କେନ୍ଦୁଝର: ଦିନକୁ ଦିନ ଜଙ୍ଗଲ କ୍ଷୟ ହେବାକୁ ଲାଗିଛି । ମଣିଷ ନିଜର ସ୍ବାର୍ଥ ପାଇଁ ଏହି ଜଙ୍ଗଲ ନଷ୍ଟ କରି କଂକ୍ରିଟ ଜଙ୍ଗଲ ସୃଷ୍ଟି କରୁଥିବା ବେଳେ ଅସ୍ବାଭାବିକ ଭାବେ ଖଣି ଖନନ କାର୍ଯ୍ୟ ଜାରି ରଖିଛି । ଏହିଭଳି କାର୍ଯ୍ୟ ପାଇଁ ଏହାର ପ୍ରତ୍ୟକ୍ଷ ଓ ପରୋକ୍ଷ ଭାବେ ପ୍ରଭାବ ପଡିଛି ଏହି ଜଙ୍ଗଲ ମଧ୍ୟରେ ରହୁଥିବା ଜୀବଜନ୍ତୁଙ୍କ ଉପରେ ।
ଫଳରେ ଏହି ଜୀବଜନ୍ତୁ ବଞ୍ଚିଥିବା ସ୍ବଳ୍ପ ଜଙ୍ଗଲ ଛାଡି ମଣିଷ ବସବାସ କରୁଥିବା ଅଞ୍ଚଳ ମଧ୍ୟରେ ଅନୁପ୍ରବେଶ କରିଛନ୍ତି । ଏହିଭଳି ଏକ ଦୃଶ୍ୟ ଦେଖିବାକୁ ମିଳିଛି ଖଣି ଖାଦାନଭରା ବାମେଵାରୀ ଅଞ୍ଚଳରେ । ଚମ୍ପୁଆ ରେଞ୍ଜ ଅନ୍ତର୍ଗତ ଖଣ୍ଡବନ୍ଧ ଲୁହା ଖଣି ମଧ୍ୟରେ ସୋମବାର ଅପରାହ୍ନରେ ଏକ ଦଶ ଟିକିଆ ହାତୀ ପଲ ପ୍ରବେଶ କରିଥିଲେ । ଖଣି କାର୍ଯ୍ୟ ଚାଲୁଥିବାବେଳେ ଏହି ହାତୀ ପଲ ବେଧଡକ ପଶିଥିଲେ ।
ଏହି ହାତୀ ପଲକୁ ଦେଖି ଖଣିରେ କାର୍ଯ୍ୟ କରୁଥିବା ଶ୍ରମିକଙ୍କ ମଧ୍ୟରେ କୋକୁଆ ଭୟ ଖେଳି ଯାଇଥିଲା । କିନ୍ତୁ କିଛି ସମୟ ମଧ୍ୟରେ ଏହି ହାତୀପଲ ପଳାଇ ଯାଇଥିବା ଜଣାପଡିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
