କେନ୍ଦୁଝର: ରାଷ୍ଟ୍ରୀୟ ଜନଜାତି ଆୟୋଗର ସଦସ୍ୟ ଅନନ୍ତ ନାଏକଙ୍କ ଜନ ଅଭିଯୋଗ ଶୁଣାଣି ହୋଇଛି । କେନ୍ଦୁଝର ଜିଲ୍ଲା ବଡ଼ବିଲ ତହସିଲରେ ପ୍ରସ୍ତାବିତ ବାଇପାସ ରାସ୍ତା ଦ୍ୱାରା ପ୍ରଭାବିତ ହେଉଥିବା କାଶିଆ, ଝାଡଗାଁ ଓ ଭୁଶଗାଁର ଲୋକଙ୍କ ଅଭିଯୋଗର ଶୁଣାଣି କରିଛନ୍ତି ରାଷ୍ଟ୍ରୀୟ ଜନଜାତି ଆୟୋଗର ସଦସ୍ୟ ଅନନ୍ତ ନାଏକ ।
ଆୟୋଗର ଉପନିର୍ଦ୍ଦେଶକ ରାକେଶ କୁମାର ଦୁବେ, ସହକାରୀ ନିର୍ଦ୍ଦେଶକ ଭି. ଅଶୋକ ବର୍ଦ୍ଧନ, କମିଶନଙ୍କ ବ୍ୟକ୍ତିଗତ ସଚିତ ପିକେ ପରିଡା, ବ୍ୟକ୍ତିଗତ ସହାୟକ ବିବି ବିଶ୍ୱାଳ, ଅଧିକାରୀ ଦୀପକ କୁମାର ପଲାଇ ଓ ରାଜ୍ୟ ଅଧିକାରୀ ଏବଂ ଆୟୋଗର ସଦସ୍ୟ ନାଏକ ଜନ ଅଭିଯୋଗ ଶୁଣିବା ପାଇଁ ଏଠାକୁ ଆସିଥିଲେ । ଶୁଣାଣି ସମୟରେ ସ୍ଥାନୀୟ ଲୋକମାନେ ଅଭିଯୋଗ କରିଥିଲେ ଯେ, ପ୍ରସ୍ତାବିତ ବାଇପାସ ଦ୍ୱାରା ଉକ୍ତ ୩ଟି ଗାଁର ଗୋଟିଏ ମଶାଣୀ, ଦୁଇଟି ଧାର୍ମିକ ସ୍ଥଳ, ଗୋଟିଏ ସ୍କୁଲ ଓ ଗୋଟିଏ ଅଙ୍ଗନବାଡି କେନ୍ଦ୍ର ଉଚ୍ଛେଦ ହେବ ।
କିନ୍ତୁ ଏହାକୁ ଏଡାଇବା ପାଇଁ ଗ୍ରାମବାସୀ ପ୍ରସ୍ତାବିତ ରାସ୍ତା ପାଇଁ ଏକ ବିକଳ୍ପ ରୁଟ ଦେଖାଇଥିଲେ । ଏହା ଦ୍ୱାରା ରାସ୍ତାର ଦୈର୍ଘ୍ୟ ମଧ୍ୟ ୧ କିଲୋମିଟର ହ୍ରାସ ପାଇବ ବୋଲି ସେମାନେ କହିଥିଲେ । କମିଶନ ସେମାନଙ୍କ ଅଭିଯୋଗ ଶୁଣିବା ସହ ପ୍ରଭାବିତ ସ୍ଥାନ ଗୁଡିକ ବୁଲି ଦେଖିଥିଲେ । ଏନେଇ ଜିଲ୍ଲା ପ୍ରଶାସନ ଓ ରାଜ୍ୟ ଅଧିକାରୀଙ୍କ ସହ ଆଲୋଚନା କରିବା ପାଇଁ କମିଶନ ସଦସ୍ୟ ପ୍ରତିଶ୍ରୁତି ଦେଇଥିଲେ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
