କେନ୍ଦ୍ରାପଡା: ମହାକାଳପଡା ଅଞ୍ଚଳରେ ଲଜ୍ୟା । ନାବାଳିକାକୁ ଦୁଷ୍କର୍ମ ଘଟଣାର 15 ଦିନ ପରେ ବି ପୋଲିସ ହାତ ଖାଲି । ଅଭିଯୁକ୍ତକୁ ଗିରଫ ଦାବିରେ ପୀଡିତାଙ୍କ ସହ ଆସି ଅତିରିକ୍ତ ଜିଲ୍ଲାପାଳଙ୍କୁ ଦାବିପତ୍ର ଦେଲେ ସ୍ଥାନୀୟ ମହିଳା ।
ମହାକାଳପଡା ଅଞ୍ଚଳର ଜଣେ ନବମ ଶ୍ରେଣୀ ଛାତ୍ରୀଙ୍କୁ ଗତ 14 ତାରିଖରେ ଦୁଷ୍କର୍ମ ହୋଇଥିବା ଅଭିଯୋଗ ହୋଇଥିଲା । ଅଭିଯୋଗ ଅନୁଯାୟୀ, 14 ତାରିଖ ରାତି 9ଟାରେ ସମ୍ପର୍କୀୟ ଭାଉଜଙ୍କ ଭାଇ ତଥା ଆଡୋଇ ଗ୍ରାମର ପ୍ରମୋଦ ଗୋଛାୟତଙ୍କ ପୁଅ ବିଜ୍ଞାନ ଗୋଛାୟତ ଛାତ୍ରୀଙ୍କୁ ବିସ୍କୁଟ, ମିକ୍ସଚର ଦେବା ନାଁରେ ଗାଁଠୁ କିଛି ବାଟ ଡାକି ଦୁଷ୍କର୍ମ କରିଥିଲା । ଦୁଷ୍କର୍ମ କରିବା ପରେ ସେଠାରେ ଛାତ୍ରୀ ଜଣଙ୍କୁ ଧମକ ଦେଇ ପଳାଇଥିଲା ।
ଏହା ଜାଣିବା ପରେ ଘଟଣାର ପରଦିନ ପୀଡିତାଙ୍କ ବାପା ଆଡୋଇ ଗ୍ରାମକୁ ଯାଇ ବିଜ୍ଞାନ ଓ ତାଙ୍କ ପରିବାର ଏବାବଦରେ କହିବାରୁ ତାଙ୍କୁ ସେମାନେ ଗାଳିଗୁଲଜ କରିବା ସହ ଜୀବନରୁ ମାରିଦେବାକୁ ଧମକ ଦେଇଥିଲେ । ସେଠାରୁ ନିରାଶ ହୋଇ ପୀଡିତାଙ୍କ ବାପା ମହାକାଳପଡା ଥାନାରେ ବିଜ୍ଞାନଙ୍କ ବିରୋଧରେ ଏତଲା ଦାୟର କରିଥିଲେ ।
ତେବେ ଅଭିଯୋଗ ପରେ ଥାନାଅଧିକାରୀ ଛାତ୍ରୀଙ୍କୁ ଡାକ୍ତରୀ ମାଇନା କରି ଚୁପ୍ ବସିଥିବା ଅଭିଯୋଗ ହୋଇଛି । ଘଟଣାର 15 ଦିନ ପରେ ବି ପୋଲିସ ଅଭିଯୁକ୍ତକୁ ଗିରଫ କରିନଥିବାରୁ ପୀଡିତାଙ୍କ ସହ ଅନେକ ମହିଳା ଶୁକ୍ରବାର ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ନ୍ୟାୟ ପାଇଁ ନାରାବାଜି କରିବା ସହ ଜିଲ୍ଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
