ଆନନ୍ଦପୁର: ବିପଦ ବେଳେ ନିଜକୁ ବଞ୍ଚାଇବା ସହ ଅନ୍ୟକୁ କିପରି ବଞ୍ଚାଇ ହେବ ସେ ନେଇ ଅନେକ ପ୍ରଶିକ୍ଷଣ ଲୋକମାନଙ୍କ ସହ ଛାତ୍ରଛାତ୍ରୀଙ୍କୁ ଦିଆଯାଇଥାଏ । ଏମିତି ଏକ କାର୍ଯ୍ୟକ୍ରମ ଅଗ୍ନିଶମ ବିଭାଗ ଦ୍ଵାରା ସାରା ରାଜ୍ୟରେ ଚାଲୁଥିବା ବେଳେ ଅଗ୍ନିଶମ କର୍ମଚାରୀ ମାନେ ନିଜର ଜ୍ଞାନକୌଶଳକୁ ଆନନ୍ଦପୁର ଉପଖଣ୍ଡ ମେଡିକାଲରେ ଡାକ୍ତର, ନର୍ସ ଓ ସୁରକ୍ଷା କର୍ମୀମାନଙ୍କୁ ଶିଖାଇଛନ୍ତି।
କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ମେଡ଼ିକାଲରେ ଆନନ୍ଦପୁର ଅଗ୍ନିଶମ ବିଭାଗ ପକ୍ଷରୁ ଡାକ୍ତର, ନର୍ସ ଓ ସୁରକ୍ଷା କର୍ମୀ ମାନଙ୍କୁ ବିପଦ ସମୟରେ କିପରି ସାହସର ସହିତ ନିଜକୁ ରକ୍ଷା କରିବେ ଏବଂ ଅନ୍ୟ ମାନଙ୍କୁ ରକ୍ଷା କରିପାରିବେ ସେ ନେଇ ପ୍ରଶିକ୍ଷଣ ଦେଉଛନ୍ତି । ଗ୍ୟାସ ଟାଙ୍କିରେ ନିଆଁ ଲାଗିଲେ ଏଥିରେ ଭୟଭୀତ ନହୋଇ ଗ୍ୟାସ ବାହାରୁଥିବା ନଳିକୁ କିପରି ବ୍ୟବହାର କରିବା ସହ ଛାତ ଉପରୁ ରଶି ସାହାଯ୍ୟରେ କିପରି ଉଦ୍ଧାର କରାଯାଇପାରିବ ସେ ନେଇ ବିଭିନ୍ନ କୌଶଳ ଶିଖାଇଥିଲେ ।
ଦୀର୍ଘ ୩ ଘଣ୍ଟା ଧରି ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ମେଡ଼ିକାଲର ଏସଡ଼ିଏମଓଙ୍କ ସହ ଅନ୍ୟ ଡାକ୍ତର ନର୍ସ ଓ ସୁରକ୍ଷା କର୍ମୀମାନେ ମଧ୍ୟ ଏଥିରେ ସାମିଲ ହୋଇଥିଲେ। ଲୋକମାନଙ୍କୁ ସଚେତନ କରାଇବା ମୁଖ୍ୟ ଉଦ୍ଦେଶ୍ୟ ବୋଲି କହିଛନ୍ତି ଅଗ୍ନିଶମ ଅଧିକାରୀ । ଅଗ୍ନିଶମ ବିଭାଗର ଏଭଳି କାର୍ଯ୍ୟକ୍ରମକୁ ସବୁ ମହଲରେ ସ୍ବାଗତ କରାଯାଇଛି । ତେବେ ଏଭଳି କାର୍ଯ୍ୟକ୍ରମ ସମ୍ପର୍କରେ ଗାଁର ମହିଳା ଓ ଅନ୍ୟମାନଙ୍କୁ ସଚେତନ କରାଗଲେ ଭଲ ହେବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।
ଆନନ୍ଦପୁର ସ୍ମୃତିରଞ୍ଜନ ବିହାରୀ, ଇଟିଭି ଭାରତ
