କେନ୍ଦ୍ରାପଡା: ଏକ ହତ୍ୟା ଅଭିଯୋଗରେ ଯୁବକଙ୍କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି କେନ୍ଦ୍ରାପଡା ଜିଲ୍ଲା ଦୌରାଜଜ୍ । କେନ୍ଦ୍ରାପଡା ଜିଲ୍ଲା ରାଜନଗର ଥାନା ଅନ୍ତର୍ଗତ ଟାଙ୍ଗଣତଳା ଗାଁରେ ଜଣେ ମହିଳାଙ୍କ ହତ୍ୟା ଅଭିଯୋଗରେ ଅଭିଯୁକ୍ତକୁ ଏହି ଦଣ୍ଡାଦେଶ ଶୁଣାଯାଇଛି । ଯୁବକ ଜଣକ ହେଲେ ଟାଙ୍ଗଣତଳା ଗାଁର ବୁଢା ଓରଫ ସୁଶୀଲ ରାଉତ ।
ସୁଶୀଲ ହତ୍ୟା କରିଥିବା ମହିଳା ଜଣକ ସେହି ଗାଁର । ସେହି ମହିଳାଙ୍କ ଦୁଇଟି ସନ୍ତାନ ଥିବାବେଳେ ତାଙ୍କ ସ୍ବାମୀ ନେପାଳରେ ପାଣି ପାଇପ ମିସ୍ତ୍ରୀ ଭାବରେ କାମ କରନ୍ତି । ଏହାର ସୁଯୋଗ ନେଇ ସୁଶୀଲ ରାଉତ ମହିଳାଙ୍କ ସହ ଅନୈତିକ ସମ୍ପର୍କ ରଖିଥିଲା ।
ଯେତେବେଳେ ମହିଳାଙ୍କ ଶଶୁରଘର ଲୋକେ ଏ ବିଷୟରେ ଜାଣିଲେ ପରେ ସୁଶୀଲ ମହିଳାଙ୍କୁ ପୋଖରୀ କୂଳକୁ ନେଇ କଟୁରୀରେ ହାଣି ହତ୍ୟା କରିଥିଲା । ପରେ ଏକ ସୁଇସାଇଡ୍ ନୋଟ୍ ଲେଖି ଆତ୍ମହତ୍ୟା କରିବାକୁ ଉଦ୍ୟମ କରୁଥିବାବେଳେ ଗ୍ରାମବାସୀ କାବୁ କରି ପୋଲିସକୁ ଖବର ଦେଇଥିଲେ ।
ଏହି ଘଟଣା ୨୦୧୪ ମସିହା ଅକ୍ଟୋବର ମାସ ୧୧ରେ ଘଟିଥିବା ବେଳେ ରାଜନଗର ଥାନା ପୋଲିସ ସୁଶୀଲକୁ ଗିରଫ କରି କୋର୍ଟ ଚାଲାଣ କରିଥିଲା । ଏହି ମାମଲାର ବିଚାର କରି କେନ୍ଦ୍ରାପଡା ଜିଲ୍ଲା ଦୌରାଜଜ୍ ଅଭିଯୁକ୍ତ ସୁଶିଲକୁ ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ ୨୦ହଜାର ଟଙ୍କା ଜୋରିମାନା ଆଦେଶ ଦେଇଛନ୍ତି । ଜୋରିମାନା ଅନାଦେୟ ୧ବର୍ଷ ଅଧିକ କାରାଦଣ୍ଡରେ ଦଣ୍ଡିତ କରିଛନ୍ତି କେନ୍ଦ୍ରାପଡା ଜିଲ୍ଲା ଦୌରାଜଜ୍ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
