କେନ୍ଦୁଝର: ମୋହନଦାସ କରମଚାନ୍ଦ ଗାନ୍ଧୀ ତଥା ମହାତ୍ମା ଗାନ୍ଧୀ । ଯାହାଙ୍କ ସ୍ମୃତି ସାଇତିଛନ୍ତି କେନ୍ଦୁଝରର ସୁଜିତ ପଟ୍ଟନାୟକ । ଡାକ ଟିକେଟରୁ ଲଫାପା । ଖବର କାଗଜରୁ ପୁସ୍ତକ । ବାପୁଙ୍କ ରଚିତ ତଥା ବାପୁଙ୍କ ବିଷୟରେ ପ୍ରକାଶିତ । ସବୁ ପ୍ରକାର ସାମଗ୍ରୀ ସାଇତିଛନ୍ତି ସେ । 150 ତମ ଜନ୍ମ ଜୟନ୍ତୀ ଅବସରରେ ଡାକ ଟିକେଟ ଠୁ ଆରମ୍ଭ କରି ପୁସ୍ତକ ପର୍ଯ୍ୟନ୍ତ ସବୁର 150ଟି ଲେଖାଏଁ କପି ସଂଗ୍ରହ କରି ରଖିଛନ୍ତି । ଯାହା ତାଙ୍କ ଘରକୁ ଏକ ସଂଗ୍ରହାଳୟରେ ପରିଣତ କରିଛି ।
କେବଳ ସେତିକି ନୁହେଁ 150ତମ ଜନ୍ମ ଜୟନ୍ତୀ ପାଇଁ ଗାନ୍ଧୀଙ୍କ 150ଟି ଫଟୋ ଓ ବାପୁଙ୍କ ସ୍ମୃତି ଲେଖାଥିବା 150ଟି ପେନସିଲ୍ ମଧ୍ୟ ସେ ସଂଗ୍ରହ କରି ରଖିଛନ୍ତି । ଏହାସହ ଗାନ୍ଧୀଙ୍କ ତିନି ମାଙ୍କଡ, ଚରଖା ତଥା ଅନ୍ୟାନ୍ୟ ସାମଗ୍ରୀ ମଧ୍ୟ ତାଙ୍କ ଘରେ ଦେଖିବାକୁ ମିଳୁଛି ।
ବାପୁଙ୍କ ସ୍ମୃତିକୁ ଏପରି ସାଇତି ରଖିଥିବା ସୁଜିତ୍ ଅନେକ ଥର ବିଭିନ୍ନ ସଂଗଠନ ପକ୍ଷରୁ ସମ୍ମାନିତ ହୋଇଛନ୍ତି । ତେବେ ତାଙ୍କର ଏହି ନିଆରା ନିଶା ଆଗକୁ ଯୁବପିଢିଙ୍କୁ ଗାନ୍ଧୀଙ୍କ ଚିନ୍ତାଧାରା ସହ ଯୋଡିବ ବୋଲି ଆଶା ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
