କେନ୍ଦ୍ରାପଡା: ଚାଷୀ ମୁଣ୍ଡରେ ଚଡକ । ନୂଆକରି ବାହାରିଥିବା ଧାନକେଣ୍ଡାରେ ସାଲୁବାଲୁ ପୋକ । ଏକର ଏକର ଧାନ ଗଛରେ ପୋକ ଚରିଯିବା ପରେ ଏବେ ଚିନ୍ତାରେ କେନ୍ଦ୍ରାପଡା ଚାଷୀ। କାଣ୍ଡବିନ୍ଧା ପୋକ ସମେତ ଅନ୍ୟ ଅଜଣା ରୋଗପୋକ ଆକ୍ରମଣରେ ଧାନଚାଷ ପ୍ରଭାବିତ ହୋଇଛି । ଧାର କରଜ କରି ଚାଷରେ ଖର୍ଚ୍ଚ କରିଥିବା ଚାଷୀ ମୁଣ୍ଡରେ ସତେ ଯେପରି ଚଡକ ପଡିଛି। କୀଟନାଶକ ବ୍ୟବହାର ପରେ ବି ସମସ୍ୟାର ସମାଧାନ ହେଉ ନାହିଁ।
ଧାନଗଛରେ ପୋକ ସାଲୁବାଲୁ । କଁଅଳିଆ ଧାନପତ୍ର ସମେତ ନୂଆକରି ବାହାରିଥିବା ଧାନକେଣ୍ଡାକୁ ଏହି ପୋକ ଯେମିତି ଚରି ଯାଉଛନ୍ତି । ଧାନକେଣ୍ଡାରେ ପୋକ ଲାଗିବା ପରେ ଗଛ କଶରା ହୋଇ ପଡିବା ସହ ଦୁର୍ବଳ ହୋଇଯାଉଛି । ଫଳରେ ଚାଷୀର ବର୍ଷକର ଆହାର ଧାନଗଛ ସମ୍ପୂର୍ଣ୍ଣ ନଷ୍ଟ ହୋଇଯାଉଛି । ଏନେଇ କେନ୍ଦ୍ରାପଡା ଜିଲ୍ଲା କୁଶଳପୁର, ଆୟବା, ଓସ୍ତପୁର ,କଂସାର ପ୍ରଭୃତି ଅଞ୍ଚଳରେ ଶହ ଶହ ଏକର ଧାନ ଚାଷ ଏବେ ଏହି ରୋଗପୋକ ଦ୍ୱାରା ଆକ୍ରାନ୍ତ ହୋଇପଡିଛି । ସ୍ଥାନୀୟ ଚାଷୀ ନିଜ ଉଦ୍ୟମରେ କୀଟନାଶକ ବ୍ୟବହାର କରୁଥିବା ବେଳେ ଫଳ କିନ୍ତୁ ଶୂନ୍ୟ ରହୁଛି । ଅନ୍ୟପେଟେ ଦିନରେ ପୋକଗୁଡିକ ଲୁଚି ଯାଉଥିବା ବେଳେ ବିଶେଷ କରି ରାତି ବେଳା ଧାନକେଣ୍ଡାରେ ଚରି ଯାଉଥିବା ଚାଷୀ କହିଛନ୍ତି । ରୋଗ ପୋକ ନିୟନ୍ତ୍ରଣ ପାଇଁ ବିଭିନ୍ନ ଉପାୟ କରି ନିରାଶ ହେବା ପରେ ଏବେ ଭାଗ୍ୟକୁ ଭରସା କରିଛନ୍ତି ଚାଷୀ ।
ତେବେ ଏହି ପୋକ ଏକ ପ୍ରକାର କାଣ୍ଡବିନ୍ଧା ପୋକ ବୋଲି ସ୍ଥାନୀୟ ଚାଷୀ କହିଥିବା ବେଳେ ଆଉ କିଛି ଏହା ଅଜଣା ପୋକ ବୋଲି କହିଛନ୍ତି । ଏହି ପୋକ ବ୍ୟତୀତ ଚଳିତ ବର୍ଷ ଧାନ ଚାଷ ଅନ୍ୟ ରୋଗରେ ମଧ୍ୟ ଆକ୍ରାନ୍ତ ହୋଇଛି । ଚଳିତ ବର୍ଷ ଭଲ ଧାନଚାଷ ହୋଇଥିବା ବେଳେ ଭଲ ଅମଳ ନେଇ ମଧ୍ୟ ଆଶାବାଦୀ ହୋଇପଡ଼ିଥିଲେ ଚାଷୀ। କିନ୍ତୁ ଚାଷୀର ସବୁ ସ୍ବପ୍ନ ଧୂଳିସାତ ହୋଇଯାଇଛି । ପୋକ ମୁଁହରେ ଉଜୁଡି ଯିବାକୁ ବସିଛି ଚଳିତ ବର୍ଷର ଧାନଚାଷ। ଧାନ ଚାଷ ପାଇଁ ଧାର ଉଧାର କରି ଋଣଗ୍ରସ୍ତ ହୋଇଥିବା ଚାଷୀ ପାଇଁ ଏହି ସମସ୍ୟା ବୋଝ ଉପରେ ନଳିତା ବିଡା ସଦୃଶ ହୋଇଛି ।
ଏନେଇ ଜିଲ୍ଲା କୃଷି ଉପ ନିର୍ଦ୍ଦେଶକଙ୍କ ସହ ଯୋଗାଯୋଗ କରାଯାଇ ଥିଲେ ମଧ୍ୟ ସେ କୌଣସି ପ୍ରତିକ୍ରିୟା ଦେଇ ନାହାନ୍ତି । ତେଣୁ ଏନେଇ ଜିଲ୍ଲା କୃଷିବିଭାଗ ରୋଗ ପୋକ ଚିହ୍ନଟ କରିବା ସହ ଏହାର ନିରାକରଣ ପାଇଁ ଚାଷୀମାନଙ୍କୁ ଉପଯୁକ୍ତ ପରାମର୍ଶ ଦେବାପାଇଁ ସ୍ଥାନୀୟ ଚାଷୀ ଦାବି କରିଛନ୍ତି ।
ଇଟିଭି ଭାରତ, କେନ୍ଦ୍ରାପଡା
