କେନ୍ଦ୍ରାପଡା: ଲକଡାଉନ ସମୟରେ କେହି ଭୋକିଲା ରହିବେନି । ସମସ୍ତଙ୍କୁ ଯୋଗାଇ ଦିଆଯିବ ରାସନ ସାମଗ୍ରୀ । ଏପରି କିଛି ଲକ୍ଷ୍ୟ ନେଇ କେନ୍ଦ୍ର ଓ ରାଜ୍ୟ ସରକାର ଆଣିଛନ୍ତି ପୁଳା ପୁଳା ଯୋଜନା । ହେଲେ ପ୍ରକୃତ ହିତାଧିକାରୀ ସୁଫଳ ପାଇବାରୁ ବଞ୍ଚିତ । ଆମେ କହୁଛୁ କେନ୍ଦ୍ରାପଡ଼ା ମହାକାଳପଡ଼ା ବ୍ଲକ ରାମନଗର ପଞ୍ଚାୟତର ୬ ନଂ ୱାର୍ଡ ବାସିନ୍ଦାଙ୍କ କଥା।
ସ୍ଥାନୀୟ ମାତୃ କଲ୍ୟାଣ ସ୍ବୟଂ ସହାୟକ ଗୋଷ୍ଠୀ ଏହି ୱାର୍ଡ ବାସିନ୍ଦାଙ୍କୁ ପୂର୍ବରୁ ରାସନ ସାମଗ୍ରୀ ଯୋଗାଉଥିବା ବେଳେ ଏବେ ବିଭିନ୍ନ ଆଳ ଦେଖାଇ କାର୍ଡ କାଟି ଦେଇଥିବା ଅଭିଯୋଗ ହୋଇଛି । ସରକାରଙ୍କ ଗାଇଡଲାଇନ ଅନୁଯାୟୀ ଯେଉଁମାନେ ପ୍ରଧାନମନ୍ତ୍ରୀ ଆବାସ ଅଥବା ବିଜୁ ପକ୍କାଘର ପାଇଥିବେ ସେମାନଙ୍କର କାର୍ଡ କଟାଯିବ ନାହିଁ ବୋଲି ଗାଇଡ଼ଲାଇନରେ ସ୍ପଷ୍ଟ ଉଲ୍ଲେଖ ରହିଛି । ତେବେ କିଏ ଓ କେଉଁ ଉଦ୍ଦେଶ୍ୟରେ ଗରିବ ଶ୍ରେଣୀୟ ଶ୍ରମିକ ମାନଙ୍କର କାର୍ଡ କାଟିଛି ତାହା ସମୟ କହିବ।
ସେପଟେ 75 ବର୍ଷୀୟ କୁସୁମ ମଣ୍ଡଳ ନାମକ ଜଣେ ନିରାଶ୍ରୟ ମହିଳା ସରକାରୀ ରାସନକୁ ଚାହିଁ ଚାହିଁ ଆଖିରୁ ପାଣି ଶୁଖିଲାଣି । ସେହିପରି ବାସନ୍ତୀ ନାୟକ ନାମକ ଜଣେ ସ୍ବାମୀ ପରିତ୍ୟକ୍ତା ମହିଳା ନିଜ ଝିଅକୁ ଧରି ବାପ ଘର ଜାଗାରେ ପଡି ରହିଥିଲେ ମଧ୍ୟ ରାସନ କାର୍ଡ ଓ ଏଥିରୁ ମିଳୁଥିବା ସାମଗ୍ରୀ ଏମାନଙ୍କ ପାଇଁ ସାତସପନ ପାଲଟିଛି।
ଏନେଇ ସ୍ଥାନୀୟ ଲୋକେ ବାରମ୍ବାର ଡିଲର, ସରପଞ୍ଚ, ବିଡ଼ିଓ ଓ ଜିଲ୍ଲାପାଳଙ୍କୁ ଭେଟି ଲିଖିତ ଅଭିଯୋଗ ଓ ରାସନ କାର୍ଡ ଯୋଗାଇଦେବା ପାଇଁ ଅନୁରୋଧ କରିଥିଲେ ମଧ୍ୟ କୌଣସି ସୁଫଳ ମିଳି ପାରୁ ନାହିଁ । ସେପଟେ ଜିଲ୍ଲା ବେସାମରିକ ଯୋଗାଣ ଅଧିକାରୀଙ୍କୁ ଏବିଷୟରେ ପଚରା ଯିବାରୁ ସେ ଏହା ବିଷୟରେ ଜାଣିନାହାନ୍ତି ବୋଲି କହିଛନ୍ତି । ରାଜ୍ୟ ସରକାରଙ୍କର ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ବର୍ତ୍ତମାନ ନୂଆ ପଞ୍ଜୀକରଣ ଚାଲୁ ରହିଛି ତେଣୁ ସେମାନେ ନୂତନ ଭାବରେ ଆବେଦନ କରିପାରିବେ । ଯୋଗ୍ୟ ହିତାଧିକାରୀ ଚୟନ କରାଯାଇ ପ୍ରତ୍ୟେକ ସପ୍ତାହରେ ନୂତନ ହିତାଧିକାରୀଙ୍କ ଚାଉଳ ଉଠାଣ ଏବଂ ରିଲିଫ ଟଙ୍କା ପ୍ରଦାନ କରାଯିବ ବୋଲି କହିଛନ୍ତି ଯୋଗାଣ ଅଧିକାରୀ ।
କେବେ ଉପକୂଳବର୍ତ୍ତୀ ମହାକାଳପଡ଼ା ବ୍ଲକ ରାମନଗର ପଞ୍ଚାୟତ ୬ନଂ ୱାର୍ଡ ବାସିନ୍ଦାଙ୍କ ଦୁଃଖ ଦୂର ହେବ ଏବଂ କେବେ ଏମାନଙ୍କୁ ରାସନ କାର୍ଡ ମିଳିବ ଦେଖିବାକୁ ବାକି ରହିଲା ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
