କେନ୍ଦ୍ରାପଡା: ଗାନ୍ଧୀଜୀଙ୍କ ସ୍ବଚ୍ଛ ଭାରତର ସ୍ବପ୍ନକୁ ପୂରଣ କରିବା ପାଇଁ କେନ୍ଦ୍ର ସରକାର ପ୍ରତି ଘରେ ଶୌଚାଳୟ ନିର୍ମାଣ ପାଇଁ ଯୋଜନା ପ୍ରସ୍ତୁତ କରୁଛି ମାତ୍ର ଏହା ପ୍ରକୃତ ହିତାଧିକାରୀ ପାଖରେ ନପହଞ୍ଚି ବାଟମାରଣା ହେଉଛି । ଭଲକରି ଦେଖନ୍ତୁ ଏହି ଦୃଶ୍ୟ ଗୁଡିକୁ, କେଉଁଠି ଖଣ୍ଡିଏ ଇଟା ଯୋଡାଯାଇ ପାଞ୍ଚ ଇଞ୍ଚର କାନ୍ଥ ତ କେଉଁଠି ଶୌଚାଳୟ ଭିତରେ ଜାଳେଣୀ କାଠ । ଏନେଇ ଇଟିଭି ଭାରତ ପହଞ୍ଚିଥିଲା କେନ୍ଦ୍ରାପଡା ଜିଲ୍ଲାର ମହାକାଳପଡା ବ୍ଲକ ଅନ୍ତର୍ଗତ ନଛିପଡା ଗ୍ରାମର । ଏହି ଗ୍ରାମର ଲୋକ ଗରିବ ଶ୍ରେଣୀର ହୋଇଥିବାରୁ ନିଜେ ଶୌଚାଳୟ କରିବା ପାଇଁ ଅସମର୍ଥ ତେଣୁ ଏଜେଣ୍ଟ ଦ୍ବାରା କାର୍ଯ୍ୟ ହୋଇଥାଏ । କିନ୍ତୁ ସେମାନେ ନିର୍ମାଣ କରିଥିବା ଶୌଚାଳୟ ବ୍ୟବହାର ଯୋଗ୍ୟ ନୁହେଁ ।
ସବୁ ଯାଗାରେ ଶୌଚାଳୟ ହିତାଧିକାରୀଙ୍କୁ 12 ହଜାର ଟଙ୍କା ଦିଆଯାଇଥାଏ । ମାତ୍ର ଏହି ଗ୍ରାମର ଲୋକ ଏଜେନ୍ସିକୁ କାମ ଦେଇଥାନ୍ତି ମାତ୍ର ଏଜେନ୍ସି ନିମ୍ନ ମାନର କାର୍ଯ୍ୟ କରିଥିବା ଅଭିଯୋଗ ହୋଇଛି । ବାଧ୍ୟ ହୋଇ ଗ୍ରାମବାସୀ ଶୌଚାଳୟ ମଧ୍ୟରେ ଜାଳେଣି ରଖି ଖୋଲା ପଡିଆରେ ଶୌଚ କରିଥାନ୍ତି । ଏହାକୁ ନେଇ ଏଜେନ୍ସି ପାଖକୁ ଗଲେ ଏଜେନ୍ସି ନାଲି ଆଖି ଦେଖାଉଥିବା ଅଭିଯୋଗ ହୋଇଛି । ଏପରିକି ଅନେକ ପଞ୍ଚାୟତରେ ଶୌଚାଳୟ ନିର୍ମାଣ ନକରି କେବଳ ଗୋଟେ ପଟ କାନ୍ଥ ନିର୍ମାଣ କରିଥିବା ଫଟୋ ସୋସିଆଲ ମିଡିଆରେ ଘୁରି ବୁଲୁଛି ।
ଏମିତିକି ଅନେକ ସ୍ଥାନରେ ଶୌଚାଳୟ ନିର୍ମାଣ ନକରି କେବଳ ଗୋଟେ ପଟ କାନ୍ଥି ଉଠାଇ ମିଛ ବିଲ୍ ପ୍ରସ୍ତୁତ କରାଯାଇଛି ଓ ସେହି ଟଙ୍କାକୁ ଏଜେନ୍ସି ଲୁଟି ନେଇଥିବା ଅଭିଯୋଗ ହୋଇଛି । ଏପରିକି ସରକାରୀ ସହାୟତା ଥାଇ ମଧ୍ୟ ଲୋକଙ୍କୁ ପାଇପ୍, କବାଟ ଆଦି କିଣିବାକୁ କୁହାଯାଉଛି । ସରକାର 6ଟି ସିମେଣ୍ଟ ନନ୍ଦ ଦେଇଥିବା ବେଳେ ଏଜେନ୍ସି ଦୁଇଟି ନନ୍ଦରେ କାମ କରୁଥିବା ମଧ୍ୟ ଅଭିଯୋଗ ହୋଇଛି । ଏନେଇ କିନ୍ତୁ ବିଭାଗୀୟ ଅଧିକାରୀ ଚୁପ୍ । ଏହାର ସତ୍ୟାସତ୍ୟ ଜାଣିବା ପାଇଁ ଆମ ସମ୍ବାଦଦାତା, RWSS ବିଭାଗର ଆସିଷ୍ଟାଣ୍ଟ ଇଞ୍ଜିନିୟର ବିଜୟ କୁମାର କରଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରିଥିଲେ ମଧ୍ୟ ନିମ୍ନମାନର କାର୍ଯ୍ୟକୁ ନେଇ ତାଙ୍କର ଣସି ପ୍ରତିକ୍ରିୟା ମିଳିପାରି ନାହିଁ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
