କେନ୍ଦ୍ରାପଡ଼ା: କାର୍ଯ୍ୟରତ ସାମ୍ବାଦିକଙ୍କୁ ପୋଲିସ ବାବୁଙ୍କ ଦୁର୍ବ୍ୟବହାର । ନାଲି ଆଖି ଦେଖାଇବା ସହ ହାତ ଉଠାଇଲେ ନିୟମ ଦେଖାଉଥିବା ନୀତିଶେଖର । ଘଟଣାନୁଯାୟୀ ବୁଧବାର ପାଟକୁରା ନିର୍ବାଚନ ମଣ୍ଡଳୀକୁ ମୁଖ୍ୟମନ୍ତ୍ରୀ ପ୍ରଚାର ଗସ୍ତ ଥିଲା । ଏହି ଅବସରରେ କେନ୍ଦ୍ରାପଡ଼ା ବାରିମୂଳସ୍ଥିତ ହେଲିପ୍ୟାଡ଼ ନିକଟରେ ଖବର ସଂଗ୍ରହ ପାଇଁ ବୈଦ୍ୟୁତିକ ଗଣମାଧ୍ୟମର ଉକ୍ତ ସାମ୍ବାଦିକ ଉପସ୍ଥିତ ରହିଥିଲେ ।
ଏହି ସମୟରେ କେନ୍ଦ୍ରାପଡ଼ା ଆରକ୍ଷୀ ଅଧିକ୍ଷକ ନୀତିଶେଖର ସମସ୍ତ ସାଧାରଣ ଜନତାଙ୍କୁ ଉକ୍ତ ସ୍ଥାନରୁ ଦୂରେଇ ଯିବା ପାଇଁ କହିଥିଲେ ଓ ଉକ୍ତ ସାମ୍ବାଦିକଙ୍କୁ ମଧ୍ୟ ଠେଲି ଦେଇଥିଲେ । ସେ ନିଜକୁ ଗଣମାଧ୍ୟମ ପ୍ରତିନିଧି ବୋଲି ପରିଚୟ ଦେଇଥିଲେ ଏବଂ ତାଙ୍କ ହାତରେ ବୁମ ମଧ୍ୟ ରହିଥିଲା । କିନ୍ତୁ ଏସପି ମହାଶୟ କିଛି ଶୁଣିବାକୁ ପ୍ରସ୍ତୁତ ନ ଥିଲେ । ପରେ ତାଙ୍କୁ ଦୁର୍ବ୍ୟବହାର କରିବା ସହ ସର୍ବସମ୍ମୁଖରେ ଧକ୍କା ମାରିଥିବା ଓ ହାତ ଉଠାଇଥିବା ଭିଡ଼ିଓ ଏବେ ସାମାଜିକ ଗଣମାଧ୍ୟମରେ ଘୁରି ବୁଲୁଛି ।
ଏଠାରେ ପ୍ରଶ୍ନ ଉଠୁଛି ଗଣମାଧ୍ୟମ ଯଦି ଏଠାରେ ନିରାପଦ ନୁହେଁ ଏବଂ ଜଣେ ଆରକ୍ଷୀ ଅଧିକାରୀ ଯଦି ଏଭଳି ବ୍ୟବହାର କରନ୍ତି, ତେବେ ତାହା କେଉଁ ଆଡକୁ ଅଙ୍ଗୁଳି ନିର୍ଦ୍ଦେଶ କରିବ? ଗଣତନ୍ତ୍ରର ଚତୁର୍ଥସ୍ତମ୍ବକୁ ନାଲି ଆଖି ଦେଖାଇବା କି ପ୍ରକାର ସମ୍ମାନ ? ଅନ୍ୟପକ୍ଷରେ ଏସପିଙ୍କର ଏପରି ଦୁର୍ବ୍ୟବହାରକୁ ଜିଲ୍ଲାର ବରିଷ୍ଠ ସାମ୍ବାଦିକ ତଥା ନ୍ୟାସନାଲ ୟୁନିୟନ ଅଫ ଜର୍ଣ୍ଣାଲିଷ୍ଟର ସଦସ୍ୟ ଚିତ୍ତରଞ୍ଜନ ଦାସ ନିନ୍ଦା କରିବା ସହ ଏସପି ନୀତିଶେଖରଙ୍କ ବିରୋଧରେ ରାଜ୍ୟ ସରକାର କଡା ପଦକ୍ଷେପ ନିଅନ୍ତୁ ବୋଲି ଦାବି କରିଛନ୍ତି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
