କେନ୍ଦ୍ରାପଡା: ଥମୁନି କେନ୍ଦ୍ରାପଡା କୋ-ଅପରେଟିଭ ବ୍ୟାଙ୍କ ସୋସାଇଟିର ଚର୍ଚ୍ଚା । କାର୍ଯ୍ୟରତ ଯୁବତୀଙ୍କୁ ଅସଦାଚରଣ ଅଭିଯୋଗରେ ସଭାପତି ପ୍ରମୋଦ ସାହୁ ଗିରଫ ପରେ ସମାନ ଅଭିଯୋଗରେ ସୋସାଇଟିର ଇନସ୍ୟୁରାନ୍ସ ଆଡ଼ଭାଇଜର କମଳାକାନ୍ତ ସୁଆରକୁ କେବେ ଗିରଫ କରାଯିବ ତାକୁ ନେଇ ଉଠିଛି ପ୍ରଶ୍ନ । କମଳାକାନ୍ତ ପୀଡିତାଙ୍କ ସମ୍ପର୍କୀୟ ମାମୁଁ ହୋଇଥିବାବେଳେ ତାଙ୍କ ଠାରୁ ଲକ୍ଷେ ଟଙ୍କା ଲାଞ୍ଚ ନେଇ ଚାକିରୀ ଦେବା ସହ ସଭାପତିଙ୍କୁ ଖୁସି କରିବାକୁ ସେ କହିଥିଲେ। ବହୁ ବଡବଡ ନେତାଙ୍କ ସହ ଥିବା ଫଟୋ ତାଙ୍କୁ ଜଣେ ପ୍ରଭାବଶାଳୀ ବ୍ୟକ୍ତି ଭାବେ ପରିଚିତ କରୁଥିବାରୁ ତାଙ୍କୁ ଯଥାଶୀଘ୍ର ଗିରଫ କରାନଗଲେ ପୀଡିତାଙ୍କ ଜୀବନ ପ୍ରତି ବିପଦ ଥିବା ଅଭିଯୋଗ ହେଉଛି ।
ତେବେ ଆଳୁ ଖୋଳୁ ଖୋଳୁ ମହାଦେବ ବାହାରିବା ପରି ଏହି ମାମଲା ପଦାକୁ ଆସିବା ପରେ ସୋସାଇଟିରେ କୋଟି କୋଟି ଟଙ୍କା ହେରଫେର ହୋଇଥିବା ଅଭିଯୋଗ ସାମ୍ନାକୁ ଆସିଛି । କୌଣସି ବ୍ୟକ୍ତି ଏହି ସୋସାଇଟିରୁ 40 ହଜାରରୁ ଅଧିକ ଋଣ ନେଲେ ସେ ଏଲଆଇସି କରିବାକୁ ବାଧ୍ୟ । ଯାହାର କମିଶନ ସୋସାଇଟି ଆକାଉଣ୍ଟକୁ ଆସିବା କଥା । ହେଲେ ଏହା ସୋସାଇଟିକୁ ନ ଆସି ସିଧାସଳଖ କମଳାକାନ୍ତଙ୍କ ଆକାଉଣ୍ଟକୁ ଯାଏ । ଏହା ସହ ସୋସାଇଟିରେ ଫଲ୍ସ ଭାଉଚର ମଧ୍ୟ କରାଯାଏ । ଯାହାର ଅଭିଯୋଗ କରିବାରୁ କିଛି ଦିନ ପୂର୍ବେ ସିନିଆର ମ୍ୟାନେଜର ରାଜଦୀପ ପଢିଆରୀଙ୍କୁ ନିଲମ୍ବନ କରାଯାଇଛି । ସେପଟେ ଏସବୁ ବାବଦରେ ଆସିଷ୍ଟାଣ୍ଟ ରେଜିଷ୍ଟ୍ରାର ଅଫ କୋ ଅପରେଟିଭ ସୋସାଇଟିଙ୍କ ନିକଟରେ ଅଭିଯୋଗ ହୋଇଥିଲେ ବି ସେ ଏହାକୁ ବ୍ୟକ୍ତିଗତ ମାମଲା ବୋଲି କହିଛନ୍ତି ।
ଜିଲ୍ଲାରେ ଏଭଳି ଘଟଣାକୁ ନେଇ ଚାରିଆଡେ ପ୍ରତିକ୍ରିୟା ପ୍ରକାଶ ପାଇବା ଓ ଗତ 4ତାରିଖରେ ରେଜିଷ୍ଟ୍ରାରଙ୍କ ଦ୍ବାରା ସଭାପତିଙ୍କୁ ବହିଷ୍କୃତ କରାଯିବା ପରେ ମଧ୍ୟ ଏଆରସିଏସଙ୍କ ଏହି ପ୍ରତିକ୍ରିୟା ସଭାପତି ଓ ଇଂସ୍ୟୁରାନ୍ସ ଆଡଭାଇଜରଙ୍କ ଚାପକୁ ସ୍ପଷ୍ଟ ପ୍ରମାଣିତ କରୁଥିବା କୁହାଯାଉଛି। ଏହି ଅସଦାଚରଣ ମାମଲାରେ ପୋଲିସ କାର୍ଯ୍ୟାନୁଷ୍ଠାନ ନେଉନଥିବାର ଖବର ‘ଇଟିଭି ଭାରତ’ରେ ପ୍ରସାରଣ ପରେ ଅଭିଯୁକ୍ତ ସଭାପତିଙ୍କୁ ଗିରଫ କରାଯାଇଥିଲା । ତେବେ ଏହି ଘଟଣାର ଅନ୍ୟ ଅଭିଯୁକ୍ତ କମଳାକାନ୍ତଙ୍କୁ ପୋଲିସ କେବେ ଗିରଫ କରୁଛି ତାହା ଦେଖିବାର କଥା।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
