କେନ୍ଦ୍ରାପଡା: ମହାବାତ୍ୟା 'ଫନି'କୁ ଏକ ମାସ ପୁରଣ ହୋଇଥିଲେ ସୁଧା ଫନିରେ କ୍ଷୟକ୍ଷତି ହୋଇଥିବା ଶିକ୍ଷା ଅନୁଷ୍ଠାନ ଗୁଡିକ ଏବେ ବି ଭଗ୍ନ ସ୍ତୁପ ଅବସ୍ଥାରେ ପଡି ରହିଛି । ଦିନ କେଇଟା ପରେ ଖରା ଛୁଟି ସରିବ, ସ୍କୁଲ ଖୋଲିବ । ମାତ୍ର ସ୍କୁଲ ଅବସ୍ଥା ଦେଖିଲା ପରେ ପିଲାଙ୍କ ଭବିଷ୍ୟତକୁ ନେଇ ଉଠିଛି ପ୍ରଶ୍ନ । ଏଭଳି ଏକ ନଗ୍ନ ଚିତ୍ର ଦେଖିବାକୁ ମିଳିଛି କେନ୍ଦ୍ରାପଡା ଜିଲ୍ଲା ମାର୍ଶାଘାଇ ବ୍ଲକ ନରେନ୍ଦ୍ର ପୁର ବିଦ୍ୟାଳୟରେ ।
କେନ୍ଦ୍ରାପଡା ଜିଲ୍ଲା ମାର୍ଶାଘାଇ ବ୍ଲକ ନରେନ୍ଦ୍ର ପୁର ଗ୍ରାମରେ ଥିବା ସଂସ୍କୃତ ଉଚ୍ଚବିଦ୍ୟାଳୟଟି ମହାବାତ୍ୟା ଫନିରେ ସମ୍ପୂର୍ଣ୍ଣ ରୂପେ କ୍ଷତି ଗ୍ରସ୍ତ ହୋଇ ଭାଙ୍ଗି ଛାରଖାର ହୋଇଯାଇଛି । ବିଦ୍ୟାଳୟ ଘରର ଆଜବେଷ୍ଟସ ସମ୍ପୂର୍ଣ୍ଣ ଉଡିଯାଇ ଥିବାବେଳେ ଚେୟାର ଟେବୁଲ ବେଞ୍ଚ୍ ଡେକ୍ସ ସମେତ ବିଦ୍ୟାଳୟର କାଗଜପତ୍ର ନଷ୍ଟ ହୋଇଯାଇଛି । ବତ୍ୟାକୁ ଏକମାସ ପୂରଣ ହୋଇଥିଲେ ସୁଧା ଏପର୍ଯ୍ୟନ୍ତ ପ୍ରଶାସନ ଦୃଷ୍ଟିକୁ ଆସିନାହିଁ । ଏହି ବିଦ୍ୟାଳୟର ନିର୍ମାଣ ପାଇଁ ଗ୍ରାମବାସୀ ତଥା ଶିକ୍ଷକମାନେ ଜିଲ୍ଲା ଶିକ୍ଷା ଅଧିକାରୀଙ୍କ ଠାରୁ ଆରମ୍ଭ କରି ଜିଲ୍ଲାପାଳଙ୍କ ଜନଶୁଣାଣୀରେ ଅଭିଯୋଗ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସୁଫଳ ମିଳିନାହିଁ ।
ଏକମାସ ହେଲା ଛାତ୍ରଛାତ୍ରୀ ମାନଙ୍କ ପାଠପଢା ସମ୍ପୂର୍ଣ୍ଣ ରୁପେ ବନ୍ଦ ହୋଇଥିବାରୁ ସ୍କୁଲର ପୁନରୁଦ୍ଧାର ପାଇଁ ପ୍ରଶାସନ ନିକଟରେ ଦାବିକରିଛନ୍ତି ଗ୍ରାମବାସୀ ଓ ଛାତ୍ରଛାତ୍ରୀ । ବିଦ୍ୟାଳୟ ଆସନ୍ତା ୧୯ ତାରିଖରେ ଖୋଲିବାକୁ ଥିବାବେଳେ ଛାତ୍ର ଛାତ୍ରୀ ମାନେ କିଭଳି ଭାବରେ ଏହି ଖୋଲାଘରେ ବସି ପାଠପଢିବେ ସେନେଇ ଅନିଶ୍ଚିତତା ଭିତରେ ଛାତ୍ର ଛାତ୍ରୀ ଓ ଅଭିଭାବକ । ଏନେଇ ଆମେ କେନ୍ଦ୍ରାପଡା ଜିଲ୍ଲା ଶିକ୍ଷାଧିକାରୀଙ୍କୁ ଅବଗତ କରାଇବା ପରେ ଯଥା ଶୀଘ୍ର ବିଦ୍ୟାଳୟ ମରାମତି କରାଯିବ ବୋଲି ଜିଲ୍ଲା ଶିକ୍ଷାଧିକାରୀ ପ୍ରତିଶୃତି ଦେଇଛନ୍ତି।
।
। ଏନେଇ ମରାମତି ଯଥାଶୀଘ୍ର କରିବା ପାଇଁ ପ୍ରଧାନ ଶିକ୍ଷକ ଜିଲ୍ଲାପାଳଙ୍କୁ ଅନୁରୋଧ କରିଥିବା ବେଳେ ଗ୍ରାମବାସୀ ମାନେ ମରାମତି ନ ହେଲେ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେବେ ବୋଲି ଚେତାବନୀ ଦେଇଛନ୍ତି ଯଦି ଆସନ୍ତା ୧୮ ତାରିଖ ମଧ୍ୟରେ ଏହି ବିଦ୍ୟାଳୟଟିର ମରାମତି ନ ହୁଏ ତାହା ହେଲେ ଏଠାରେ ଅଧ୍ୟୟନରତ ୨୦୦ ପିଲାଙ୍କ ପାଠପଢା କେବେ ହେବ ତାହା ଆଶା ଓ ଆଶଙ୍କାରେ ରହିଯିବ ।
କେନ୍ଦ୍ରପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
