କେନ୍ଦ୍ରାପଡ଼ା: ଆଳି ବ୍ଲକରେ ପ୍ରଧାନମନ୍ତ୍ରୀ ଆବାସ ଯୋଜନାରେ ବ୍ୟାପକ ଦୁର୍ନୀତି । ଏନେଇ ଗତ ସୋମବାର ଆଳି ବ୍ଲକ କାର୍ଯ୍ୟାଳୟରେ ହେଉଥିବା ଜିଲ୍ଲାପାଳଙ୍କ ଅଭିଯୋଗ ଶୁଣାଣି ପରେ ଦାୟିତ୍ବରେ ଥିବା ବିଡ଼ିଓଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ ଜିଲ୍ଲାପାଳ ସମର୍ଥ ବର୍ମା । ଏହି ମାମଲାରେ ଦୁର୍ନୀତି କରିଥିବା ଦୁଇ ଅଭିଯୁକ୍ତଙ୍କୁ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଗିରଫ କରିଛି ପୋଲିସ ।
ଘଟଣାରୁ ପ୍ରକାଶ ବ୍ଲକ ଅରେଇକଣା ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ହୋଇଥିବା ସୂଚନା ପାଇ ଗତ ସୋମବାର ପଞ୍ଚାୟତ ଗସ୍ତ କରିଥିଲେ ବିଡିଓ। ଅରେଇକଣା ପଞ୍ଚାୟତର ପୁଷ୍ପଲତା ସୁତାରଙ୍କର କୋଠାଘର ଥିବା ସତ୍ତ୍ବେ ତାଙ୍କୁ ୨୦୧୬-୧୭ ମସିହାରେ ଆବାସ ଯୋଜନାରେ କାର୍ଯ୍ୟାଦେଶ ଦିଆଯାଇଥିଲା । କିନ୍ତୁ ଶ୍ରୀମତୀ ସୁତାର କୌଣସି କାମ କରିନଥିଲେ ମଧ୍ୟ ତାଙ୍କୁ ଦ୍ଵିତୀୟ କିସ୍ତି ଅର୍ଥାତ ୩୦ ହଜାର ଟଙ୍କା ଦିଆଯାଇଥିଲା ।
ସବୁଠାରୁ ବଡ଼ କଥା ହେଲା କୌଣସି ଫାଇଲ କାମ କରାନଯାଇ ମଧ୍ୟ ଉକ୍ତ ମହିଳାଙ୍କ ଆକାଉଣ୍ଟକୁ କମ୍ପ୍ୟୁଟର ପ୍ରୋଗ୍ରାମର ହିମାଂଶୁ ଦାସ ଦ୍ଵିତୀୟ କିସ୍ତି ପଠାଇଥିଲେ । ତେବେ ଜିଆରଏସ ଜିଓ ଟ୍ୟାଗ କରିନଥିଲେ ମଧ୍ୟ ପରବର୍ତ୍ତୀ ସମୟରେ ନିଜର ଦୋଷକୁ ଘୋଡାଇବାକୁ ଯାଇ ହିମାଂଶୁ ସାମୟିକ ଜିଓ ଟ୍ୟାଗ କରୁଥିବା ବିଶ୍ବରଞ୍ଜନ ଦାସଙ୍କୁ ଧରି ପୁଷ୍ପଲତାଙ୍କ ଘରର ଫଟୋ ଉଠାଇଥିଲେ ।
ପରବର୍ତ୍ତୀ ସମୟରେ ଘଟଣାର ତଦନ୍ତ କରାଯିବା ପରେ ହିମାଂଶୁଙ୍କୁ ଜିଲ୍ଲାପାଳ ନିଲମ୍ବନ କରିଥିଲେ । ଏହା ସହ ସେମାନଙ୍କ ନାଁରେ ଥାନାରେ ଅଭିଯୋଗ କରିବା ପାଇଁ ବିଡ଼ିଓଙ୍କୁ ଜିଲ୍ଲାପାଳ ସ୍ପଷ୍ଟ ନିର୍ଦ୍ଦେଶ ଦେଇଥିଲେ। କମ୍ପ୍ୟୁଟର ପ୍ରୋଗ୍ରାମର ହିମାଂଶୁ ଦାସ ଓ ତାଙ୍କୁ ଏହି ଦୁର୍ନୀତିରେ ସହଯୋଗ କରିଥିବା ଜିଓ ଟ୍ୟାଗିଙ୍ଗ ସାମୟିକ କର୍ମଚାରୀ ବିଶ୍ବରଞ୍ଜନ ଦାସଙ୍କୁ ଆଳି ପୋଲିସ ବିଳମ୍ବିତ ରାତିରେ ଗିରଫ କରି ତଦନ୍ତ ପରେ କୋର୍ଟ ଚାଲାଣ କରିଛି।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
