କେନ୍ଦ୍ରାପଡା: ଆଜି ପବିତ୍ର ଦେବସ୍ନାନ ପୂର୍ଣ୍ଣିମା । ଏ ନେଇ ଚଳ ଚଞ୍ଜଳ ଶ୍ରୀକ୍ଷେତ୍ରଠୁ ନେଇ ତୁଳସୀ କ୍ଷେତ୍ର । ଭକ୍ତମୟ ହୋଇଛି ମନ୍ଦିର । କେନ୍ଦ୍ରାପଡା ବଳଦେବଜିଉ ମନ୍ଦିରରେ ସ୍ନାନପୂର୍ଣ୍ଣିମା ଅନୁଷ୍ଠିତ ହୋଇଛି । 2 ବର୍ଷ ପରେ ଭଗବାନଙ୍କୁ ପାଇ ଭକ୍ତ ଆଖିରେ ଲୁହ ଆସିଛି । ଭଗବାନଙ୍କୁ ଦର୍ଶନ କରି କୃତ୍ୟ କୃତ୍ୟ ହୋଇଛନ୍ତି ଭକ୍ତ । ଦେବସ୍ନାନ ପୂର୍ଣ୍ଣିମାରେ ରତ୍ନ ବେଦୀରୁ ଓହ୍ଲାଇ ଆସିଲେଣି ମଣିବିଗ୍ରହ । ସାମାନ୍ୟ ବିଳମ୍ବ ହୋଇଥିଲେ ମଧ୍ୟ ସକାଳ ୯ଟାରେ ସେବାୟତ ସମୂହ ଶ୍ରୀଜୀଉମାନଙ୍କୁ ପହଣ୍ଡି କରି ସ୍ନାନ ବେଦୀକୁ ଆଣିଛନ୍ତି ।
ମଧ୍ୟାହ୍ନରେ ସ୍ନାନମଣ୍ଡପରେ ଶ୍ରୀଜୀଉ ପହଞ୍ଚିବା ପରେ ମଙ୍ଗଳ ଆଳତି କରାଯାଇ ପୂର୍ବ ରାତ୍ରିରୁ ଅଭିମନ୍ତ୍ରିତ ହୋଇ ରହିଥିବା ୧୦୮ଗରା ଜଳରାଶିରେ ସ୍ନାନ କରାଇବେ ସେବାୟତ। ବର୍ଷରେ ଥରେ ଶ୍ରୀଜୀଉ ସ୍ନାନ ମଣ୍ଡପକୁ ଆସିଥିବା ବେଳେ ରଥଯାତ୍ରା ସମୟରେ ଭକ୍ତଙ୍କୁ ଦର୍ଶନ ଦେଇଥାନ୍ତି । ଦେବସ୍ନାନ ପୂର୍ଣ୍ଣିମାରେ ବ୍ରହ୍ମ ତାଳଧ୍ବଜ ରଥର ଚକରେ ଅଖ ସଂଯୋଗ କରାଯିବା ବିଧି ରହିଛି ।
ତେବେ ପ୍ରଭୁ ବଳଦେବଜୀଉଙ୍କ ସମେତ ଶ୍ରୀ ଜଗନ୍ନାଥ, ଭଉଣୀ ସୁଭଦ୍ରା ଓ ଶ୍ରୀ ସୁଦର୍ଶନକୁ ଦର୍ଶନ କରି ଜଗତର ମଙ୍ଗଳ କାମନା କରିଛନ୍ତି ଭକ୍ତ। ଅନ୍ୟପଟେ ସ୍ନାନପୂର୍ଣ୍ଣିମା ବିଧିରେ ସାମାନ୍ୟ କାର୍ଯ୍ୟକ୍ରମ ସମୟ ବିଳମ୍ବ ହୋଇଥିବା ବେଳେ ମଧ୍ୟାହ୍ନରେ ଶ୍ରୀଜୀଉଙ୍କ ସ୍ନାନ ପାଇଁ କାର୍ଯ୍ୟକ୍ରମ ରହିଛି ।
ଇଟିଭି ଭାରତ, କେନ୍ଦ୍ରାପଡା
