କେନ୍ଦୁଝର: ଖୁଲମଖୁଲା ଚାଲିଛି ଗଞ୍ଜେଇ ଚୋରା ବେପାର । ଦିନକୁ ଦିନ ଏହି ଗଞ୍ଜେଇ ଚାଲାଣ ଚେର ଲମ୍ବିବା ସହ ପୋଲିସକୁ ଚକମା ଦେଇ ବିଭିନ୍ନ ଉପାୟରେ ବେପାରୀ କରୁଛନ୍ତି ଗଞ୍ଜେଇ ଚାଲାଣ । ଏହିପରି ଭୁବନେଶ୍ବରରୁ ଝାଡଖଣ୍ଡକୁ ଗଞ୍ଜେଇ ଚୋରା ଚାଲାଣବେଳେ ଚମ୍ପୁଆ ପୋଲିସ ଧରିବାକୁ ସଫଳ ହୋଇଛି ।
ଭିଡିଓ ସୌଜନ୍ୟ: ସମ୍ବାଦଦାତା, କେନ୍ଦୁଝର
ଖବର ଅନୁଯାୟୀ, ଚମ୍ପୁଆ ପୋଲିସ ଚନ୍ଦ୍ରଶେଖର କଲେଜ ନିକଟରେ ଗାଡି ଯାଞ୍ଚ କରୁଥିବାବେଳେ ଗଞ୍ଜେଇ ଚୋରା ଚାଲାଣ କାରକୁ ଜବତ କରିଛି । ତେବେ କାର ଭିତରୁ ୪ଟି ବ୍ୟାଗରେ ଥିବା ପାଖାପାଖି ୭୦ କେଜିରୁ ଊର୍ଦ୍ଧ୍ବ ଗଞ୍ଜେଇ ଜବତ ହୋଇଛି ବୋଲି ସୂଚନା ମିଳିଛି । ଏହାର ବଜାର ମୂଲ୍ୟ ଲକ୍ଷାଧିକ ଟଙ୍କା ବୋଲି ଜଣାପଡ଼ିଛି । ଏଥିସହ କାରରେ ଯାଉଥିବା ୩ ଜଣ ବ୍ୟକ୍ତିଙ୍କୁ ଅଟକ ରଖି ଅଧିକ ପଚରାଉଚୁରା ଚଳାଇଛି ପୋଲିସ ।
ଗଞ୍ଜେଇ କାରରେ ଭୁବନେଶ୍ବରରୁ ଝାଡଖଣ୍ଡକୁ ଗଞ୍ଜେଇ ଚୋରା ଚାଲାଣ କରାଯାଇଥିଲା । ଗଞ୍ଜେଇ ଚୋରା ଚାଲାଣକାରୀ ବ୍ୟକ୍ତିକୁ ଗିରଫ କରି ଅଧିକ ତଥ୍ୟ ସଂଗ୍ରହ କରୁଥିବା ଜଣାପଡ଼ିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
