କେନ୍ଦୁଝର: ଚମ୍ପୁଆ ରେଞ୍ଜରେ ହାତୀ ପଲଙ୍କ ଉପଦ୍ରବ । ଏହି ହାତୀପଲ ଦୁଇଟି ତିନୋଟି ଭାଙ୍ଗି ଦେଇଛନ୍ତି । ଫଳରେ ଆତଙ୍କିତ ହୋଇପଡ଼ିଛନ୍ତି ଅଞ୍ଚଳବାସୀ ।
ଏହି ପଲରେ ସମୁଦାୟ 23 ଜଣ ହାତୀ ଥିବା ଜଣାପଡ଼ିଛି । ପ୍ରତ୍ୟେକ ଦିନ ଏମାନେ କିଛି ନା କିଛି ଧନ ସମ୍ପତ୍ତି ନଷ୍ଟ କରୁଥିବା ଅଭିଯୋଗ ହେଉଛି । ଚାଷୀର ଭାତ ହାଣ୍ଡି ସାଜିଥିବା କ୍ଷେତରେ ପଶି ଫସଲ ନଷ୍ଟ କରୁଛନ୍ତି ତ, ପୁଣି କାହାର ମୁଣ୍ଡ ଗୁଞ୍ଜିବାକୁ ଥିବା ଘର ଖଣ୍ଡିକକୁ ବି ଭାଙ୍ଗି ପକାଇଛନ୍ତି ।
ଭିଡ଼ିଓ ସୌଜନ୍ଯ: ସମ୍ବାଦଦାତା, କେନ୍ଦୁଝର
ଗତକାଲି ରାତିରେ ଚମ୍ପୁଆ ରେଞ୍ଜ ଅଂଚଳର ଚମକପୁର ଓ ଝରଣ ଗ୍ରାମରେ ପଶି ତିନୋଟି ଘର ଭାଙ୍ଗି ଦେଇଛନ୍ତି । ଏହାସହ ଘରେ ଥିବା ଚାଉଳ ଓ ଚାଷ ହୋଇଥିବା ବ୍ୟାପକ କଦଳୀ ଗଛକୁ ଭାଙ୍ଗି ପକାଇଛନ୍ତି । ବନ ବିଭାଗ ହାତୀ ଗୁଡିକୁ ଘଉଡାଇବାକୁ ଚେଷ୍ଟା ଚଳାଇଥିବାବେଳେ କ୍ଷୟକ୍ଷତି ହୋଇଥିବା ପରିବାରକୁ କ୍ଷତିପୂରଣ ପ୍ରଦାନ କରାଯାଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
