କେନ୍ଦ୍ରାପଡା: ଲକ୍ଷ୍ମୀପୂଜା ମେଲଣ ପାଇଁ ଦୁଲୁକୁଛି କେନ୍ଦ୍ରାପଡ଼ା । ଭଳିକି ଭଳି ବାଜାରେ ପ୍ରକମ୍ପିତ ହେଉଛି ସାରା ପରିବେଶ । ବାଜାର ତାଳକୁ ତାଳ ମିଳାଇ ପୂଜା କମିଟିର ସଦସ୍ୟ ମାନେ ନାଚୁଛନ୍ତି ଓ ନଚାଉଛନ୍ତି । କୁମାର ପୂର୍ଣ୍ଣିମା ଠାରୁ ଆରମ୍ଭ ହୋଇଥିବା ଗଜଲକ୍ଷ୍ମୀ ପୂଜାର ଶନିବାର ଶେଷଦିନ ଥିବାବେଳେ ରବିବାର ହେଉଛି ମେଳଣର ପ୍ରଥମ ଦିନ । ଆଉ ନାଚଗୀତର ତାଳେ ତାଳେ ମାଆ ଗଜଲକ୍ଷ୍ମୀଙ୍କୁ ସମସ୍ତେ ଦେଉଛନ୍ତି ମେଲାଣି ।
ତେବେ କେନ୍ଦ୍ରାପଡାରେ ପୂର୍ବରୁ ଭସାଣ ଉତ୍ସବ 3ଦିନ ଧରି ପାଳିତ ହୋଇଆସୁଥିଲା । ହେଲେ ଗତ ଦୁଇ ବର୍ଷ ହେବ ଭସାଣ ଉତ୍ସବ 2ଦିନ ଧରି ପାଳିତ ହେଉଛି । ପ୍ରଶାସନିକ ନିର୍ଦ୍ଦେଶ ମୁତାବକ, ରବିବାର ପ୍ରତ୍ୟେକ ମେଢ ପୁରୁଣା ବସ୍ଷ୍ଟାଣ୍ଡରେ ପହଞ୍ଚିବା ପରେ ସୋମବାର ବିସର୍ଜନ କରାଯିବ ।
ତେବେ ଖଣ୍ଡା ଖେଳ, ପାଇକ ଆଖଡା ଭଳି ପରମ୍ପରାକୁ ଉଜ୍ଜୀବିତ ରଖି କାକଟ ମଙ୍ଗଳା କ୍ଳବର ଲକ୍ଷ୍ମୀ ଠାକୁରାଣୀ ମେଳଣ ପଡିଆକୁ ଆସୁଥିବା ବେଳେ ନୂଆ ବସଷ୍ଟାଣ୍ଡ ମେଢ଼ ଷଣ୍ଢ ଲଢେଇ ପରମ୍ପରାକୁ ଉଜ୍ଜୀବିତ ରଖିବା ପାଇଁ ପ୍ରୟାସ କରିଛି । ଯାହା ସମସ୍ତଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଥିଲା ।
ଚଳିତବର୍ଷ ମେଳଣକୁ ୪୮ଟି ମେଢ଼ ଆସିବେ ବୋଲି କହିଛନ୍ତି କେନ୍ଦ୍ରୀୟ ପୂଜା କମିଟିର ସଭାପତି । ସେହିପରି ମେଳଣ ପାଇଁ ଶାନ୍ତିଶୃଙ୍ଖଳା ରକ୍ଷା ଓ ଟ୍ରାଫିକ ନିୟନ୍ତ୍ରଣ ପାଇଁ ୧୮ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିବା ବେଳେ ୨ଜଣ ଅତିରିକ୍ତ ଏସପି, ୪ଜଣ ଡିଏସପିଙ୍କ ସମେତ ଅନ୍ୟ ପୋଲିସ ମୁତୟନ କରାଯାଇଥିବା ସୂଚନା ଦେଇଛନ୍ତି କେନ୍ଦ୍ରାପଡ଼ା ଏସପି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
