କେନ୍ଦ୍ରାପଡା: ଧନଦାତ୍ରୀ ଦେବୀ ମା' ଲକ୍ଷ୍ମୀଙ୍କ ପୂଜାରେ ଚଳଚଞ୍ଚଳ କେନ୍ଦ୍ରାପଡା ସହର । ରଙ୍ଗବେରଙ୍ଗ ଆଲୋକମାଳା ସହ ଆକର୍ଷଣୀୟ ତୋରଣରେ ଝଲସୁଛି ସମଗ୍ର ସହର । ହେଲେ କେନ୍ଦ୍ରାପଡା ଜିଲ୍ଲା ନୂଆ ବସଷ୍ଟାଣ୍ଡର ଥାନାପତି ପୂଜା ମଣ୍ଡପରେ ମା' ଗଜଲକ୍ଷ୍ମୀଙ୍କୁ ନିଆରା ଢଙ୍ଗରେ ପୂଜା କରାଯାଉଛି । ଏଠି ମା' ଗଜଲକ୍ଷ୍ମୀଙ୍କ ପୂଜାର ପ୍ରଥମ ଗୁରୁବାର ପାଳନ ହୁଏ କାର୍ତ୍ତିକ ମାଣଓଷା ଗୁରୁବାର । କଥାଟି ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବାସ୍ତବରେ ଏଠି ମାର୍ଗଶୀର ଗୁରୁବାର ନୁହେଁ କାର୍ତ୍ତିକ ମାଣବସା ଗୁରୁବାର ପାଳନ ହୋଇଥାଏ ।
ସାଧାରଣତଃ ଓଡ଼ିଆଣୀମାନେ ମାର୍ଗଶୀର ମାସର ପ୍ରଥମ ଗୁରୁବାର ଦିନ ମାଣବସା କରୁଥିବା ବେଳେ ଏଠାରେ ଲକ୍ଷ୍ମୀ ପୂଜାର ସାତଦିନ ମଧ୍ୟରେ ପଡୁଥିବା ଗୁରୁବାର ଦିନ ରାତି ୪ଟାରୁ ମାଣବସା କରାଯାଇଥାଏ । ସମ୍ପୂର୍ଣ୍ଣ ଓଡ଼ିଆ ବିଧି ଅନୁଯାୟୀ, ମା'ଙ୍କୁ ମାଣ ଖଟୁଲିରେ ବସାଯାଇ ମୂଳା, ଆଖୁ ଓ ଅନ୍ୟାନ୍ୟ ପୂଜା ସାମଗ୍ରୀରେ ସୁସଜ୍ଜିତ କରାଯାଇଥାଏ । ପରେ ମା'ଙ୍କୁ ଭୋଗ ଲଗାଯାଏ । ମଧ୍ୟାହ୍ନରେ ଦହି ପଖାଳ, ଶାଗ ଇତ୍ୟାଦି ଭୋଗ କରାଯାଉ ଥିବାବେଳେ ସନ୍ଧ୍ୟାରେ ଲକ୍ଷ୍ମୀପୁରାଣ ପାଠ କରାଯାଇ ମଣ୍ଡାପିଠା, ନୈବେଦ୍ୟ ଆଦି ଅର୍ପଣ କରାଯାଇଥାଏ । ଏହାପରେ ମା'ଙ୍କୁ ଆସ୍ଥାନରୁ ଉଠାଯାଇଥାଏ । କାର୍ତ୍ତିକ ମାସର ମା'ଙ୍କ ଏହି ମାଣଓଷା ଦେଖିବାକୁ ଖାଲି କେନ୍ଦ୍ରାପଡା ନୁହେଁ ବିଭିନ୍ନ ଜିଲ୍ଲାରୁ ମହିଳାଙ୍କ ସୁଅ ଛୁଟିଥାଏ ।
ଦୀର୍ଘ 91 ବର୍ଷ ଧରି ଏଠାରେ କାର୍ତ୍ତିକ ମାସରେ ମା'ଙ୍କ ମାଣବସା ପୂଜା ପାଳନ ହୋଇଆସୁଛି । କାହିଁ କେଉଁ କାଳରୁ ମା'ଙ୍କ ଏହି ପାରମ୍ପରିକ ଓ କୌଳିକ ସେବାର ଦାୟିତ୍ବ ସହରର ମର୍ଦ୍ଦରାଜ ପରିବାରକୁ ଦିଆଯାଇଛି । ସବୁଠୁ ଗୁରୁତ୍ବପୂର୍ଣ୍ଣ ବିଷୟ, ମେଲଣ ସମୟରେ ଥାନାପତି ପୂଜା ମଣ୍ଡପର ମେଢକୁ ଗୋପାଳମାନେ କାନ୍ଧେଇ ନେବାର ପରମ୍ପରା ରହିଛି ।
ବିଭିନ୍ନତା ମଧ୍ୟରେ ଏକତା ଓ ଭାଇଚାରାର ସହର କେନ୍ଦ୍ରାପଡା । ଏଠାରେ ନଅ ଦିନ ଧରି ଧନଦାତ୍ରୀ ଦେବୀ ମା' ଗଜଲକ୍ଷ୍ମୀ ପୂଜା ପାଇଥାନ୍ତି । ଆଉ କାର୍ତ୍ତିକ ମାସରେ ମା'ଙ୍କ ମାଣଓଷା ଗୁରୁବାର ଦେଖିବାକୁ କାହିଁ କେତେ ଦୂରରୁ ଏଠାକୁ ଶ୍ରଦ୍ଧାଳୁଙ୍କ ସୁଅ ଛୁଟିଆସେ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
