କେନ୍ଦୁଝର: କେନ୍ଦୁଝରରେ ପାଗଳା କୁକୁରଙ୍କ ଆତଙ୍କ । ଜିଲ୍ଲାର ହରିଚନ୍ଦନପୁର ବ୍ଲକ ଅନ୍ତର୍ଗତ ବ୍ରାହ୍ମଣୀପାଳରେ ପାଗଳା କୁକୁରଙ୍କ ଆତଙ୍କ ପାଇଁ ଲୋକେ ଏବେ ଭୟଭୀତ ହୋଇପଡିଛନ୍ତି । ଗତ କିଛିଦିନ ହେଲା ଅଞ୍ଚଳରେ ଏକ ପାଗଳା କୁକୁର ସ୍ଥାନୀୟ ଅଞ୍ଚଳବାସୀଙ୍କ ନିଦ ହଜାଇ ଦେଇଛି ।
ଗତ ଦୁଇଦିନ ମଧ୍ୟରେ 25ରୁ ଉର୍ଦ୍ଧ୍ବ ଲୋକ ଏହି ପାଗଳ କୁକୁର ଆକ୍ରମଣରେ ଆହତ ହୋଇଥିବା ଅଭିଯୋଗ ହୋଇଛି । ସେଥିମଧ୍ୟରୁ ଏକ ଶିଶୁକୁ ଗୁରୁତର ଅବସ୍ଥାରେ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଏହାସହ ଆଉ କିଛି ଆହତ ବ୍ୟକ୍ତି ବ୍ରାହ୍ମଣୀପାଳ ମେଡିକାଲ ଓ ଯାଜପୁର ଜିଲ୍ଲା ଦାନଗଦି ମେଡିକାଲରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି ।
ତେବେ ସମ୍ବେଦନଶୀଳ କଥା ହେଉଛି ଏହି ପାଗଳା କୁକୁର ଆଜି ଜଣେ ଗର୍ଭବତୀ ମହିଳାଙ୍କୁ ମଧ୍ୟ ଆକ୍ରମଣ କରିଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଜନ ଅସନ୍ତୋଷ ବୃଦ୍ଧି ପାଇବା ପରେ ପୋଲିସ ପାଗଳା କୁକୁରକୁ ଆୟତ୍ତ କରିବାକୁ ଚେଷ୍ଟା କରୁଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
