କେନ୍ଦ୍ରାପଡା: ସ୍କୁଲରେ ସରକାରୀ ଅର୍ଥ ଆତ୍ମସାତ୍ ନେଇ ବାଜିଲା ଖବର । ଛାତ୍ରଛାତ୍ରୀଙ୍କ ନିକଟରେ ପହଞ୍ଚିଲେ ଜିଲ୍ଲା ଶିକ୍ଷାଧିକାରୀ । ଇଟିଭି ଭାରତରେ ପ୍ରସାରିତ "କାମ ନକରି ଖାଇଗଲେ ଲକ୍ଷାଧିକ ଟଙ୍କା !" ଶୀର୍ଷକ ଖବର ଆଧାରରେ ସୁଶ୍ରୀଦେବୀ ହାଇସ୍କୁଲରେ ପହଞ୍ଚି ତଥ୍ୟ ସଂଗ୍ରହ କରିଛନ୍ତି କେନ୍ଦ୍ରାପଡ଼ା ଜିଲ୍ଲା ଶିକ୍ଷାଧିକାରୀ ଦାୟିତ୍ବରେ ଥିବା ଶୁଭଲକ୍ଷ୍ମୀ ନାୟକ(Kendrapara DEO Subhalaxmi Nayak) । ଗତ ୨୨ ତାରିଖରେ କେନ୍ଦ୍ରାପଡା ରାଜକନିକା ବ୍ଲକ ସୁଶ୍ରୀଦେବୀ ହାଇସ୍କୁଲରେ ଡାଇନିଂ ହଲ୍ ଓ ଶୌଚାଳୟ ବାବଦକୁ ଆସିଥିବା ଅର୍ଥ ହଡପ ହୋଇଥିବା ନେଇ ଗଣମାଧ୍ୟମ ଆଗରେ ଅଭିଯୋଗ କରିଥିଲେ ବିଦ୍ୟାଳୟର ଛାତ୍ରଛାତ୍ରୀ ।
୨୦୨୧-୨୨ ଶିକ୍ଷାବର୍ଷରେ ଡାଇନିଂ ହଲ ବାବଦକୁ ଆସିଥିବା ଅର୍ଥକୁ ବାଟମାରଣା କରାଯାଇଥିବା ନେଇ ସରକାରୀ ୱେବସାଇଟରୁ ତଥ୍ୟ ମିଳିବା ପରେ ଏହାକୁ ବିରୋଧ କରି ଛାତ୍ରଛାତ୍ରୀ ପାଠପଢ଼ା ବନ୍ଦ କରି ବିଦ୍ୟାଳୟ ପରିସରରେ ଆନ୍ଦୋଳନ ଚଳାଇଥିଲେ । ଏହି ଘଟଣା ସମ୍ପର୍କରେ ପ୍ରଥମେ ଇଟିଭି ଭାରତରେ ଖବର ପ୍ରସାରଣ ପରେ ଜିଲ୍ଲା ଶିକ୍ଷାଧିକାରୀ ଉକ୍ତ ବିଦ୍ୟାଳୟକୁ ଯାଇ ଛାତ୍ରଛାତ୍ରୀଙ୍କ ସହ ଆଲୋଚନା କରି ସେମାନଙ୍କୁ ଆନ୍ଦୋଳନ ଛାଡି ପାଠ ପଢିବା ପାଇଁ ପରାମର୍ଶ ଦେଇଛନ୍ତି । ତେବେ ଏହି ଦୁର୍ନୀତିରେ ସମ୍ପୃକ୍ତ ଅଭିଯୁକ୍ତଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଛାତ୍ରୀମାନେ ଶିକ୍ଷାଧିକାରୀ ଶୁଭଲକ୍ଷ୍ମୀଙ୍କ ଗୋଡ଼ ଧରି ଅନୁରୋଧ କରିବାର ଦୃଶ୍ୟ ହଠାତ ପରିବେଶକୁ ବେଶ୍ ସରଗରମ କରିଥିଲା । ଯଥାଶୀଘ୍ର ବିଦ୍ୟାଳୟ ପରିସରରେ ଶୌଚାଳୟ ନିର୍ମାଣ ପାଇଁ ଶିକ୍ଷାଧିକାରୀ(Kendrapara DEO) ପ୍ରତିଶ୍ରୁତି ଦେବା ସହ ଘଟଣାରେ ତଦନ୍ତ କରିବା ପାଇଁ ପ୍ରତିଶ୍ରୁତି ଦେଇଛନ୍ତି ।
ତେବେ ଏହି ସମୟରେ ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ ମଧ୍ୟାହ୍ନ ଭୋଜନ କରୁଥିବା ବେଳେ ଶିକ୍ଷାଧିକାରୀ ଚପଲ ପିନ୍ଧି ସେମାନଙ୍କ ଭିତରେ ଯିବାକୁ ଅନେକ ଅଭିଭାବକ ନାପସନ୍ଦ କରିଥିଲେ । ଜିଲ୍ଲାର ଜଣେ ଉଚ୍ଚପଦସ୍ଥ ଅଧିକାରୀ ହୋଇ କିପରି ଛାତ୍ରଛାତ୍ରୀଙ୍କ ଖାଇବା ବେଳେ ଚପଲ ପିନ୍ଧି ସେମାନଙ୍କ ଭିତରକୁ ଗଲେ ସେନେଇ ପ୍ରଶ୍ନ କରିଥିଲେ ଅଭିଭାବକ । ଏହାର ଜବାବରେ ଶିକ୍ଷାଧିକାରୀ କହିଥିଲେ ଯେ, ''ସେ ନିଜ କର୍ତ୍ତବ୍ୟ ପାଳନ ସମ୍ପର୍କରେ ଅବଗତ ଅଛନ୍ତି ।'' ସେ ସରକାରୀ ନିୟମ ଅବଲମ୍ବନ କରିଥିବା ଜଣାଇବା ସହ ଗଣମାଧ୍ୟମକୁ ଓଲଟା ପ୍ରଶ୍ନ କରିଥିଲେ ।
ଇଟିଭି ଭାରତ, କେନ୍ଦ୍ରାପଡା
