କେନ୍ଦ୍ରାପଡ଼ା: ମଙ୍ଗଳବାର ପବିତ୍ର ଶ୍ରୀଗୁଣ୍ଡିଚା ଯାତ୍ରା । କେନ୍ଦ୍ରାପଡାର ଆରାଧ୍ୟ ଦେବତା ପ୍ରଭୁ ଶ୍ରୀବଳଦେବଜୀଉଙ୍କ ରଥଯାତ୍ରା ପାଇଁ ପ୍ରସ୍ତୁତି ସମ୍ପୂର୍ଣ୍ଣ ହୋଇଛି । ସୋମବାର ସନ୍ଧ୍ୟାରେ ବ୍ରହ୍ମତାଳଧ୍ଵଜ ରଥରେ ନେତ ବନ୍ଧା ହୋଇ ରଥ ପ୍ରତିଷ୍ଠା ହୋଇଛି । ଯେହେତୁ ରଥ ପ୍ରତିଷ୍ଠା ନୀତି ଶେଷ ହେବାପରେ କପଡା ଲାଗି ହେବାର ପରମ୍ପରା ରହିଛି, ସେଥିପାଇଁ ପ୍ରଭୁ ଶ୍ରୀବଳଦେବଜୀଉଙ୍କ ରଥ ପ୍ରତିଷ୍ଠା ପରେ କପଡ଼ା ଲାଗି କାର୍ଯ୍ୟ ମଧ୍ୟ ସମ୍ପନ୍ନ ହୋଇଛି ।
ତେବେ ମଙ୍ଗଳବାର ମହାପ୍ରଭୁଙ୍କ ଶ୍ରୀଗୁଣ୍ଡିଚାରେ ଅପରାହ୍ନ ୨ଟାରୁ ୪ଟା ମଧ୍ୟରେ ଶ୍ରୀଜୀଉ ମାନଙ୍କ ପହଣ୍ଡି ବିଜେ କରାଯିବ । ଏହାପରେ ୫ଟା ସୁଦ୍ଧା ରଥ ଟଣା ଯିବା ନେଇ ନୀତି ନିର୍ଘଣ୍ଟ ସ୍ଥିର ହୋଇଛି । ରଥଯାତ୍ରାକୁ ଶାନ୍ତି ଶୃଙ୍ଖଳାର ସହିତ ପରିଚାଳନା କରିବା ପାଇଁ ପୋଲିସ ମୁତୟନ କରାଯିବା ସହ ପ୍ରଶାସନ ଓ ପୌରସଂସ୍ଥା ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି । ରଥଯାତ୍ରା ସମୟରେ ପାନୀୟଜଳ, ନୀରବଚ୍ଛିନ୍ନ ବିଦ୍ୟୁତ୍ ସେବା, ପରିଷ୍କାର ପରିଚ୍ଛନ୍ନତା ପ୍ରତି ବିଶେଷ ଧ୍ୟାନ ଦିଆଯିବ ବୋଲି ସୂଚନା ଦିଆଯାଇଛି । ତେବେ ରବିବାର ଅନବସର ପରେ ମହାପ୍ରଭୁ ରୋହିଣୀ ନନ୍ଦନ ଶ୍ରୀବଳଦେବଜୀୟୁଙ୍କ ନେତ୍ରୋତ୍ସବ ଅନୁଷ୍ଠିତ ହୋଇଥିଲା । ଏହି ଅବସରରେ ମଣି ବିଗ୍ରହଙ୍କୁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଦର୍ଶନ କରିଥିଲେ । ସୋମବାର ମଧ୍ୟ ଉଭା ଅମାବାସ୍ୟା ତିଥି ଥିବାରୁ ଶ୍ରୀଜୀଉଙ୍କ ଦର୍ଶନ ଜାରି ରହିଛି ।
