କେନ୍ଦୁଝର: ଜିଲ୍ଲାରେ ଚିନ୍ମୟ ମେମୋରିଆଲ ସର୍ଵ ଭାରତୀୟ ସତ୍ୟ ପ୍ରସନ୍ନ ଦିବାରାତ୍ର କ୍ରିକେଟ ଟୁର୍ଣ୍ଣାମେଣ୍ଟ ଆରମ୍ଭ ହୋଇଛି । ଟି-20 ଫର୍ମାଟରେ ଏହି ଟୁର୍ଣ୍ଣାମେଣ୍ଟ ଅନୁଷ୍ଠିତ ହେବ । ରାଜ୍ୟର ଅଗ୍ରଣୀ କ୍ରୀଡା ଅନୁଷ୍ଠାନ ଶଙ୍କର ସ୍ପୋର୍ଟିଂ ଦ୍ବାରା ଆୟୋଜିତ ଏହି ସର୍ଵ ଭାରତୀୟ ଟୁର୍ଣ୍ଣାମେଣ୍ଟ ଶୁଭାରମ୍ଭ ଅବସରରେ ପ୍ରଥମେ ଟ୍ରଫିକୁ ସହର ପରିକ୍ରମା କରାଯାଇଥିଲା । ପରେ ସନ୍ଧ୍ୟାରେ ସ୍ଥାନୀୟ ମାଇନିଂ ସ୍କୁଲ ପଡ଼ିଆରେ ମହା ଆଡମ୍ବରରେ ଟୁର୍ଣ୍ଣାମେଣ୍ଟ ଆରମ୍ଭ ହୋଇଥିଲା । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ କେନ୍ଦୁଝର ଜିଲ୍ଲାର ସାଂସଦ ଚନ୍ଦ୍ରାଣୀ ମୂର୍ମୁ ଯୋଗ ଦେଇ ଏଭଳି ଅନୁଷ୍ଠାନ କ୍ରୀଡ଼ାର ଉନ୍ନତି ପାଇଁ ପ୍ରଚେଷ୍ଟାକୁ ନେଇ ଖୁସି ବ୍ୟକ୍ତ କରିବା ସହ କ୍ରୀଡ଼ାପ୍ରେମୀଙ୍କ ଏଭଳି ଆୟୋଜନ ନେଇ ପ୍ରଶଂସା କରିଥିଲେ ।
ଶଙ୍କର ସ୍ପୋର୍ଟିଂ ସଭାପତି ସୌମ୍ୟ ଶଙ୍କର ଚକ୍ର ସଭାପତିତ୍ବରେ ଆରମ୍ଭ ହୋଇଥିବା ଟୁର୍ଣ୍ଣାମେଣ୍ଟ କେବଳ ଖେଳ ଆୟୋଜନ ନୁହେଁ ବରଂ ଲୁକ୍କାୟିତ ପ୍ରତିଭାକୁ ପସ୍ଫୁଟିତ କରିବା ପାଇଁ ଏକ ପ୍ରୟାସ ବୋଲି ପ୍ରକାଶ କରିଥିଲେ । ଶୁଭାରମ୍ଭ କାର୍ଯ୍ୟକ୍ରମରେ ଜିଲ୍ଲାର ତିନି ପଦ୍ମଶ୍ରୀ ତୁଳସୀ ମୁଣ୍ଡା, ଦୈତାରୀ ନାଏକ ଓ ମାଗୁଣି କୁଅଁରଙ୍କୁ ସମ୍ବର୍ଦ୍ଧିତ କରାଯାଇଥିଲା । ସମ୍ବର୍ଦ୍ଧନା କାର୍ଯ୍ୟକ୍ରମ ପରେ ଆତସବାଜି ଦ୍ବାରା ଖେଳର ଶୁଭାରମ୍ଭ ହୋଇଥିଲା । ଓଡିଶୀ ନୃତ୍ୟ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ଆରମ୍ଭ ହୋଇଥିଲା । ପରେ କ୍ରୀଡ଼ାପ୍ରେମୀଙ୍କ ମନ ମୋହିଥିଲା ଓଲିଉଡର ବିଶିଷ୍ଟ କଣ୍ଠଶିଳ୍ପୀ ସ୍ବୟଂମ ପାଢ଼ୀ ଓ ଦୀପ୍ତିଙ୍କ ଗୀତ । ଓଲିଉଡ ନାୟିକା ଶୀତଳ ପାତ୍ରଙ୍କ ଡ୍ୟାନ୍ସ ଦର୍ଶକଙ୍କ ମନ ମୋହିଥିଲା ।
କ୍ରିକେଟ ଟୁର୍ଣ୍ଣାମେଣ୍ଟ ୭ ତାରିଖରେ ଉଦଯାପନ ହେଵ । ରାଜ୍ୟରୁ ୫ଟି ଶକ୍ତିଶାଳୀ କ୍ରିକେଟ ଟିମ ଏବଂ ରାଜ୍ୟ ବାହାରୁ ୭ଟି ଟିମ ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରିଛନ୍ତି । ବିଜୟୀ ଟିମକୁ ୨ଲକ୍ଷ ଟଙ୍କା ସହିତ ଟ୍ରଫି ଏବଂ ରନର୍ସ ଟିମକୁ ୧ ଲକ୍ଷ ଟଙ୍କା ସହିତ ଟ୍ରଫି ପ୍ରଦାନ କରାଯିବ । ଏହି କ୍ରିକେଟ ଟୁର୍ଣ୍ଣାମେଣ୍ଟରେ ଆଇସିସି ସମସ୍ତ ନିୟମ ଅନୁଯାୟୀ ଖେଳ ହେବ । ଟୁର୍ଣ୍ଣାମେଣ୍ଟରେ ଥାର୍ଡ ଏମ୍ପାୟାର ସହ ଚିୟର ଗାର୍ଲ ବିଶେଷ ଆକର୍ଷଣ । ସମସ୍ତ ମ୍ୟାଚରେ ବିସିସିସିଆଇ ଅନୁବନ୍ଧିତ ଅମ୍ପିୟାର ରହିବାର ବ୍ୟବସ୍ଥା ରହିଛି । ପ୍ରଥମ ମ୍ୟାଚରେ ମିଡିଆ ଏକାଦଶ ନାଗରିକ ଏକାଦଶରକୁ ହରାଇ ବିଜୟରୁ ଅଭିଯାନ ଆରମ୍ଭ କରିଛି ।
ଇଟିଭି ଭାରତ, କେନ୍ଦୁଝର
