କେନ୍ଦୁଝର: ଏକ ମାସ ଧରି ନିଜ ଜୀବନକୁ ବିପଦରେ ପକାଇ କୋରୋନା ମୁକାବିଲାରେ ଆମ୍ବୁଲାନ୍ସ ଡ୍ରାଇଭର ମାନେ ନିୟୋଜିତ ରହିଛନ୍ତି । ହେଲେ ସେମାନଙ୍କୁ ପ୍ରଶାସନ ପକ୍ଷରୁ ବ୍ୟକ୍ତିଗତ ସୁରକ୍ଷା ଉପକରଣ ଦିଆଯାଉନାହିଁ । ସେଥିପାଇଁ ଜିଲ୍ଲାରେ କାର୍ଯ୍ୟରତ ଆମ୍ବୁଲାନ୍ସ ଡ୍ରାଇଭରମାନେ ଆଜି ଆନ୍ଦୋଳନକୁ ଓହ୍ଲାଇଛନ୍ତି । ଏହା ସହ କାର୍ଯ୍ୟକ୍ଷେତ୍ରରେ ବ୍ୟକ୍ତିଗତ ସୁରକ୍ଷା ଉପକରଣ ଯୋଗାଇଦେବାକୁ ସେମାନେ ଦାବି କରିଛନ୍ତି ।
ନିଜ ଜୀବନକୁ ବାଜି ଲଗାଇ ଡ୍ରାଇଭରମାନେ ଯେ କୌଣସି ମୁହୂର୍ତ୍ତରେ କୋରୋନା ସନ୍ଦିଗ୍ଧ ବ୍ୟକ୍ତିଙ୍କୁ ଡାକ୍ତରଖାନାରେ ପହଞ୍ଚାଉଛନ୍ତି । ହେଲେ ସେମାନଙ୍କୁ କୌଣସି ସୁରକ୍ଷା କିଟ କିମ୍ବା ମାସ୍କଟିଏ ମଧ୍ୟ ଦିଆ ଯାଉନାହିଁ । ଏ ନେଇ ବହୁଥର ଗୁହାରି କରିଥିଲେ ମଧ୍ୟ କେହି ଶୁଣିବାକୁ ନାହାନ୍ତି ବୋଲି ସେମାନେ ଅଭିଯୋଗ କରିଛନ୍ତି । ସେଥିପାଇଁ ୬୦ରୁ ଉର୍ଦ୍ଧ୍ବ ଆମ୍ବୁଲାନ୍ସ ଡ୍ରାଇଭର ଆନ୍ଦୋଳନକୁ ଓହ୍ଲାଇଥିବା ଦେଖିବାକୁ ମିଳିଛି ।
ଯଥାଶୀଘ୍ର ସେମାନଙ୍କ ଦାବି ଗୁଡିକ ପୂରଣ ନହେଲେ ଆଗାମୀ ଦିନରେ ଏହି ଆନ୍ଦୋଳନକୁ ଜୋରଦାର କରିବାକୁ ଡ୍ରାଇଭର ମାନେ ଚେତାବନୀ ଦେଇଛନ୍ତି । ଅନ୍ୟପକ୍ଷରେ ଆରଟିଓ, ସିଡିଏମଓ ଓ ଜିଲ୍ଲାପ୍ରଶାସନ ମଧ୍ୟରେ ତାଳମେଳର ଅଭାବ କାରଣରୁ ଏଭଳି ପରିସ୍ଥିତି ଉପୁଜିଥିବା ଜଣାପଡ଼ିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
