କେନ୍ଦ୍ରାପଡ଼ା: ଛେଳି ଚରାଇବାକୁ ଯାଇଥିଲେ ଯୁବତୀ ଟାଣିନେଲା କୁମ୍ଭୀର । ଏଭଳି ଘଟଣା ଘଟିଛି କେନ୍ଦ୍ରାପଡା ଜିଲ୍ଲାରେ । ନାଳକୁ ଛେଳି ଚରାଇବାକୁ ଯାଇଥିବା ଯୁବତୀ କୁମ୍ଭୀର ଆକ୍ରମଣର ଶିକାର ହୋଇଛନ୍ତି । ବର୍ତ୍ତମାନ ସେ ନିଖୋଜ ଥିବା ସୂଚନା ।
ସୂଚନାନୁଯାୟୀ, ଶୁକ୍ରବାର ଅପରାହ୍ନରେ କେନ୍ଦ୍ରାପଡ଼ା ରାଜନଗର ରଙ୍ଗଣି ପଞ୍ଚାୟତରୁ ଭିତରକନିକାକୁ ସଂଯୋଗ କରୁଥିବା ଭେକଟା ନାଳରେ ଛେଳି ଚରାଇବାକୁ ଯାଇ କୁମ୍ଭୀର ଆକ୍ରମଣ ଶିକାର ହୋଇ ନିଖୋଜ ହୋଇଛନ୍ତି କୁରୁମାସାହି ମଥୁରୀ ଦଳାଇଙ୍କ ଝିଅ ସିଲା ଦଳାଇ । ସିଲା ଛେଳି ଚରାଉଥିବା ବେଳେ ଛେଳି ପଲରୁ ଗୋଟିଏ ଛେଳି ଭେକଟା ନାଳ ନିକଟସ୍ଥ ଜଙ୍ଗଲକୁ ଚାଲି ଯାଇଥିଲା । ଛେଳିକୁ ଖୋଜିଖୋଜି ୧୮ ବର୍ଷୀୟା ସିଲା ଏହି ଜଙ୍ଗଲ ମଧ୍ୟକୁ ଯାଇ ଖୋଜିବା ସମୟରେ ହଠାତ୍ ଏକ କୁମ୍ଭୀର ତାଙ୍କୁ ଆକ୍ରମଣ କରି ପାଣି ଭିତରକୁ ଟାଣି ନେଇଥିଲା ।
ସେଠାରେ ଉପସ୍ଥିତ ଗାଁ ଲୋକେ ଦର୍ଶକ ସାଜିବା ସାର ହୋଇଥିଲା । ସମସ୍ତେ କେବଳ ଦେଖିବା ବ୍ୟତୀତ ଅନ୍ୟ କୌଣସି ଉପାୟ ନଥିଲା । ତେବେ ଏ ସମ୍ପର୍କରେ ବନବିଭାଗକୁ ଖବର ଦିଆଯାଇଥିଲେ ସୁଦ୍ଧା ଏଯାବତ ବନବିଭାଗ ପକ୍ଷରୁ କୌଣସି ପଦକ୍ଷେପ ନିଆ ଯାଇନଥିବା କାରଣରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ସୃଷ୍ଟି ହୋଇଛି । ତେବେ କେନ୍ଦ୍ରାପଡା ଜିଲ୍ଲାରେ ଏଭଳି ଘଟଣା ବାରମ୍ବାର ଘଟୁଥିଲେ ବନବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଆସୁଛି । କୁମ୍ଭୀର ଆକ୍ରମଣରୁ ଲୋକଙ୍କୁ ବର୍ତ୍ତିବା ପାଇଁ ପଦକ୍ଷେପ ନେବା ଆବଶ୍ୟକତା ରହିଛି ।
ଇଟିଭି ଭାରତ, କେନ୍ଦ୍ରାପଡ଼ା
