବେଘର, ବେସାହାରା ଓ 4 ସନ୍ତାନର ବିଧବା ମାକୁ ସହାୟତାର ହାତ ବଢାଇଲା ପ୍ରଶାସନ । ପାଇଖାନା ଘରେ ଜୀବନ ବିତାଉଥିବା କେନ୍ଦୁଝର ନିକଟସ୍ଥ ରାଙ୍କି ଗ୍ରାମର ରାଇବାରୀ ମୁଣ୍ଡାଙ୍କୁ ଘର ଦେବାକୁ ପ୍ରତିଶୃତି ଦେଇଛନ୍ତି ସଦର ବ୍ଲକ ଅଧିକାରୀ ।
ରାଇବାରୀ ମୁଣ୍ଡା । ସ୍ବାମୀଙ୍କ ମୃତ୍ୟୁ ପରେ ଶାଶୁ ଘରୁ ତଡିଦେଲେ । ପରେ ଭାଇ ବି ପର କରିଦେଲେ । ଶେଷରେ 4 ଛୁଆକୁ ଧରି ସରକାରଙ୍କ ସ୍ବଚ୍ଛ ମିଶନ ଯୋଜନା ଜରିଆରେ ମିଳିଥିବା ପାଇଖାନା ଘରକୁ ସାହାରା କରିଛନ୍ତି । ରାତି ଓ ବର୍ଷା ହେଲେ ପର ବାରଣ୍ଡାରେ ଛୁଆଙ୍କୁ ଧରି ରହୁଛନ୍ତି । ରୋଜଗାର କହିଲେ କାଠ ହାଣିବା ଓ କୁଲିମଜୁରୀ । ଯଦି କାମ ନ ମିଳେ ତେବେ ଭୋକଉପାସରେ ଦିନ କଟେ । ଏପରି ସ୍ଥିତିରେ ନା ତାଙ୍କୁ ପକ୍କା ଘରଟିଏ ମିଳିଛି ନା ବିଧବା ଭତ୍ତା । ଏ ନେଇ ସେ ଦରଖାସ୍ତ ଦେଇଥିଲେ ସୁଦ୍ଧା କୌଣସି ଫରକ ପଡିନଥିଲା । ହେଲେ ଏ ନେଇ ଖବର ପ୍ରସାରଣ ପରେ ଖୋଦ ସଦର ବ୍ଲକ ଅଧିକାରୀ ଆସି ରାଇବାରୀଙ୍କ ସ୍ଥିତି ଦେଖିଯାଇଛନ୍ତି । ବିଜୁ ପକ୍କା ଯୋଜନାରେ ଘର ଓ ବିଧବା ଭତ୍ତା ଦେବା ନେଇ କଥା ଦେଇଛନ୍ତି ଏବିଡ଼ିଓ ।
ସ୍ବଚ୍ଛତାର ବାର୍ତ୍ତା ନେଇ ଘରେ ଘରେ ପାଇଖାନାର ନାରା ଦେଉଛନ୍ତି ସରକାର । ହେଲେ ଏଠି ମୁଣ୍ଡ ଗୁଞ୍ଜିବାକୁ 5 ପ୍ରାଣୀ କୁଟୁମ୍ବଙ୍କ ସାହାର ସରକାରଙ୍କ ସ୍ବଚ୍ଛ ଭାରତ ମିଶନରେ ଦିଆଯାଇଥିବା ପାଇଖାନା । ଏ ନେଇ ଖବର ପ୍ରସାରଣ ପରେ କେନ୍ଦୁଝର ନିକଟସ୍ଥ ରାଙ୍କି ଗ୍ରାମର ରାଇବାରୀ ମୁଣ୍ଡାଙ୍କୁ ସହଯୋଗର ହାତ ବଢାଇଛି ପ୍ରଶାସନ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
