କେନ୍ଦ୍ରାପଡା: ରାଜ୍ୟରେ ଆରମ୍ଭ ହୋଇଛି ପବିତ୍ର ଲକ୍ଷ୍ମୀ ପୂଜା । ଧନଧାନ୍ୟର ଦେବୀ ମା ଲକ୍ଷ୍ମୀ ଆଜି ଧରାବତାରଣ କରିଛନ୍ତି । ଏହି ଗଣପର୍ବ ପାଇଁ କେନ୍ଦ୍ରାପଡା ଜିଲ୍ଲାରେ ସହର ଠାରୁ ଗାଁ ଉତ୍ସବ ମୁଖର ହୋଇଉଠିଛି । ହେଲେ ଚଳିତ ବର୍ଷ କୋରୋନା ମହାମାରୀ ପାଇଁ ପୂର୍ବ ଭଳି ଝଲସୁନି ପୂଜା ମଣ୍ଡପ । କଟକଣା ମଧ୍ୟରେ ନିରାଡ଼ମ୍ବରରେ ମା ପଦ୍ମାଳୟାଙ୍କ ପୂଜାର୍ଚ୍ଚନା କରାଯିବାକୁ ପ୍ରସ୍ତୁତି ଆରମ୍ଭ ହୋଇଛି ।
ପରଦା ଆଢୁଆଳରେ ରୀତିନୀତି ଅନୁଯାୟୀ ମା'ଙ୍କ ପୂଜା କରିବାକୁ ରାଜ୍ୟ ସରକାରଙ୍କ ନିର୍ଦ୍ଦେଶକୁ କଡାକଡି ଭାବେ ପାଳନ କରୁଛନ୍ତି ସମସ୍ତ ପୂଜା କମିଟି । ସାତ ଜଣ ବ୍ୟକ୍ତିଙ୍କ ମଧ୍ୟରେ ପୂଜା କାର୍ଯ୍ୟ ସମ୍ପନ୍ନ ହେବ । ସରକାର ନିର୍ଦ୍ଦେଶ ଅନୁଯାୟୀ ମୂର୍ତ୍ତିର ଉଚ୍ଚତା 4 ଫୁଟ ମଧ୍ୟରେ ସୀମିତ ରହିଛି । ନିରାଡ଼ମ୍ବର ପୂଜା ସାଙ୍ଗକୁ ବିଭିନ୍ନ ପୂଜା ମଣ୍ଡପଗୁଡିକରେ କଳସ ସ୍ଥାପନ କରାଯାଇ ପୂଜା ଆରମ୍ଭ କରାଯାଇଛି । ମା' ଲକ୍ଷ୍ମୀ ବିଭିନ୍ନ ମଣ୍ଡପରେ ଆଜି ଠାରୁ ପୂଜା ପାଇବା ସହ ନଭେମ୍ବର ୭ ତାରିଖରେ ଭସାଣି ଉତ୍ସବ ପାଇଁ ପୂଜା କମିଟି ଓ ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତି କରାଯାଇଛି । ତେବେ ମହାମାରୀ ପାଇଁ ଚଳିତ ବର୍ଷ ଭକ୍ତମାନେ ମା'ଙ୍କ ଦର୍ଶନ ଲାଭରୁ ବଞ୍ଚିତ ହେବେ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
